Robert Kiyosaki Advice: ‘ડરો નહીં, ભાવ તૂટતા હોય તો પણ સોનું, ચાંદી અને બિટકોઈન ખરીદી લો...', દિગ્ગજ લેખક રોબર્ટ કિયોસાકીની પોસ્ટ થઈ વાયરલ!

Robert Kiyosaki Advice: અમેરિકન શેરબજારમાં ચાલી રહેલી ભારે ઉથલપાથલ અને છેલ્લા કેટલાક દિવસોમાં સોના-ચાંદીના ભાવમાં આવેલા ઘટાડા વચ્ચે વિશ્વ પ્રસિદ્ધ પુસ્તક 'રિચ ડેડ પૂર ડેડ' (Rich Dad Poor Dad) ના લેખક રોબર્ટ કિયોસાકીએ એક નવી પોસ્ટ કરી છે, જે સોશિયલ મીડિયા પર વાયુવેગે વાયરલ થઈ રહી છે. આ પોસ્ટમાં તેમણે કહ્યું છે કે, તેમના માટે ચિંતા કરવા જેવું કંઈ જ નથી, કારણ કે બજારના કડાકા દરમિયાન તેમણે હજુ વધારે સોનું, ચાંદી અને બિટકોઈન ખરીદી લીધા છે. સીધા શબ્દોમાં કહીએ તો, કિયોસાકી બજારના ઘટાડામાં ગોલ્ડ, સિલ્વર અને બિટકોઈનને ખરીદી માટેની સૌથી શ્રેષ્ઠ એસેટ ગણાવી રહ્યા છે.

અમેરિકન શેરબજારથી લઈને સોના-ચાંદીની શું છે વર્તમાન સ્થિતિ?

બીજી તરફ આંતરરાષ્ટ્રીય બજારમાં સોના અને ચાંદીના ભાવમાં લાંબા સમયથી ઘટાડાનો દોર ચાલી રહ્યો હતો. હાલમાં સ્પોટ ગોલ્ડનો લેટેસ્ટ ભાવ ઘટાડા સાથે 4,056 ડોલર પ્રતિ ઔંસના સ્તરે ટ્રેડ થઈ રહ્યો છે. જોકે, ભારતમાં તહેવારોની ખરીદીને કારણે છેલ્લા 2 દિવસમાં સોના-ચાંદીના ભાવમાં ચોક્કસપણે તેજી જોવા મળી છે.

વાયરલ પોસ્ટમાં રોબર્ટ કિયોસાકીએ શું કહ્યું?

રોબર્ટ કિયોસાકીએ પોતાની વાયરલ પોસ્ટ દ્વારા ફરી એકવાર સોના, ચાંદી અને બિટકોઈનને મુસીબતના સમયનો સહારો એટલે કે ખરાબ સમયમાં પણ કમાણી કરાવી આપતી સંપત્તિ ગણાવ્યા છે. તેમણે સોશિયલ મીડિયા પ્લેટફોર્મ X પર લખ્યું કે, "ચિંતા શા માટે કરવી? જ્યારે સોના, ચાંદી અને બિટકોઈનના ભાવ ગગડ્યા ત્યારે સામાન્ય લોકો ગભરાઈ ગયા, પણ મેં તે સમયે વધુ ખરીદી કરી લીધી."

આ ખરીદી કરવા પાછળનું મુખ્ય કારણ જણાવતા કિયોસાકીએ લખ્યું કે, "અસલી સમસ્યા વૈશ્વિક દેવાનું વધતું જતું કદ છે, ખાસ કરીને અમેરિકાનું દેવું! આ ઉપરાંત આપણા નેતાઓની અક્ષમતા કે જેઓ ખરેખર જરૂરી કામો કરી શકતા નથી અને આપણી શિક્ષણ પ્રણાલી કે જે પૈસા વિશે કંઈ જ શીખવતી નથી. કોઈપણ 'ફિયાટ મની'નો મૂળ હેતુ માત્ર એવા લોકોની સંપત્તિ ચોરી લેવાનો છે જેઓ પૈસા કમાવવા માટે સખત મહેનત કરે છે અને બદલામાં આ 'નકલી પૈસા' બચાવીને રાખે છે."

ડોલરને ગણાવે છે નકલી ચલણ, ચાંદી પર છે સૌથી વધુ ભરોસો

ઉલ્લેખનીય છે કે કિયોસાકી મોટાભાગે અમેરિકન ડોલરને 'નકલી ચલણ' ગણાવે છે અને પોતાની પોસ્ટ દ્વારા લોકોને માત્ર ડોલર જ નહીં, પરંતુ શેર અને બોન્ડમાં રોકાણ કરવાથી પણ દૂર રહેવાની સલાહ આપે છે. તેમણે પોતાની પોસ્ટના અંતમાં લખ્યું કે, "મને સોના, ચાંદી અને બિટકોઈનના આગામી ક્રેશની આતુરતાથી રાહ છે, જેથી હું વધુ ખરીદી શકું. પોતાનું ધ્યાન રાખજો."

રોબર્ટ કિયોસાકી સોશિયલ મીડિયા પર ખૂબ જ સક્રિય રહે છે અને X પર તેમના 29 લાખ ફોલોઅર્સ છે. તેઓ મોટાભાગે ચાંદીને અમીર બનવાનું સૌથી શ્રેષ્ઠ માધ્યમ ગણાવે છે. અગાઉની પોસ્ટમાં પણ તેમણે ચાંદી પર ભરોસો વ્યક્ત કરતા કહ્યું હતું કે, "સોના અને ચાંદી બંને કિંમતી ધાતુઓમાં મને લાગે છે કે ઓગસ્ટ 2026 માં ચાંદી રોકાણ માટે સૌથી સારો વિકલ્પ છે."

ડિસ્ક્લેમર:- Moneycontrol.com પર વ્યક્ત કરવામાં આવેલા મંતવ્યો નિષ્ણાતોના પોતાના અંગત મંતવ્યો છે. આ મંતવ્યો કે ભલામણો માટે વેબસાઇટ અથવા તેનું મેનેજમેન્ટ કોઈપણ રીતે જવાબદાર નથી. મનીકંટ્રોલ તેના યુઝર્સને આગ્રહ કરે છે કે કોઈપણ પ્રકારનો રોકાણનો નિર્ણય લેતા પહેલા પ્રમાણિત નાણાકીય નિષ્ણાતની સલાહ ચોક્કસથી લેવી.

આ પણ વાંચો - ગુજરાતમાં સાયબર ક્રાઈમ બેકાબૂ! 2016માં માત્ર 362 કેસ હતા, જે 2026માં વધીને 1 લાખને પાર પહોંચ્યા