શું ભારતમાં બાળકો હવે સોશિયલ મીડિયા નહીં વાપરી શકે? બાળકોની સુરક્ષા મામલે સુપ્રીમ કોર્ટની કેન્દ્ર સરકારને કડક નોટિસ

Social Media age limit: આજના ડિજિટલ સમયમાં નાના બાળકો પણ મોબાઈલ અને સોશિયલ મીડિયાના બંધાણી બની ગયા છે. ત્યારે શું ભારતમાં 18 વર્ષથી ઓછી ઉંમરના બાળકો માટે સોશિયલ મીડિયા વાપરવા પર બ્રેક લાગશે કે કડક નિયમો આવશે? આ મામલે દેશની સૌથી મોટી અદાલત એટલે કે સુપ્રીમ કોર્ટે કેન્દ્ર સરકારને એક અત્યંત મહત્વની નોટિસ ફટકારી છે.

કોણે કરી અરજી અને શું છે માંગ?

‘જસ્ટ રાઇટ્સ ફોર ચિલ્ડ્રન અલાયન્સ' નામની એક NGO દ્વારા સુપ્રીમ કોર્ટમાં એક જાહેર હિતની અરજી દાખલ કરવામાં આવી છે. આ અરજીમાં માંગ કરવામાં આવી છે કે 18 વર્ષથી નાના બાળકો જ્યારે પણ સોશિયલ મીડિયા કે અન્ય ડિજિટલ પ્લેટફોર્મ વાપરે, ત્યારે તેમની સુરક્ષા માટે કડક કાયદા હોવા જોઈએ. ખાસ કરીને આ પ્લેટફોર્મ વાપરવા માટે માતા-પિતા કે વાલીની મંજૂરી ફરજિયાત બનાવવાની વાત પર ભાર મૂકવામાં આવ્યો છે.

Facebook અને Snapchat સામે મોટો સવાલ

નવા નિયમો અને e-KYCની માંગ

અરજદારે સરકાર પાસે માંગ કરી છે કે IT Rules 2021 માં તાત્કાલિક સુધારો કરવામાં આવે અથવા તો સરકાર નવી અને કડક ગાઈડલાઈન્સ બનાવે. કોઈપણ સોશિયલ મીડિયા પ્લેટફોર્મ 18 વર્ષથી નાના બાળક સાથે તેના માતા-પિતાની મંજૂરી વગર સીધો કોઈ ડિજિટલ કરાર ન કરી શકે. બાળકોને એપ્લિકેશન વાપરવા દેતા પહેલા વાલીઓનું કાનૂની વેરિફિકેશન અથવા e-KYC (ઈ-કેવાયસી) કરવું ફરજિયાત બનાવવામાં આવે.

બાળકો પર તોળાઈ રહેલા ગંભીર જોખમો

બાળકોને ઈન્ટરનેટ અને ડિજિટલ દુનિયાની આ રીતે બેફામ છૂટ મળવાથી તેઓ ગંભીર જોખમોનો શિકાર બની શકે છે. સુપ્રીમ કોર્ટ સમક્ષ સ્પષ્ટ જણાવાયું છે કે, અનિયંત્રિત ઉપયોગથી બાળકો ઓનલાઈન ગ્રોમિંગ, યૌન શોષણ, સાયબર-બુલિંગ, ડેટાની ચોરી અને તેમની ઉંમરને લાયક ન હોય તેવા ખરાબ કન્ટેન્ટના સંપર્કમાં આવે છે.

સોશિયલ મીડિયાના વધતા જતા દૂષણ વચ્ચે સુપ્રીમ કોર્ટનું આ પગલું બાળકોના સુરક્ષિત ભવિષ્ય માટે એક મોટી આશા સમાન છે. હવે કેન્દ્ર સરકાર આ નોટિસનો શું કાનૂની જવાબ આપે છે અને આગામી સમયમાં બાળકોના સોશિયલ મીડિયા ઉપયોગ માટે કેવા નવા કડક નિયમો લાગુ પડે છે, તેના પર સૌની નજર રહેશે.

આ પણ વાંચો- વૈશ્વિક મંદી વચ્ચે ભારતનો ડંકો: એપ્રિલ-ઓગસ્ટમાં નિકાસ 15% વધી, જાણો પીયૂષ ગોયલે શું કહ્યું!