HPCL Q4 Results: શેરધારકોને જલસો! 5 વર્ષના સૌથી મોટા ડિવિડન્ડની જાહેરાત, શેરમાં 5% નો તોફાની ઉછાળો

HPCL Q4 Results: સરકારી ઓઇલ રિફાઇનરી કંપની હિન્દુસ્તાન પેટ્રોલિયમ કોર્પોરેશન લિમિટેડ (HPCL) ના રોકાણકારો માટે ખૂબ જ સારા સમાચાર સામે આવ્યા છે. નાણાકીય વર્ષ 2026 ના છેલ્લા ક્વાર્ટર (જાન્યુઆરી-માર્ચ 2026) ના શાનદાર પરિણામો અને છેલ્લા 5 વર્ષના સૌથી મોટા ડિવિડન્ડની જાહેરાત બાદ કંપનીના શેરમાં જોરદાર તેજી જોવા મળી છે.

શેર બજારમાં મજબૂત ઉછાળો

આજે શેર બજારમાં HPCL ના શેરમાં જબરદસ્ત ખરીદીનો ટ્રેન્ડ જોવા મળ્યો હતો. માર્ચ 2026 ના ક્વાર્ટરના પરિણામો અને ડિવિડન્ડની જાહેરાતે રોકાણકારોમાં એવો ઉત્સાહ ભર્યો કે શેર ઇન્ટ્રા-ડે માં 5.60% ઉછળીને 390.30 ની સપાટીએ પહોંચી ગયો હતો. જોકે, ઊંચા મથાળે નફો બુક થતા ભાવ થોડા નરમ પડ્યા હતા, પરંતુ નીચેના સ્તરે સતત ખરીદીના કારણે શેર હજુ પણ મજબૂત સ્થિતિમાં છે. હાલમાં BSE પર આ શેર 4.71% ના વધારા સાથે 387.00 પર ટ્રેડ થઈ રહ્યો છે.

માર્ચ 2026 ક્વાર્ટરના પરિણામોની મુખ્ય વાતો

ચોખ્ખો નફો (Net Profit): કંપનીનો ચોખ્ખો નફો ક્વાર્ટરના આધારે 20% વધીને 4901 કરોડ પર પહોંચી ગયો છે.

આવક (Revenue): માર્ચ 2026 ક્વાર્ટરમાં કંપનીએ 1.15 લાખ કરોડની આવક મેળવી છે, જે ક્વાર્ટરના આધારે લગભગ સમાન (Flat) રહી છે.

ઓપરેટિંગ પ્રોફિટ: કંપનીના ઓપરેટિંગ નફામાં 28% નો મોટો ઉછાળો નોંધાયો છે અને તે 8979 કરોડ પર પહોંચી ગયો છે.

માર્જિન: કંપનીના ઓપરેટિંગ માર્જિનમાં પણ 170 બેસિસ પોઈન્ટ્સનો સુધારો જોવા મળ્યો છે અને તે 7.8% પર પહોંચ્યું છે.

રિફાઇનિંગ માર્જિનમાં જંગી ફાયદો

જો સંપૂર્ણ નાણાકીય વર્ષ 2026 ની વાત કરીએ તો, કંપનીનું ગ્રોસ રિફાઇનિંગ માર્જિન (GRM) વાર્ષિક ધોરણે પ્રતિ બેરલ $5.74 થી વધીને $8.79 પર પહોંચી ગયું છે. ખાસ કરીને માર્ચ ક્વાર્ટરમાં આ આંકડો $14.5 પ્રતિ બેરલ રહ્યો હતો. સરળ શબ્દોમાં કહીએ તો, કાચા તેલ (Crude Oil) ને ફિનિશ્ડ પેટ્રોલિયમ પ્રોડક્ટ્સમાં ફેરવવા પર રિફાઇનરીને જે નફો થાય છે તેને ગ્રોસ રિફાઇનિંગ માર્જિન કહેવાય છે.

રોકાણકારો અને સરકારને ડિવિડન્ડની ભેટ

શાનદાર પરિણામોની સાથે HPCL એ પોતાના શેરધારકોને ખુશ કરતા ફાઇનલ ડિવિડન્ડની જાહેરાત કરી છે. કંપની દરેક શેર પર 19 નું તોતિંગ ડિવિડન્ડ આપશે. કંપનીમાં સરકારની 54.9% હિસ્સેદારી છે, એટલે કે આ ડિવિડન્ડની જાહેરાતથી સરકારને સીધા 2219 કરોડ મળશે.

તમને જણાવી દઈએ કે છેલ્લા 5 વર્ષમાં કંપની દ્વારા જાહેર થયેલું આ સૌથી મોટું ડિવિડન્ડ છે. આ પહેલાના વર્ષોના ટ્રેન્ડ પર નજર કરીએ તો, કંપનીએ નવેમ્બર 2025 માં 6 અને ઓગસ્ટ 2025 માં શેરદીઠ 10.5 નું ડિવિડન્ડ આપ્યું હતું.

છેલ્લા 1 વર્ષમાં શેરની ચાલ કેવી રહી?

HPCL ના શેરે છેલ્લા એક વર્ષમાં તેના રોકાણકારોને રોલરકોસ્ટર રાઇડ જેવો અનુભવ કરાવ્યો છે. BSE પર 5 જાન્યુઆરી 2026 ના રોજ આ શેર 508.45 પર પહોંચ્યો હતો, જે તેના માટે 1 વર્ષનું રેકોર્ડ હાઈ લેવલ છે. પરંતુ આ ટોચના સ્તરેથી માત્ર બે જ મહિનામાં શેર 37.81% તૂટ્યો હતો અને 23 માર્ચ 2026 ના રોજ તે 316.20 ના એક વર્ષના સૌથી નીચલા સ્તરે (52-week low) આવી ગયો હતો. જોકે, હવે આ આકર્ષક ક્વાર્ટર પરિણામો અને ડિવિડન્ડની જાહેરાત બાદ શેરમાં ફરીથી રિકવરી જોવા મળી રહી છે.

આ પણ વાંચો-TVS Motor Q4 Results: નફામાં 19%નો ઉછાળો- આવક 30% વધી, જાણો શેર બજારમાં કેમ જોવા મળ્યો ઘટાડો?

ડિસ્ક્લેમર: (આ જાણકારી ફક્ત સૂચના હેતુ આપવામાં આવી રહી છે. અહીં બતાવુ જરૂરી છે કે માર્કેટમાં રોકાણ બજાર જોખમોના આધીન છે. રોકાણકારોની રીતે પૈસા લગાવાથી પહેલા હંમેશા એક્સપર્ટથી સલાહ લે. મનીકંટ્રોલની તરફથી કોઈને પણ પૈસા લગાવાની અહીં ક્યારેય પણ સલાહ નથી આપવામાં આવી છે.)