પીએમ મોદીએ રચ્યો ઈતિહાસ, 4399 દિવસ પૂરા કરીને પંડિત નેહરુને પાછળ છોડ્યા, દેશભરમાં જશ્નની તૈયારી

PM Modi 12.0: વડાપ્રધાન નરેન્દ્ર મોદીએ ભારતના લોકશાહી ઈતિહાસમાં એક નવો અને સોનેરી અધ્યાય ઉમેર્યો છે. તેમણે સ્વતંત્ર ભારતમાં સૌથી લાંબા સમય સુધી વડાપ્રધાન પદ પર રહેવાનો પ્રથમ પીએમ પંડિત જવાહરલાલ નેહરુનો 62 વર્ષ જૂનો રેકોર્ડ તોડી નાખ્યો છે. 9 જૂન 2026 ના રોજ પીએમ મોદીના કાર્યકાળના 4399 દિવસ પૂરા થયા છે, જેની સાથે જ તેઓ દેશમાં સૌથી લાંબા સમય સુધી સતત ચૂંટાયેલા વડાપ્રધાન બની ગયા છે.

નોંધનીય છે કે દેશમાં 1952 માં પ્રથમ ચૂંટણી યોજાઈ હતી અને પંડિત નેહરુ મે 1952 માં પ્રથમ વખત ચૂંટાયેલા પીએમ બન્યા હતા. તેમણે 27 મે 1964 સુધી એટલે કે 4398 દિવસ દેશની સેવા કરી હતી. નરેન્દ્ર મોદીએ 26 મે 2014 ના રોજ પ્રથમ વખત પીએમ પદના શપથ લીધા હતા અને હવે તેમના શાસનના 12 વર્ષ પણ સફળતાપૂર્વક પૂરા થઈ ગયા છે.

દેશભરમાં જશ્ન અને પૂજા-અર્ચના

આ ઐતિહાસિક સિદ્ધિ નિમિત્તે દેશભરમાં જશ્નનો માહોલ છે. દિલ્હીના રસ્તાઓ પર પીએમ મોદીના મોટા હોર્ડિંગ્સ લગાવવામાં આવ્યા છે. ભાજપના નેતાઓ અને કાર્યકરો દ્વારા દેશભરના મંદિરોમાં વિશેષ પૂજા-અર્ચનાના કાર્યક્રમોનું આયોજન કરવામાં આવ્યું છે.

વડાપ્રધાનની આ સિદ્ધિ પર દુનિયાભરમાંથી શુભેચ્છાઓ મળી રહી છે.

માલદીવ: રાષ્ટ્રપતિ ડૉ. મોહમ્મદ મુઈઝ્ઝુએ સોશિયલ મીડિયા પ્લેટફોર્મ 'X' પર પોસ્ટ કરીને પીએમ મોદીને હાર્દિક અભિનંદન પાઠવ્યા છે. તેમણે ભારત સાથેના સંબંધો વધુ મજબૂત કરવાની ખાતરી આપી છે.

Warm congratulations to His Excellency Prime Minister @narendramodi on becoming India’s longest-serving elected Prime Minister by consecutive days in office. The Maldives looks forward to further strengthening cooperation with India, guided by mutual respect, sovereign equality,…

— Dr Mohamed Muizzu (@MMuizzu) June 10, 2026

મલેશિયા: વડાપ્રધાન અનવર ઈબ્રાહિમે પણ પીએમ મોદીના નેતૃત્વ અને જનસેવાના વખાણ કરતા આ ઐતિહાસિક રેકોર્ડ માટે તેમને શુભેચ્છા આપી છે અને દ્વિપક્ષીય સંબંધોને નવી ઊંચાઈ પર લઈ જવાની આશા વ્યક્ત કરી છે.

Heartiest congratulations to PM Modi on this historic milestone of becoming India’s longest-serving elected Prime Minister. This achievement stands as a testament to his years of dedicated public service and leadership in advancing India’s development, prosperity and standing on… pic.twitter.com/psBHZLNcG3 — Anwar Ibrahim (@anwaribrahim) June 10, 2026

13 વર્ષ મુખ્યમંત્રી, 12 વર્ષ વડાપ્રધાન

નરેન્દ્ર મોદી 2001 માં ગુજરાતના મુખ્યમંત્રી બન્યા હતા અને 13 વર્ષ સુધી આ પદ સંભાળ્યું હતું. ત્યારબાદ 2014, 2019 અને 2024 ની લોકસભા ચૂંટણીમાં સતત ઐતિહાસિક જીત મેળવીને તેઓ પીએમ બન્યા. તેમના 12 વર્ષના શાસનમાં જમ્મુ-કાશ્મીરમાંથી કલમ 370 હટાવવી, ડિજિટલ પેમેન્ટ સિસ્ટમનો વ્યાપ વધારવો અને આત્મનિર્ભર ભારત જેવા નિર્ણાયક પગલાં લેવાયા છે.

31 દેશોના સર્વોચ્ચ સન્માનની પ્રાપ્તિ

પોતાના કાર્યકાળ દરમિયાન પીએમ મોદીને 31 દેશોના સર્વોચ્ચ નાગરિક સન્માન મળી ચૂક્યા છે. 3 એપ્રિલ 2016 ના રોજ સાઉદી અરેબિયાએ તેમને 'ઓર્ડર ઓફ કિંગ અબ્દુલઅઝીઝ' થી નવાજ્યા હતા. આ ઉપરાંત નોર્વે, ફ્રાન્સ, અમેરિકા સહિતના દેશોએ પણ તેમનું બહુમાન કર્યું છે. 2016 માં તેમને સંયુક્ત રાષ્ટ્રનો 'ચેમ્પિયન ઓફ ધ અર્થ' એવોર્ડ પણ મળ્યો હતો.

ભારત મંડપમમાં NDA ની મેગા મીટિંગ

કેન્દ્ર સરકારના 12 વર્ષ પૂરા થવા અને પીએમ મોદીની આ ઐતિહાસિક ઉપલબ્ધિ નિમિત્તે આજે દિલ્હીના ભારત મંડપમ ખાતે NDA ની એક વિશાળ બેઠક યોજાવા જઈ રહી છે. આ બેઠકમાં 22 રાજ્યો અને કેન્દ્રશાસિત પ્રદેશોના મુખ્યમંત્રીઓ, નાયબ મુખ્યમંત્રીઓ તેમજ આશરે 35 સાથી પક્ષોના 75 થી વધુ દિગ્ગજ નેતાઓ સામેલ થશે.

એક સામાન્ય પરિવારમાં જન્મેલા અને રેલવે સ્ટેશન પર ચા વેચતા પિતાના પુત્રથી લઈને રાષ્ટ્રીય સ્વયંસેવક સંઘના પ્રચારક અને દેશના સર્વોચ્ચ પદ સુધીની નરેન્દ્ર મોદીની આ સફર ખરેખર અદભુત છે. કેબિનેટની આજની બેઠકમાં પણ તેમના આ ઐતિહાસિક યોગદાન બદલ તેમનું વિશેષ સન્માન કરવામાં આવશે.