જીડીપીની નવી સિરીઝ: સરકારી ક્વાર્ટર્સ હવે પગારનો ભાગ ગણાશે, જાણો અર્થતંત્રના આંકડામાં શું ફેરફાર થશે

India GDP new series: દેશના અર્થતંત્રને માપવાની રીતમાં મોટા ફેરફારો થવા જઈ રહ્યા છે. રાષ્ટ્રીય આંકડાકીય કચેરી (એનએસઓ) જીડીપી ગણતરી માટે એક નવી સિરીઝ લાવવાની તૈયારી કરી રહી છે. આ નવી સિરીઝ માટે આધાર વર્ષ 2022-23 નક્કી કરવામાં આવશે. એનએસઓ દ્વારા બુધવારે જાહેર કરાયેલા એક રિપોર્ટમાં આ માહિતી આપવામાં આવી છે. આ રિપોર્ટ જીડીપીની પદ્ધતિઓમાં સુધારા માટે રચાયેલી ઉપ સમિતિ દ્વારા તૈયાર કરવામાં આવ્યો છે. આ નવા ફેરફારોથી દેશના પરિવારોનો ખર્ચ અને વપરાશ વધુ સારી રીતે સમજી શકાશે.

લોકોની વપરાશની આદતોને યોગ્ય રીતે વર્ગીકૃત કરવા કેટલાક રસપ્રદ ફેરફારો કરવામાં આવ્યા છે. હવેથી માખણ અને ઘીને ‘દૂધ અને તેના ઉત્પાદનો'ને બદલે ‘તેલ અને ચરબી' શ્રેણીમાં મૂકવામાં આવશે. આઈસ્ક્રીમને પણ હવે ‘ખાંડ અને મીઠાઈઓ'ની યાદીમાં સામેલ કરવામાં આવશે. 2011-12ની જૂની સિરીઝમાં આ બધી વસ્તુઓ દૂધની પ્રોડક્ટ્સ તરીકે ગણાતી હતી. આ ફેરફાર સંયુક્ત રાષ્ટ્રના 2018ના નવા નિયમો સાથે તાલમેલ બેસાડવા માટે કરવામાં આવ્યા છે.

વર્ષ 2022-23નો ઘરેલું ઉપભોગ ખર્ચ સર્વેક્ષણ ખાનગી અંતિમ ઉપભોગ ખર્ચ (પીએફસીઇ) માટે નવો રાષ્ટ્રીય માપદંડ નક્કી કરશે. આના જ આધારે ત્રિમાસિક હિસ્સેદારી કાઢવામાં આવશે.

સૌથી મોટો ફેરફાર સરકારી કર્મચારીઓ માટે

જે કર્મચારીઓને મકાન ભાડા ભથ્થું એટલે કે એચઆરએ નથી મળતું અને સરકારી ક્વાર્ટર મળે છે તેમના પગારનો આનાથી સાચો અંદાજ આવશે. જૂની પદ્ધતિમાં આ પ્રકારની કોઈ ગણતરી થતી ન હતી. રિપોર્ટ મુજબ આનાથી કર્મચારીઓના વળતરની સાચી નોંધ થશે અને સરકાર દ્વારા અપાતી સેવાઓનું સાચું મૂલ્ય દેખાશે.

અસંગઠિત ક્ષેત્રના કુલ મૂલ્ય વર્ધન (જીવીએ)નો અંદાજ હવે વાર્ષિક સર્વેક્ષણ અને શ્રમ દળ સર્વેક્ષણના ડેટા પરથી લગાવવામાં આવશે. સરકારી અંતિમ ઉપભોગ ખર્ચનો અંદાજ કેન્દ્ર અને રાજ્ય સરકારોના ત્રિમાસિક ખર્ચ પરથી કાઢવામાં આવશે, જેમાં વ્યાજ અને ગ્રાન્ટ બાદ કરવામાં આવશે. જાહેર વહીવટ અને સંરક્ષણ ક્ષેત્રને મુખ્યત્વે પગારના આધારે વહેંચવામાં આવશે.

વસ્તુઓના ભંડારમાં થતા ફેરફારને હવે માત્ર ખેતી કે ખાણકામ પૂરતો મર્યાદિત નહીં રખાય. હવે લિસ્ટેડ કંપનીઓના પરિણામોને પણ તેમાં ધ્યાનમાં લેવાશે. છેલ્લે, કિંમતી વસ્તુઓના અંદાજમાં માત્ર સોના ચાંદીને બદલે અન્ય મૂલ્યવાન વસ્તુઓની આયાતને પણ આવરી લેવામાં આવશે.

આ તમામ નવા ફેરફારોથી ભારતના જીડીપી અને અર્થતંત્રનું ચિત્ર વધુ સ્પષ્ટ બનશે. નવી પદ્ધતિ આજના સમયના આર્થિક વ્યવહારોને વધુ સચોટ રીતે રજૂ કરશે.

આ પણ વાંચો- Swiggy નો મોટો નિર્ણય: 10 મિનિટમાં જમવાનું પહોંચાડતી 'Snacc' એપ બંધ, જાણો કર્મચારીઓનું શું થશે?