આગામી IPL સિઝનના રિટેન્શન લિસ્ટ પહેલા સામે આવેલા આ સમાચારથી ક્રિકેટપ્રેમીઓમાં નિરાશા છવાઈ ગઈ છે.
MS Dhoni Retirement: ઇન્ડિયન પ્રીમિયર લીગના ચાહકો માટે એક ભાવુક અને મોટા સમાચાર સામે આવ્યા છે. ભારતીય ક્રિકેટ ટીમના પૂર્વ કપ્તાન અને ચેન્નાઈ સુપર કિંગ્સના થાલા એટલે કે મહેન્દ્ર સિંહ ધોનીએ IPL માંથી પણ સંન્યાસ લેવાની જાહેરાત કરી દીધી છે. ઓગસ્ટ 2020 માં આંતરરાષ્ટ્રીય ક્રિકેટને અલવિદા કહ્યા બાદ હવે ધોનીએ આઈપીએલને પણ અલવિદા કહી દીધું છે.
આગામી IPL સિઝનના રિટેન્શન લિસ્ટ પહેલા સામે આવેલા આ સમાચારથી ક્રિકેટપ્રેમીઓમાં નિરાશા છવાઈ ગઈ છે. જોકે, ધોનીના ફેન્સ માટે રાહતના સમાચાર એ છે કે તેઓ સંપૂર્ણપણે ટીમથી અલગ નથી થઈ રહ્યા. CSK એ ધોનીને ટીમના નવા 'મેન્ટોર' બનાવવાનો નિર્ણય કર્યો છે.
2008 થી CSK સાથે જોડાયેલો સંબંધ
એમએસ ધોની વર્ષ 2008 માં યોજાયેલી પ્રથમ આઈપીએલ સિઝનથી જ ચેન્નાઈ સુપર કિંગ્સ સાથે જોડાયેલા રહ્યા છે. જ્યારે CSK પર બે વર્ષનો પ્રતિબંધ લાદવામાં આવ્યો હતો ત્યારે જ તેઓ અન્ય ટીમ માટે રમ્યા હતા. પરંતુ જેમ જ ચેન્નાઈની વાપસી થઈ, ધોની ફરીથી પોતાની હોમ ટીમમાં આવી ગયા હતા અને છેલ્લી મેચ સુધી આ જ ટીમ સાથે જોડાયેલા રહ્યા.
CSK ને 5 વખત બનાવ્યા IPL ચેમ્પિયન
મહેન્દ્ર સિંહ ધોનીની શાનદાર કપ્તાની હેઠળ ચેન્નાઈ સુપર કિંગ્સે 5 વખત આઈપીએલની ટ્રોફી પોતાના નામે કરી છે. કેપ્ટન તરીકે ધોનીએ સદાય યુવા ખેલાડીઓને માર્ગદર્શન આપ્યું હતું. બાદમાં તેમણે જાતે જ કપ્તાની છોડીને રવિન્દ્ર જાડેજા અને ત્યારબાદ ઋતુરાજ ગાયકવાડને ટીમની કમાન સોંપી હતી. હાલમાં ઋતુરાજ ગાયકવાડ જ CSK ના કેપ્ટન છે.
IPL માં ધોનીનો શાનદાર રેકોર્ડ
આઈપીએલમાં ધોનીનું બેટિંગ પ્રદર્શન ખૂબ જ ઉત્કૃષ્ટ રહ્યું છે:
કુલ મેચ: 278
કુલ રન: 5,439 રન
એવરેજ: 38.30
સ્ટ્રાઇક રેટ: 137.45
અડધી સદી (50s): 24
હાઇએસ્ટ સ્કોર: 84* રન
કુલ સિક્સર: 264
છેલ્લી મેચ ક્યારે રમ્યા હતા ધોની?
ગત સિઝનમાં ધોની ઈજાના કારણે એક પણ મેચ રમી શક્યા નહોતા અને તેમની જગ્યાએ સંજુ સેમસને વિકેટકીપિંગ કરી હતી. ધોનીએ તેમની આઈપીએલ કારકિર્દીની છેલ્લી મેચ 25 મે 2025 ના રોજ અમદાવાદમાં ગુજરાત ટાઇટન્સ સામે રમી હતી. જોકે તે મેચમાં તેમને બેટિંગ કરવાનો મોકો મળ્યો નહોતો. તે પહેલાં તેમણે રાજસ્થાન રોયલ્સ સામે દિલ્હીમાં રમેલી મેચમાં 16 રન બનાવ્યા હતા.
હવે નવી ભૂમિકામાં જોવા મળશે ધોની
હવે ફેન્સ ધોનીને પીળી જર્સીમાં બેટિંગ કે વિકેટકીપિંગ કરતા તો જોઈ નહીં શકે, પરંતુ ડ્રેસિંગ રૂમ અને ડગઆઉટમાં મેન્ટોર તરીકે ટીમના ખેલાડીઓને માર્ગદર્શન આપતા ચોક્કસ જોશે.