ડિફેન્સ શેરો બન્યા રોકેટ, પારસ ડિફેન્સ 18% ઉછળ્યો- જાણો સરકારના કયા મોટા અપડેટથી બજારમાં આવી તેજી

Defense stocks: ભારતીય શેરબજારમાં બુધવારે ડિફેન્સ સેક્ટરના શેરોમાં જબરદસ્ત તેજી જોવા મળી હતી. સરકાર દ્વારા દેશના સંરક્ષણ ઉત્પાદન અને નિકાસ અંગે શાનદાર આંકડા જાહેર કરવામાં આવ્યા છે. આ ઐતિહાસિક સિદ્ધિ બાદ રોકાણકારોનો ઉત્સાહ વધ્યો અને ડિફેન્સ કંપનીઓના શેરોમાં ભારે ખરીદી નીકળી હતી.

રક્ષા મંત્રાલયે બુધવારે માહિતી આપી હતી કે નાણાકીય વર્ષ 2025-26 માં દેશનું સંરક્ષણ ઉત્પાદન વધીને 1.78 લાખ કરોડ રૂપિયાના રેકોર્ડ સ્તરે પહોંચી ગયું છે. આ સમાચાર આવતાની સાથે જ શેરબજારમાં આ કંપનીઓના શેર રોકેટ ગતિએ ભાગવા લાગ્યા હતા.

કયા ડિફેન્સ શેરોમાં આવી સૌથી વધુ તેજી?

આજના કારોબારમાં સરકારી અને ખાનગી એમ બંને પ્રકારની ડિફેન્સ કંપનીઓના શેરમાં તેજી રહી. અહીં કેટલાક મુખ્ય શેરોના આંકડા આપ્યા છે.

આ શેર માર્કેટમાં સૌથી મોટો ગેઇનર રહ્યો. કંપનીનો શેર 18% થી વધુ ઉછળીને 1,285 રૂપિયાની સપાટીની નજીક પહોંચી ગયો હતો.

હિન્દુસ્તાન એરોનોટિક્સ

દેશની આ દિગ્ગજ કંપનીનો શેર 3.58% વધીને 4,408 રૂપિયા પર બંધ રહ્યો.

ભારત ડાયનેમિક્સ

આ શેરમાં 4.25% ની મજબૂતી આવી અને તે 1,289.30 રૂપિયા પર પહોંચ્યો.

મઝગાંવ ડોક

આ કંપનીનો શેર 2.37% ના ઉછાળા સાથે 2,526 રૂપિયા પર પહોંચી ગયો હતો. આ ઉપરાંત ભારત ઇલેક્ટ્રોનિક્સમાં 1.61% અને ભારત ફોર્જમાં 0.51% નો વધારો જોવા મળ્યો હતો.

1.78 લાખ કરોડ રૂપિયાનું વિક્રમી ઉત્પાદન

રક્ષા મંત્રાલયના લેટેસ્ટ ડેટા મુજબ, નાણાકીય વર્ષ 2025-26 માં ભારતનું ડિફેન્સ ઉત્પાદન 1.78 લાખ કરોડ રૂપિયાના ઐતિહાસિક સ્તરે પહોંચી ગયું છે. જો આની સરખામણી ગત નાણાકીય વર્ષ 2024-25 (1.54 લાખ કરોડ) સાથે કરીએ તો તેમાં 15.6% નો વધારો થયો છે. જ્યારે 5 વર્ષ પહેલા એટલે કે નાણાકીય વર્ષ 2020-21 માં આ આંકડો માત્ર 84,643 કરોડ રૂપિયા હતો. એટલે કે માત્ર 5 જ વર્ષમાં ભારતના સંરક્ષણ ઉત્પાદનમાં 110% નો જંગી ઉછાળો આવ્યો છે.

રક્ષા મંત્રી રાજનાથ સિંહે વ્યક્ત કરી ખુશી

દેશની આ મોટી સિદ્ધિ પર રક્ષા મંત્રી રાજનાથ સિંહે ખુશી વ્યક્ત કરી હતી. તેમણે કહ્યું કે વડાપ્રધાન નરેન્દ્ર મોદીના નેતૃત્વમાં ભારતનું સંરક્ષણ ઉત્પાદન સતત નવી ઊંચાઈઓને આંબી રહ્યું છે. તેમણે યાદ અપાવ્યું કે, નાણાકીય વર્ષ 2013-14 માં દેશનું સ્વદેશી સંરક્ષણ ઉત્પાદન 43,746 કરોડ રૂપિયા હતું, જે આજે લગભગ ચાર ગણું થઈ ચૂક્યું છે.

સરકારી અને ખાનગી કંપનીઓનો ફાળો

સરકારના આંકડા મુજબ નાણાકીય વર્ષ 2025-26 માં કુલ ઉત્પાદનમાં સરકારી કંપનીઓનો હિસ્સો લગભગ 76% રહ્યો છે. બીજી તરફ, ખાનગી કંપનીઓ પણ પાછળ નથી. ડિફેન્સ મેન્યુફેક્ચરિંગમાં ખાનગી ક્ષેત્રનું ઉત્પાદન 42,000 કરોડ રૂપિયાના નવા રેકોર્ડ પર પહોંચી ગયું છે. અગાઉના વર્ષે ખાનગી કંપનીઓનો હિસ્સો 22% હતો, જે હવે વધીને 24% થઈ ગયો છે.

નિકાસના મોરચે પણ ભારતનો ડંકો

માત્ર ઉત્પાદન જ નહીં, ભારતે સંરક્ષણ સામગ્રીની નિકાસમાં પણ મોટી છલાંગ લગાવી છે. નાણાકીય વર્ષ 2025-26 માં ભારતની ડિફેન્સ નિકાસ વધીને 38,424 કરોડ રૂપિયાના રેકોર્ડ સ્તરે પહોંચી ગઈ છે. આ શાનદાર પ્રદર્શને વૈશ્વિક સ્તરે ભારતની તાકાત વધારી છે.

આ પણ વાંચો-Market outlook : સતત ચોથા દિવસે વધારા સાથે બંધ થયા સેન્સેક્સ-નિફ્ટી, જાણો ગુરુવારે કેવી રહેશે માર્કેટની ચાલ