ભારત-પાકિસ્તાન મેચ વિવાદ પર શશિ થરૂર ભડક્યા, કહ્યું- આ શરમજનક છે, જાણો કોંગ્રેસ-ભાજપના નેતાઓએ શું કહ્યું..

આગામી T20 વર્લ્ડ કપ 2026 શરૂ થાય તે પહેલાં જ ભારત અને પાકિસ્તાન વચ્ચેની મેચને લઈને મોટો વિવાદ ઊભો થયો છે. પાકિસ્તાને એક નવો પેંતરો રચતા જાહેરાત કરી છે કે તે વર્લ્ડ કપમાં તો ભાગ લેશે, પરંતુ 15 ફેબ્રુઆરીએ ભારત સામે યોજાનારી મેચનો બહિષ્કાર કરશે. પાકિસ્તાનના આ નિર્ણય પર દેશભરમાંથી પ્રતિક્રિયાઓ આવી રહી છે. હવે કોંગ્રેસ સાંસદ શશિ થરૂરે પણ આ મામલે મૌન તોડ્યું છે અને ઘટનાને શરમજનક ગણાવી છે.

શશિ થરૂરે શું કહ્યું?

કોંગ્રેસ નેતા શશિ થરૂરે આ વિવાદ પર નારાજગી વ્યક્ત કરતા કહ્યું હતું કે, "રમતનું બંને પક્ષો દ્વારા જે રીતે રાજનીતિકરણ કરવામાં આવી રહ્યું છે, તે અત્યંત શરમજનક છે." તેમણે બાંગ્લાદેશના ક્રિકેટર મુસ્તફિઝુર રહેમાનનો ઉલ્લેખ કરતા કહ્યું કે, કોલકાતામાં તેમનો કોન્ટ્રાક્ટ રદ કરવો દુર્ભાગ્યપૂર્ણ હતો. થરૂરના મતે પાકિસ્તાન અત્યારે બાંગ્લાદેશ સાથે એકતા બતાવવાનો પ્રયાસ કરી રહ્યું છે, જેના કારણે મામલો કાબૂ બહાર જઈ રહ્યો છે.

તેમણે વધુમાં ઉમેર્યું કે, ક્રિકેટ જેવી રમત લોકોને જોડવાનું માધ્યમ હોવી જોઈએ. ICC એ આ માટે એક મંચ પૂરું પાડવું જોઈએ અને તમામ પક્ષોને ચેતવણી આપીને આ બકવાસ ખતમ કરવી જોઈએ.

કોંગ્રેસ સાંસદ ઈમરાન પ્રતાપગઢીએ આક્રમક વલણ અપનાવતા કહ્યું કે, મને નવાઈ લાગે છે કે ભારતે કેમ સામેથી ના ન પાડી? જ્યારે આતંકી ઘટનાઓમાં આપણા જવાનો અને નાગરિકો શહીદ થાય છે, તો પછી ક્રિકેટ રમવાની શું જરૂર છે? તેમણે કહ્યું કે BCCI એ સામે ચાલીને પાકિસ્તાન સાથે રમવાની ના પાડી દેવી જોઈતી હતી.

BCCI અને ભાજપના નેતાઓની પ્રતિક્રિયા

BCCI ના ઉપાધ્યક્ષ રાજીવ શુક્લાએ સાવચેતીપૂર્વક નિવેદન આપતા કહ્યું કે, "અમે ICC ના ખેલ ભાવના વાળા નિવેદન સાથે સંપૂર્ણ સહમત છીએ. જ્યાં સુધી ICC સાથે વાત ન થાય ત્યાં સુધી બોર્ડ કોઈ ટિપ્પણી કરશે નહીં."

બીજી તરફ, ભાજપના સાંસદ શશાંક મણિએ પાકિસ્તાનની મજાક ઉડાવતા કહ્યું કે, "જ્યારે કોઈ ખેલાડીને ખબર પડી જાય કે તે જીતી શકવાનો નથી, ત્યારે તે મેદાન છોડીને ભાગી જાય છે. પાકિસ્તાન પણ રણ છોડીને ભાગી ગયું છે."

દેશના સન્માન સાથે સમાધાન નહીં

કોંગ્રેસ સાંસદ ઈમરાન મસૂદે પણ આક્રોશ વ્યક્ત કરતા કહ્યું કે, ભારતે પાકિસ્તાન સાથે રમવા વિશે વિચારવું પણ ન જોઈએ. દેશના સન્માન સાથે કોઈ સમજૂતી ન હોવી જોઈએ. જ્યારે આપણે બાંગ્લાદેશી ખેલાડીને સાઈન કર્યો ત્યારે હોબાળો થયો હતો, તો પછી પાકિસ્તાન સાથે મેચ રમવાની જિદ શા માટે?

આમ, પાકિસ્તાનના બહિષ્કારના નિર્ણય બાદ ભારતીય રાજકારણમાં પણ ગરમાવો જોવા મળી રહ્યો છે અને નેતાઓ પક્ષ-વિપક્ષ ભૂલીને પાકિસ્તાનની હરકતોની ટીકા કરી રહ્યા છે.

આ પણ વાંચો-T20 World Cup 2026: જો પાકિસ્તાન ભારત સામે નહીં રમે તો થશે 316 કરોડનું નુકસાન, ICC એ આપ્યું 48 કલાકનું અલ્ટીમેટમ