Trump: ગ્રીનલેન્ડ ખરીદવા માટે ટ્રમ્પે યુરોપને આપી ચેતવણી, ટેરિફ વધારવાની ધમકીથી મચ્યો હડકંપ

Donald Trump Greenland USA: અમેરિકાના રાષ્ટ્રપતિ ડોનાલ્ડ ટ્રમ્પ ફરી એકવાર પોતાના નિવેદનોને કારણે ચર્ચામાં આવ્યા છે. આ વખતે તેમના નિશાના પર છે બરફથી આચ્છાદિત 'ગ્રીનલેન્ડ'. ટ્રમ્પે ફરી એકવાર ગ્રીનલેન્ડને ખરીદવાની પોતાની ઈચ્છા વ્યક્ત કરી છે. એટલું જ નહીં, તેમણે દાવો કર્યો છે કે દુનિયામાં શાંતિ જાળવી રાખવા અને વૈશ્વિક સુરક્ષા માટે ગ્રીનલેન્ડ અમેરિકાના નિયંત્રણમાં હોવું અત્યંત જરૂરી છે.

ચીન અને રશિયાનો ડર બતાવીને ચેતવણી

ટ્રમ્પનું માનવું છે કે ચીન અને રશિયા આ વ્યૂહાત્મક રીતે મહત્વપૂર્ણ દ્વીપ પર પોતાની પકડ મજબૂત કરવાની ફિરાકમાં છે. ટ્રમ્પે સ્પષ્ટ શબ્દોમાં કહ્યું કે ડેનમાર્ક પાસે એટલી ક્ષમતા નથી કે તે ગ્રીનલેન્ડનો બચાવ કરી શકે. તેમણે ચેતવણી આપી છે કે વિરોધી તાકાતો અજાણ્યા ઈરાદાઓ સાથે ત્યાં પહોંચી રહી છે, જે સુરક્ષા માટે ખતરનાક સાબિત થઈ શકે છે. ટ્રમ્પના મતે, માત્ર અમેરિકા જ આ વિસ્તારની સુરક્ષાની ખાતરી આપી શકે છે.

યુરોપ પર 'ગ્રીનલેન્ડ ટેરિફ'નો મોટો ફટકો

10% ટેરિફ: 1 ફેબ્રુઆરી, 2026થી ડેનમાર્ક, નોર્વે, સ્વીડન, ફ્રાન્સ, જર્મની, બ્રિટન, નેધરલેન્ડ અને ફિનલેન્ડથી આવતા સામાન પર 10% ઈમ્પોર્ટ ડ્યુટી લાગશે.

25% સુધીનો વધારો: જો 1 જૂન સુધીમાં ગ્રીનલેન્ડને ખરીદવા અંગે કોઈ સમજૂતી નહીં થાય, તો આ ટેરિફ વધારીને 25% કરી દેવામાં આવશે.

ટ્રમ્પે યુરોપીયન દેશો પર આરોપ લગાવતા કહ્યું કે, "આ દેશો દાયકાઓથી અમેરિકન સુરક્ષા વ્યવસ્થાનો મફતમાં લાભ લઈ રહ્યા છે, પરંતુ બદલામાં પૂરતું વળતર આપતા નથી. હવે ડેનમાર્ક માટે જૂનું દેવું ચૂકવવાનો સમય પાકી ગયો છે."

'ગોલ્ડન ડોમ' માટે ગ્રીનલેન્ડ કેમ જરૂરી?

ટ્રમ્પે ગ્રીનલેન્ડ ખરીદવા પાછળનું મુખ્ય કારણ અમેરિકાની મહત્વાકાંક્ષી 'ગોલ્ડન ડોમ' (Golden Dome) મિસાઈલ ડિફેન્સ સિસ્ટમ ગણાવી છે. આ અબજો ડોલરની આધુનિક રક્ષા પ્રણાલી છે. ટ્રમ્પનું કહેવું છે કે ભૌગોલિક રીતે ગ્રીનલેન્ડ એવી જગ્યાએ છે જ્યાંથી દુશ્મનોની હાઈપરસોનિક અને બેલેસ્ટિક મિસાઈલોને રોકવા માટે સૌથી સચોટ 'એંગલ' મળે છે. જો ગ્રીનલેન્ડ અમેરિકા પાસે હશે, તો જ આ સિસ્ટમ તેની પૂરી ક્ષમતાથી કામ કરી શકશે.

કાતિલ ઠંડીમાં પણ ગ્રીનલેન્ડમાં વિરોધ પ્રદર્શન

ટ્રમ્પના આ નિવેદનોથી આંતરરાષ્ટ્રીય સ્તરે ભારે તણાવ સર્જાયો છે. ગ્રીનલેન્ડની જનતામાં પણ આ વાતને લઈને ભયંકર રોષ જોવા મળી રહ્યો છે. ગ્રીનલેન્ડની રાજધાની નૂકમાં હાડ થીજવતી ઠંડી હોવા છતાં, હજારો લોકો રસ્તા પર ઉતરી આવ્યા હતા. લોકોએ "ગ્રીનલેન્ડ વેચાઉ નથી" (Greenland is not for sale)ના નારા લગાવીને ટ્રમ્પની યોજનાનો વિરોધ કર્યો હતો.

બીજી તરફ, ડેમોક્રેટિક સેનેટર ક્રિસ કૂન્સ અને રિપબ્લિકન સેનેટર થોમ ટિલિસના નેતૃત્વમાં એક અમેરિકન પ્રતિનિધિમંડળ ડેનમાર્કની મુલાકાતે પહોંચ્યું હતું. તેમણે ડેનમાર્ક અને ગ્રીનલેન્ડના નેતાઓને ખાતરી આપી હતી કે ટ્રમ્પના નિવેદનો અમેરિકાની જનતાનો મત નથી અને અમેરિકન સંસદ બીજા દેશની સંપ્રભુતાનું સન્માન કરે છે.

આ પણ વાંચો- ICICI Prudential AMC શેરધારકો માટે સારા સમાચાર: 14.85નું ડિવિડન્ડ જાહેર, જાણો રેકોર્ડ ડેટ અને સંપૂર્ણ વિગતો