ટ્રંપનો ચીન પર કટાક્ષ પૂર્ણ ઇશારો: "મારે પણ જિનપિંગ પાસે છે એવા ડરેલા મંત્રીઓ જોઈએ!"

અમેરિકાના પૂર્વ રાષ્ટ્રપતિ ડોનાલ્ડ ટ્રંપ ફરી એક વાર તેમના નિવેદનોથી ચર્ચામાં આવ્યા છે. ચીનના રાષ્ટ્રપતિ શી જિનપિંગ સાથે થયેલી તાજેતરની બેઠક પછી, ટ્રંપે આ મુલાકાત અંગે પોતાના અનોખા અંદાજમાં વાત કરી. તેમણે જણાવ્યું કે ચીનના રાષ્ટ્રપતિ જિનપિંગ “મજબૂત અને સમજદાર નેતા” છે, પણ તેમની ટીમના સભ્યોને જોતા એમ લાગ્યું કે બધા લોકો ખૂબ જ ડરેલા છે.

વ્હાઇટ હાઉસમાં રિપબ્લિકન પાર્ટીના સેનેટરો સાથેની બેઠક દરમિયાન ટ્રંપે જિનપિંગ સાથેની તેમની વાતચીતનો ઉલ્લેખ કર્યો. તેમણે કહ્યું, “હું મારા જીવનમાં ક્યારેય એટલા ડરેલા લોકો જોયા નથી. જ્યારે મેં તેમના એક અધિકારીને પ્રશ્ન પૂછ્યો, ત્યારે તેમણે કોઈ જવાબ આપ્યો નહોતો. જિનપિંગે તેમને બોલવા દીધા જ નહોતાં.”

ટ્રંપે હાસ્યાસ્પદ અંદાજમાં કહ્યું, “મને પણ મારી કેબિનેટ એવી જ જોઈએ — બધા મૌન અને અનુશાસિત.” બેઠકમાં હાજર ઉપપ્રમુખ જેડી વેન્સ તરફ ઇશારો કરતા ટ્રંપે કહ્યું, “તમે પણ આવું વર્તન કેમ નથી કરતા?”

ચીન તરફથી જવાબ

ચીનના રાષ્ટ્રપતિ શી જિનપિંગ અને ડોનાલ્ડ ટ્રંપની મુલાકાત દક્ષિણ કોરિયાના બુસાનમાં થઈ હતી. આ બેઠક બાદ ટ્રંપે દાવો કર્યો હતો કે વાતચીત ખૂબ સફળ રહી. પરંતુ બાદમાં જિનપિંગે ટ્રંપનો આ દાવો નકારી કાઢ્યો હતો. જિનપિંગે સ્પષ્ટ કર્યું કે ચીન કંબોડિયા અને થાઈલેન્ડ વચ્ચેની શાંતિ પ્રક્રિયામાં કોઈ ભૂમિકા ભજવી રહ્યું નથી.

ટ્રંપના નિવેદનો હંમેશા ચર્ચાનો વિષય બન્યા છે. આ વખતે પણ તેમણે જિનપિંગના નેતૃત્વની પ્રશંસા સાથે તેમની ટીમની ભયભીત સ્થિતિનો ઉલ્લેખ કરીને રાજકીય હલચલ મચાવી દીધી છે. અમેરિકન રાજકારણમાં આ નિવેદનને લઈ વિવિધ પ્રતિક્રિયાઓ જોવા મળી રહી છે.

આ પણ વાંચો- ‘2 વર્ષ લાગ્યા પણ...’ PM મોદીને કોચ અમોલ મઝૂમદારે કહી ભારતીય મહિલા ટીમની વર્લ્ડ કપ જીતની રસપ્રદ કહાની, હરમનપ્રીત થઈ ભાવુક – જુઓ VIDEO