TCS layoffs: TCSની 12,000 કર્મચારીઓની છટણી પર કર્ણાટક સરકારનો સવાલ, વાતચીત માટે અધિકારીને બોલાવ્યા

TCS layoffs: કર્ણાટક સરકારે ટાટા ગ્રૂપની અગ્રણી IT કંપની ટાટા કન્સલ્ટન્સી સર્વિસેઝ (TCS)ને 12,000 કર્મચારીઓની છટણીનું કારણ જણાવવા માટે બોલાવ્યું છે. કર્ણાટકના શ્રમ મંત્રી સંતોષ લાડે જણાવ્યું કે, “અમને ખબર પડી કે TCS આશરે 12,000 કર્મચારીઓની છટણી કરવાની તૈયારીમાં છે. આ મામલે સ્પષ્ટતા માટે અમે TCSના અધિકારીઓને બોલાવ્યા છે.”

છટણીની જાહેરાત અને કર્મચારીઓની સંખ્યા

TCSએ તાજેતરમાં તેના ગ્લોબલ વર્કફોર્સના લગભગ 2 ટકા એટલે કે આશરે 12,261 કર્મચારીઓની છટણીની જાહેરાત કરી છે. આમાં મોટાભાગના મધ્યમ અને વરિષ્ઠ કક્ષાના કર્મચારીઓનો સમાવેશ થાય છે. જૂન 2025 સુધીમાં TCSમાં કુલ 6,13,069 કર્મચારીઓ હતા, જેમાંથી ચાલુ નાણાકીય વર્ષની એપ્રિલ-જૂન ત્રિમાસિકમાં 5,000 નવા કર્મચારીઓની ભરતી કરવામાં આવી હતી.

TCSનું નિવેદન

કર્ણાટક સરકારની શરતો

શ્રમ મંત્રી સંતોષ લાડે જણાવ્યું કે, “અમે સનરાઈઝ ઈન્ડસ્ટ્રીઝને શ્રમ કાયદાઓમાંથી છેલ્લા પાંચ વર્ષથી દર વર્ષે છૂટ આપી રહ્યા છીએ, પરંતુ તેની સાથે કેટલીક શરતો પણ જોડાયેલી છે.” તેમણે ઉમેર્યું કે, “જો કોઈ કંપની કર્મચારીઓની છટણી કરવા માંગે છે, તો તેમણે અમને જાણ કરવી પડશે. અમે આ શરતોના આધારે TCS સાથે ચર્ચા કરી રહ્યા છીએ.”

કર્ણાટક રાજ્ય IT/ITES કર્મચારી સંઘ (KITU)એ આ મોટા પાયે છટણી સામે સખત વાંધો ઉઠાવ્યો છે. સંઘે ઔદ્યોગિક વિવાદ અધિનિયમ, 1947ના ઉલ્લંઘન અને કર્ણાટક સરકારની શરતોનું પાલન ન કરવા બદલ TCS વિરુદ્ધ અધિક શ્રમ આયુક્ત જી. મંજૂનાથ સમક્ષ ફરિયાદ નોંધાવી છે. KITUએ કંપનીના મેનેજમેન્ટ વિરુદ્ધ કાનૂની કાર્યવાહીની માંગ કરી છે.

સનરાઈઝ ઈન્ડસ્ટ્રી શું છે?

‘સનરાઈઝ’ ઈન્ડસ્ટ્રીનો અર્થ એવા નવા અથવા ઝડપથી વિકસતા ઉદ્યોગો છે, જે ભવિષ્યમાં અર્થતંત્રનું મહત્વનું ચાલક બનવાની ક્ષમતા ધરાવે છે. TCS જેવી IT કંપનીઓ આ શ્રેણીમાં આવે છે, પરંતુ સરકારે આવી કંપનીઓ માટે શ્રમ કાયદાઓનું પાલન કરવું ફરજિયાત રાખ્યું છે.

આ પણ વાંચો- ઓગસ્ટ 2025માં UPI, SBI કાર્ડ અને FASTag માટે નવા નિયમો, જાણો તમારા પર શું થશે અસર?