ક્રૂડ ઓઈલ સસ્તું થતાં IOC, BPCL અને HPCLના આવશે અચ્છે દિન! જાણો કોટક રિપોર્ટનો નવો ટાર્ગેટ અને રોકાણકારો માટે સલાહ

Crude oil price impact: આંતરરાષ્ટ્રીય બજારમાં ક્રૂડ ઓઈલની કિંમતોમાં થયેલા મોટા ઘટાડા બાદ હવે સરકારી ઓઈલ માર્કેટિંગ કંપનીઓ (OMCs) નું આઉટલુક ખૂબ જ પોઝિટિવ દેખાઈ રહ્યું છે. દેશની અગ્રણી બ્રોકરેજ ફર્મ કોટક ઇન્સ્ટિટ્યૂશનલ ઇક્વિટીઝ (Kotak Institutional Equities) એ પોતાના લેટેસ્ટ રિપોર્ટમાં જણાવ્યું છે કે, ઓઈલ કંપનીઓના માર્કેટિંગ માર્જિન અને નફો કમાવવાની ક્ષમતામાં શાનદાર રિકવરી આવી છે.

બ્રોકરેજ ફર્મે બદલી પોતાની સલાહ

કંપનીઓના સુધરતા માર્જિનને ધ્યાનમાં રાખીને કોટકે ઇન્ડિયન ઓઈલ (IOC), ભારત પેટ્રોલિયમ (BPCL) અને હિન્દુસ્તાન પેટ્રોલિયમ (HPCL) ના શેરમાં પોતાની અગાઉની Sell (વેચવા) ની સલાહ બદલી નાખી છે. હવે બ્રોકરેજે આ શેરો માટે Reduce (ઘટાડવા) ની સલાહ આપી છે.

જોકે, બ્રોકરેજ ફર્મે હજુ પણ આ શેરોમાં સાવચેતીનો અભિગમ જાળવી રાખ્યો છે અને હાલમાં કોઈ કંપનીને પોઝિટિવ રેટિંગ આપ્યું નથી.

* IOC શેર: 150 રૂપિયાનો ટાર્ગેટ

* HPCL શેર: 400 રૂપિયાનો ટાર્ગેટ

* BPCL શેર: 320 રૂપિયાનો ટાર્ગેટ

ભવિષ્યમાં બમ્પર કમાણીની આશા

બ્રોકરેજ ફર્મનું માનવું છે કે સરકારી ઓઈલ કંપનીઓને નાણાકીય વર્ષ FY27 માં કોઈ જ પ્રકારનું નુકસાન નહીં થાય. જો આંતરરાષ્ટ્રીય બજારમાં ક્રૂડ ઓઈલની કિંમત 75 ડોલર પ્રતિ બેરલની આસપાસ જળવાઈ રહેશે, તો FY28 અને FY29 માં આ કંપનીઓની કમાણી (Earnings) ઘણી મજબૂત રહી શકે છે.

આ વર્ષની શરૂઆત ઓઈલ કંપનીઓ માટે પડકારજનક હતી કારણ કે મધ્યપૂર્વ (Middle East) માં ટેન્શન વધવાને કારણે ક્રૂડનો ભાવ 120 ડોલર પ્રતિ બેરલ સુધી પહોંચી ગયો હતો. પરંતુ, અમેરિકા અને ઈરાન વચ્ચે ડીલના સમાચારોથી હવે બ્રેન્ટ ક્રૂડ 80 ડોલરની નીચે અને WTI ક્રૂડ 75 ડોલર પ્રતિ બેરલની સપાટીએ આવી ગયું છે.

શેરોનું છેલ્લા એક વર્ષનું પ્રદર્શન

HPCL: આ શેર 392 રૂપિયાના સ્તરે જોવા મળ્યો હતો, જેમાં છેલ્લા એક વર્ષમાં કોઈ મોટો ફેરફાર નોંધાયો નથી.

BPCL: આ શેર 306.90 રૂપિયાની આસપાસ જોવા મળ્યો છે, જેમાં એક વર્ષમાં અંદાજે 2 ટકાનો ઘટાડો થયો છે.

IOC: 143.58 રૂપિયાની સપાટીએ રહેલો આ શેર એક વર્ષમાં આશરે 3 ટકા વધ્યો છે.

જ્યારે તેની સામે શેર બજારનો મુખ્ય ઇન્ડેક્સ નિફ્ટી (Nifty) આ સમાન સમયગાળામાં લગભગ 4 ટકા જેટલો ઘટ્યો છે.

ભારતીય અર્થવ્યવસ્થા માટે સારા સમાચાર

ક્રૂડ ઓઈલના ભાવમાં નરમાશ માત્ર આ કંપનીઓ માટે જ નહીં, પરંતુ આખા દેશની ઇકોનોમી માટે રાહતના સમાચાર છે. ભારત પોતાની કુલ જરૂરિયાતના 90 ટકા ક્રૂડ ઓઈલની આયાત (Import) કરે છે.

જ્યારે ક્રૂડ સસ્તું થાય છે, ત્યારે દેશનું ઇમ્પોર્ટ બિલ ઘટે છે અને વિદેશી મુદ્રા ભંડાર (Forex Reserves) પરનું દબાણ હળવું થાય છે. અંતે, આ પરિસ્થિતિ ભારતીય રૂપિયાને મજબૂતી પ્રદાન કરે છે. આમ, સસ્તું ક્રૂડ દેશ અને શેર બજાર બંને માટે સંજીવની સમાન સાબિત થઈ રહ્યું છે.

આ પણ વાંચો- Reliance Industries Share Price: રિલાયન્સ ઇન્ડસ્ટ્રીઝનો શેર બનશે રોકેટ! CLSA અને જેફરીઝે આપ્યા મોટા ટાર્ગેટ, જાણો નિષ્ણાતોની સલાહ

Disclaimer: મનીકંટ્રોલ.કોમ પર આપવામાં આવેલી સલાહ કે વિચારો એક્સપર્ટ/બ્રોકરેજ ફર્મના અંગત મંતવ્યો છે. વેબસાઇટ કે તેનું મેનેજમેન્ટ તેના માટે જવાબદાર નથી. યુઝર્સને મનીકંટ્રોલ દ્વારા સલાહ આપવામાં આવે છે કે કોઈપણ રોકાણનો નિર્ણય લેતા પહેલા હંમેશા પ્રમાણિત નિષ્ણાતની સલાહ લેવી.