Stock Market Trend: બજારમાં આજે કડાકાના એંધાણ? અમેરિકા-ઈરાન તણાવ અને ક્રૂડના ભડકાથી માર્કેટમાં નબળી શરૂઆતના સંકેત

Stock Market Trend: ભારતીય શેરબજારમાં છેલ્લા ટ્રેડિંગ સેશનમાં જોવા મળેલી શાનદાર તેજી પર આજે બ્રેક વાગી શકે છે. ગિફ્ટ નિફ્ટીના ટ્રેન્ડ્સ સ્થાનિક બજાર માટે નબળી શરૂઆતનો ઈશારો કરી રહ્યા છે. હાલમાં ગિફ્ટ નિફ્ટી 56 પોઈન્ટ એટલે કે 0.23 ટકાના ઘટાડા સાથે 24,292.50 ના સ્તર પર ટ્રેડ કરી રહ્યો છે. જ્યારે નિફ્ટી ફ્યુચર્સ 24,296 ના લેવલની આસપાસ છે. મિડલ ઈસ્ટમાં વધતો તણાવ અને વૈશ્વિક બજારોના નબળા સંકેતો ભારતીય માર્કેટના સેન્ટિમેન્ટને બગાડી શકે છે.

અમેરિકા-ઈરાન તણાવ અને ગ્લોબલ માર્કેટની સ્થિતિ

શેરબજારમાં ઘટાડા પાછળનું સૌથી મોટું કારણ જિયોપોલિટિકલ ટેન્શન છે. એક અમેરિકન સૈનિકના મોતના સમાચાર પછી અમેરિકાએ ઈરાન પર હવાઈ હુમલાનો નવો રાઉન્ડ શરૂ કર્યો છે. તેના જવાબમાં ઈરાને પણ જોર્ડન તરફ મિસાઈલો છોડી છે. આ તણાવ આખા મિડલ ઈસ્ટમાં ફેલાવાની દહેશત છે. સુરક્ષાના કારણોસર બહેરીનમાં પણ એર રેડ સાયરન વગાડવામાં આવ્યા છે.

આંતરરાષ્ટ્રીય સ્તરે આ પરિસ્થિતિને કારણે એશિયન શેરબજારો દબાણ હેઠળ જોવા મળી રહ્યા છે. ગયા સપ્તાહે અમેરિકાના વોલ સ્ટ્રીટમાં પણ સેમિકન્ડક્ટર શેરોમાં ભારે વેચવાલીના કારણે બજાર નબળાઈ સાથે બંધ થયું હતું.

મિડલ ઈસ્ટમાં સપ્લાય ખોરવાઈ જવાની આશંકા વચ્ચે કાચા તેલની કિંમતોમાં ભારે ઉછાળો આવ્યો છે. ગયા અઠવાડિયે 16% ના ઉછાળા બાદ, બ્રેન્ટ ક્રૂડ ફ્યુચર્સ 2.7% વધીને $90.49 પ્રતિ બેરલ પર પહોંચી ગયું છે. જ્યારે WTI ક્રૂડ 2.3% વધીને $84.42 પ્રતિ બેરલની આસપાસ ટ્રેડ કરી રહ્યું છે. ઓઈલના વધતા ભાવ ભારતીય બજાર માટે હંમેશા ચિંતાનો વિષય રહ્યા છે.

પાછલા સેશનમાં કેવું રહ્યું હતું બજાર?

શુક્રવારે સ્થાનિક બજારમાં મોટી કંપનીઓના ત્રિમાસિક પરિણામો પહેલાં હેવીવેઈટ શેરોમાં જોરદાર ખરીદી જોવા મળી હતી. BSE સેન્સેક્સ 964.58 પોઈન્ટ (1.25%) ના મોટા ઉછાળા સાથે 78,151.45 પર બંધ થયો હતો. જ્યારે નિફ્ટી 50 ઈન્ડેક્સ 261.55 પોઈન્ટ (1.09%) ની તેજી સાથે 24,334.30 પર બંધ રહ્યો હતો. જોકે, આજની શરૂઆત આ ક્લોઝિંગ લેવલથી નીચે થવાની પૂરી શક્યતા છે.

એક્સપર્ટની સલાહ અને મહત્વના લેવલ્સ

એનરિચ મનીના સીઈઓ પોનમુડી આરના જણાવ્યા અનુસાર, આજનું માર્કેટ ફ્લેટ અથવા ધીમી શરૂઆત કરી શકે છે. વૈશ્વિક અનિશ્ચિતતાને કારણે મોટાભાગના રોકાણકારો રક્ષણાત્મક વલણ અપનાવી રહ્યા છે અને આક્રમક ખરીદીથી બચી રહ્યા છે. રોકાણકારોએ કંપનીઓના ત્રિમાસિક પરિણામો અને મેનેજમેન્ટની કોમેન્ટ્રી પર ધ્યાન કેન્દ્રિત કરવું જોઈએ.

નિફ્ટી 50 માટે આજના મહત્વના સપોર્ટ અને રેઝિસ્ટન્સ લેવલ

નિફ્ટી માટે હાલમાં 24,400 નું લેવલ મોટો અવરોધ છે. જો માર્કેટ આ લેવલને પાર કરીને ટકી રહે છે, તો તે 24,500 થી 24,600 ના ઝોન સુધી જઈ શકે છે. નીચેની તરફ 24,200 પર પહેલો મજબૂત સપોર્ટ છે. જો આ તૂટે તો 24,000 નું લેવલ બીજો સૌથી મોટો સપોર્ટ બની રહેશે.

આ પણ વાંચો-Stocks to Watch: આજે HDFC Bank, Reliance, PNB અને Cipla સહિત આ શેરોમાં જોવા મળશે મોટી હલચલ, ઇન્ટ્રા-ડે માટે બનાવો સ્ટ્રેટેજી

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.