રણબીર કપૂરની ‘રામાયણ' ફિલ્મ 99મા ઓસ્કારની રેસમાં સામેલ! 6 દિવસમાં 673.90 કરોડની કમાણી બાદ વિશ્વભરમાં વાગ્યો ડંકો

‘Ramayana: Part 1' Movie Oscar Entry: ભારતીય સિનેમા અને કરોડો દેશવાસીઓ માટે 99મા ઓસ્કાર એવોર્ડ્સ (99th Oscar Awards)ને લઈને એક ખૂબ જ ગૌરવપૂર્ણ સમાચાર સામે આવ્યા છે. રણબીર કપૂર, સાંઈ પલ્લવી અને સાઉથના સુપરસ્ટાર યશ અભિનીત ભવ્ય ફિલ્મ 'રામાયણ: પાર્ટ 1' ના નિર્માતાઓએ આ ફિલ્મને ઓસ્કાર એવોર્ડ્સની રેસમાં સામેલ કરવા માટે સત્તાવાર રીતે આવેદન કર્યું છે.

ઉલ્લેખનીય છે કે મરાઠી ફિલ્મ ‘ગોંધલ'ને ઓસ્કારની 'ઈન્ટરનેશનલ ફીચર ફિલ્મ' કેટેગરી માટે ભારતની સત્તાવાર એન્ટ્રી તરીકે પસંદ કરવામાં આવી છે. તેમ છતાં, ‘રામાયણ'ના મેકર્સે પોતાની ફિલ્મને ‘જનરલ કેટેગરી'માં સ્વતંત્ર રીતે મોકલવાનો મોટો નિર્ણય લીધો છે.

‘રામાયણ' એ માત્ર એક પૌરાણિક કથા નથી, પરંતુ ભારતની ભવ્ય સાંસ્કૃતિક વિરાસત અને ઓળખનું પ્રતીક છે. જે રીતે હોલીવુડે 'ધ લોર્ડ ઓફ ધ રિંગ્સ' (The Lord of the Rings) જેવી ફિલ્મો બનાવીને પોતાની કાલ્પનિક કથાઓને આખી દુનિયામાં પહોંચાડી હતી, બરાબર તે જ રીતે આ ફિલ્મ ભારતીય પૌરાણિક કથાઓની ભવ્યતાનો વૈશ્વિક સ્તરે જડબાતોડ જવાબ માનવામાં આવે છે.

ખાસ વાત એ છે કે આ ફિલ્મ સાથે જોડાયેલી વિઝ્યુઅલ ઈફેક્ટ્સ (VFX) કંપની અગાઉ હોલીવુડની અનેક મોટી ફિલ્મો માટે કામ કરી ચૂકી છે અને પોતાના શાનદાર કામ બદલ 8 ઓસ્કાર એવોર્ડ્સ પણ જીતી ચૂકી છે. આ જ આંતરરાષ્ટ્રીય અનુભવના આધારે નિર્માતાઓએ ભારતીય સિનેમાને વૈશ્વિક મંચ પર એક નવી ઓળખ અપાવવા અને દેશને ગૌરવ અપાવવા માટે આ સાહસિક પગલું ભર્યું છે.

શું છે ઓસ્કારના નિયમો અને કેવી રીતે મળી એન્ટ્રી?

ઓસ્કાર એવોર્ડ્સના નિયમો મુજબ, કોઈપણ દેશની સત્તાવાર એન્ટ્રી ઉપરાંત અન્ય ફિલ્મો પણ જો નક્કી કરેલી શરતો પૂરી કરતી હોય, તો તે સ્વતંત્ર રીતે ઓસ્કારમાં પ્રવેશ મેળવી શકે છે. આ માટેની મુખ્ય શરત એ છે કે ફિલ્મ અમેરિકાના કેટલાક નક્કી કરેલા શહેરો જેમ કે લોસ એન્જિલસ, ન્યૂયોર્ક, શિકાગો વગેરેમાં સતત 7 દિવસ સુધી થિયેટરોમાં પ્રદર્શિત થયેલી હોવી જોઈએ.

બીજી તરફ, આ વર્ષે આંતરરાષ્ટ્રીય કેટેગરીમાં પણ નવા નિયમોને કારણે ભારતીય સિનેમાને મોટો ફાયદો થયો છે:

‘ગોંધલ': મરાઠી ફિલ્મ 'ગોંધલ' ભારતની ઓફિશિયલ એન્ટ્રી તરીકે પસંદ થઈ છે.

‘અંગ': નાગા ભાષાની ફિલ્મ 'અંગ'ને ટોરન્ટો ઈન્ટરનેશનલ ફિલ્મ ફેસ્ટિવલ (TIFF)માં એવોર્ડ મળ્યો હોવાથી તેને ઓસ્કારમાં સીધી પાત્રતા મળી ગઈ છે.

‘રામાયણ: પાર્ટ 1': જનરલ કેટેગરીમાં સ્વતંત્ર એન્ટ્રી સાથે હવે કુલ 3 ભારતીય ફિલ્મો ઓસ્કારની રેસમાં મેદાનમાં છે.

બોક્સ ઓફિસ પર માત્ર 6 દિવસમાં 673.90 કરોડની ઐતિહાસિક કમાણી

દિગ્દર્શક નિતેશ તિવારીના નિર્દેશનમાં બનેલી ‘રામાયણ: પાર્ટ 1' બોક્સ ઓફિસ પર તમામ રેકોર્ડ તોડી રહી છે. ફિલ્મે રિલીઝના પ્રથમ 6 દિવસમાં જ ભારતમાં 403.95 કરોડ અને સમગ્ર વિશ્વમાં 673.90 કરોડથી વધુનું જબરદસ્ત ગ્રોસ કલેક્શન કરી લીધું છે. બોક્સ ઓફિસ પર મેળવેલી આ ઐતિહાસિક સફળતા બાદ હવે 'રામાયણ' ઓસ્કારના મંચ પર ભારતનું નામ રોશન કરવા માટે સજ્જ છે.

આ પણ વાંચો- IPL 2027 Trade Deal: હાર્દિક પંડ્યાની પંજાબ કિંગ્સમાં અને અર્શદીપ સિંહની મુંબઈ ઈન્ડિયન્સમાં એન્ટ્રી! જાણો કેટલા કરોડમાં થઈ મેગા ડીલ