મુકેશ અંબાણીએ શ્રીનાથજી મંદિરને આપ્યું 15 કરોડનું દાન, 50 કરોડમાં બનશે આધુનિક સેવા સદન

Mukesh Ambani Shrinathji Temple: રાજસ્થાનના નાથદ્વારામાં આવેલા પ્રખ્યાત શ્રીનાથજી મંદિરની નગરીમાં એક મોટી ઘોષણા થઈ છે. રિલાયન્સ ઇન્ડસ્ટ્રીઝના ચેરમેન અને એશિયાના સૌથી ધનિક વ્યક્તિ મુકેશ અંબાણીએ અહીં આધુનિક યાત્રી અને વરિષ્ઠ સેવા સદન બનાવવાની જાહેરાત કરી છે. આ પ્રોજેક્ટનો કુલ ખર્ચ 50 કરોડ રૂપિયા રહેશે અને તે આગામી 3 વર્ષમાં પૂર્ણ થવાની આશા છે.

મુકેશ અંબાણીએ શ્રીનાથજી મંદિરમાં 15 કરોડ રૂપિયાનું દાન પણ આપ્યું છે. તેમણે મંદિરમાં ભોગ-આરતીના દર્શન કર્યા અને પૂજ્ય ગુરુ વિશાલ બાવા સાહેબ પાસેથી આશીર્વાદ લીધા. આ પ્રસંગે તેમણે કહ્યું કે, “આપણે ગર્વ કરવો જોઈએ કે આપણે વૈષ્ણવ છીએ, સનાતન ધર્મ અને આચાર્ય પરંપરાના અનુયાયી છીએ.”

આ નવું સેવા સદન ખાસ કરીને તીર્થયાત્રીઓ અને વરિષ્ઠ વૈષ્ણવ ભક્તો માટે બનાવવામાં આવશે. તેમાં 100થી વધુ રૂમ હશે, જ્યાં સુરક્ષિત અને આદરપૂર્વક રહેવાની સુવિધા મળશે. આ ઉપરાંત 24 કલાક મેડિકલ યુનિટ, નર્સિંગ, ફિઝિયોથેરાપી, સત્સંગ-પ્રવચન હોલ અને પુષ્ટિમાર્ગની થાળ-પ્રસાદ પરંપરા પર આધારિત ભોજન વ્યવસ્થા પણ રહેશે.

આ પ્રોજેક્ટ સાથે મુકેશ અંબાણીના નાના પુત્ર અનંત અંબાણી સીધા જોડાયેલા છે. આ પહેલનો હેતુ એ છે કે નાથદ્વારા આવતા દરેક ભક્તને સેવા, સન્માન અને ભક્તિનો સંપૂર્ણ અનુભવ મળે. બ્લૂમબર્ગ બિલિયનેર ઇન્ડેક્સ મુજબ, મુકેશ અંબાણીની કુલ સંપત્તિ 103 અબજ ડોલર છે અને તેઓ વિશ્વના અમીરોની યાદીમાં 18મા સ્થાને છે. આ વર્ષે તેમની સંપત્તિમાં 12.8 અબજ ડોલરનો વધારો થયો છે.

આ પણ વાંચો-વર્લ્ડ બેન્કનો દાવો: ભારતની નાણાકીય વ્યવસ્થા વિશ્વ કક્ષાની બની, 2047 સુધી 30 ટ્રિલિયન ડોલરનું લક્ષ્ય પૂરું કરવા વધુ સુધારા જરૂરી!