બાંગ્લાદેશમાં શરિયત કાયદાની જાહેરાત: ફૈઝુલ કરીમનું તાલિબાન શાસન જેવું મોડલ લાવવાનું એલાન

બાંગ્લાદેશમાં તાજેતરમાં રાજકીય ઉથલપાથલ બાદ કટ્ટરપંથી ઇસ્લામિક સંગઠન જમાત-ચર મોઈના નેતા પીર મુફ્તી સૈયદ મુહમ્મદ ફૈઝુલ કરીમે ચોંકાવનારું નિવેદન આપ્યું છે. તેમણે જાહેર કર્યું છે કે જો તેમની પાર્ટી 'ઇસ્લામિક મૂવમેન્ટ બાંગ્લાદેશ' સત્તામાં આવશે, તો તેઓ દેશમાં અફઘાનિસ્તાનના તાલિબાન શાસનની તર્જ પર શરિયત કાયદો લાગુ કરશે.

શું કહ્યું ફૈઝુલ કરીમે?

અમેરિકા સ્થિત બાંગ્લા મીડિયા 'ઠિકાના ન્યૂઝ'ના એડિટર ખાલિદ મુહિઉદ્દીનને આપેલા ઇન્ટરવ્યૂમાં ફૈઝુલ કરીમે કહ્યું, "જો અમે રાષ્ટ્રીય ચૂંટણી જીતીશું, તો અમે શરિયત કાયદો લાગુ કરીશું. અફઘાનિસ્તાનની તાલિબાન સરકારે જે સારું કર્યું છે, તે અમે અપનાવીશું." તેમણે એમ પણ કહ્યું કે હિન્દુઓ સહિત તમામ લઘુમતીઓને શરિયત હેઠળ અધિકારો આપવામાં આવશે.

કરીમે વધુમાં ઉમેર્યું કે અમેરિકા, બ્રિટન અને રશિયા જેવા દેશોની કેટલીક સારી બાબતો પણ અપનાવવામાં આવશે, પરંતુ શરિયતનો વિરોધ કરતી કોઈપણ બાબત સ્વીકારવામાં નહીં આવે.

બાંગ્લાદેશમાં તાજેતરમાં વિદ્યાર્થીઓના આંદોલન બાદ પૂર્વ વડાપ્રધાન શેખ હસીનાને સત્તા છોડવી પડી હતી. આ પછી નોબેલ પુરસ્કાર વિજેતા મુહમ્મદ યૂનુસના નેતૃત્વમાં અંતરિમ સરકારની રચના કરવામાં આવી છે. આ સમયગાળા દરમિયાન જમાત-ચર મોઈ જેવા કટ્ટરપંથી સંગઠનો રાજકીય રીતે સક્રિય થયા છે અને ચૂંટણી લડવાની તૈયારી કરી રહ્યા છે.

લઘુમતીઓના અધિકારો પર ચિંતા

ફૈઝુલ કરીમે લઘુમતીઓને શરિયત હેઠળ અધિકારો આપવાની વાત કરી હોવા છતાં, તાલિબાન શાસનના ઉદાહરણને જોતા આ નિવેદન લઘુમતીઓના અધિકારો અને લોકતાંત્રિક મૂલ્યો માટે જોખમરૂપ માનવામાં આવી રહ્યું છે. માનવાધિકાર કાર્યકર્તાઓ અને આંતરરાષ્ટ્રીય વિશ્લેષકોનું માનવું છે કે આવી વિચારધારા બાંગ્લાદેશની ધર્મનિરપેક્ષતા, મહિલા અધિકારો અને ન્યાય વ્યવસ્થાને નબળી પાડી શકે છે.

શું હશે ભવિષ્ય?

જમાત-ચર મોઈના આ નિવેદનથી બાંગ્લાદેશના રાજકીય અને સામાજિક વાતાવરણમાં નવો વિવાદ ઉભો થયો છે. અંતરિમ સરકાર અને આગામી ચૂંટણીઓ આ દિશામાં નિર્ણાયક ભૂમિકા ભજવશે. આવી સ્થિતિમાં દેશની ધર્મનિરપેક્ષ ઓળખ અને લોકતાંત્રિક મૂલ્યોને જાળવવા માટે સરકાર અને સમાજની સામે મોટો પડકાર છે.

આ પણ વાંચો - RBIનો મોટો નિર્ણય: હવે આ લોન પર નહીં ચૂકવવો પડે પ્રી-પેમેન્ટ ચાર્જ, જાણો નવો નિયમ