L&T Q4 Results: ભારતની દિગ્ગજ એન્જિનિયરિંગ અને કન્સ્ટ્રક્શન કંપની લાર્સન એન્ડ ટુબ્રો (L&T) એ નાણાકીય વર્ષ 2025-26 (FY26) ના ચોથા ક્વાર્ટરના પરિણામો જાહેર કરી દીધા છે. કંપનીએ પોતાના શેરધારકો માટે માતબર ડિવિડન્ડની જાહેરાત કરવાની સાથે મજબૂત ઓર્ડર બુકના આંકડા પણ રજૂ કર્યા છે.
L&T Q4 Results: શેરધારકોની ચાંદી! કંપનીએ જાહેર કર્યું 38નું ડિવિડન્ડ, જાણો કેટલો થયો નફો અને કેવી છે ઓર્ડર બુક
L&T Q4 Results: દિગ્ગજ કન્સ્ટ્રક્શન કંપની L&T એ ચોથા ક્વાર્ટરના પરિણામો જાહેર કર્યા છે. કંપનીએ 38 પ્રતિ શેર ડિવિડન્ડની જાહેરાત સાથે 5,326 કરોડનો નફો નોંધાવ્યો છે. વાંચો સંપૂર્ણ વિગત.
અપડેટેડ 06:51:34 PM May 05, 2026 પર
L&T Q4 Results: દિગ્ગજ કન્સ્ટ્રક્શન કંપની L&T એ ચોથા ક્વાર્ટરના પરિણામો જાહેર કર્યા છે.
નફામાં સામાન્ય ઘટાડો, પણ કારણ છે ખાસ
L&T એ માહિતી આપી છે કે માર્ચ ક્વાર્ટરમાં કંપનીનો કોન્સોલિડેટેડ નેટ પ્રોફિટ વાર્ષિક ધોરણે 3% ઘટીને 5,326 કરોડ રહ્યો છે. ગત વર્ષે સમાન ગાળામાં કંપનીનો નફો 5,497 કરોડ હતો. જોકે, આ ઘટાડા પાછળનું મુખ્ય કારણ 'હાઈ બેઝ' છે, કારણ કે ગયા વર્ષે કંપનીને 475 કરોડનો એક વધારાનો (Exceptional Gain) ફાયદો થયો હતો. જો તેને અલગ રાખવામાં આવે તો કંપનીનું પ્રદર્શન મજબૂત રહ્યું છે.
રેવન્યુમાં 11%નો ઉછાળો
કંપનીની કામગીરીની વાત કરીએ તો, ચોથા ક્વાર્ટરમાં L&T ની કુલ આવક (Revenue) 11% વધીને 82,762 કરોડ પર પહોંચી છે. કંપનીની આ સફળતામાં વિદેશી બજારોનો મોટો ફાળો છે. કુલ આવકમાંથી 43,747 કરોડ એટલે કે લગભગ 53% હિસ્સો ઇન્ટરનેશનલ માર્કેટમાંથી આવ્યો છે, જે દર્શાવે છે કે વૈશ્વિક સ્તરે L&T ની પકડ વધુ મજબૂત બની રહી છે.
ડિવિડન્ડની જાહેરાત
રોકાણકારો માટે સારા સમાચાર એ છે કે L&T ના બોર્ડ ઓફ ડિરેક્ટર્સે નાણાકીય વર્ષ 2025-26 માટે 38 પ્રતિ શેર ફાઈનલ ડિવિડન્ડ આપવાની ભલામણ કરી છે. આગામી સમયમાં શેરધારકોની મંજૂરી મળ્યા બાદ આ રકમ સીધી તેમના ખાતામાં જમા કરવામાં આવશે.
ઓર્ડર બુકનો નવો રેકોર્ડ
કંપનીના ભવિષ્ય માટે સૌથી મહત્વની બાબત તેની ઓર્ડર બુક છે. 31 માર્ચ 2026 સુધીમાં L&T ની કુલ ઓર્ડર બુક 7,40,327 કરોડ ના રેકોર્ડ સ્તરે પહોંચી ગઈ છે, જે ગત વર્ષ કરતા 28% વધુ છે. માત્ર ચોથા ક્વાર્ટરમાં જ કંપનીને 89,772 કરોડના નવા ઓર્ડર મળ્યા છે, જેમાંથી 67% ઓર્ડર વિદેશી દેશોના છે.
માર્જિન પર જોવા મળ્યું દબાણ
ઓપરેશનલ મોરચે જોઈએ તો, કંપનીનો EBITDA 5% વધીને 8,610 કરોડ થયો છે. જોકે, વધતી જતી કોસ્ટ (ખર્ચ) અને કામના મિશ્રણમાં ફેરફારને કારણે EBITDA માર્જિન 11% થી ઘટીને 10.4% નોંધાયું છે.
આખા વર્ષનું પ્રદર્શન અને શેરની સ્થિતિ
સમગ્ર નાણાકીય વર્ષ FY26 ની વાત કરીએ તો, કંપનીની રેવન્યુ 12% વધીને 2,85,874 કરોડ રહી છે અને ઓર્ડર ઇનફ્લોમાં 22% નો વધારો જોવા મળ્યો છે. મેનેજમેન્ટના જણાવ્યા અનુસાર, કંપની હવે ટેકનોલોજી આધારિત ગ્રોથ અને મૂડીના શિસ્તબદ્ધ ઉપયોગ પર વધુ ધ્યાન આપી રહી છે.
પરિણામો જાહેર થયા પહેલા, શેરબજારમાં L&T નો શેર 0.63% ના ઘટાડા સાથે 4,075 પર બંધ થયો હતો. નોંધનીય છે કે છેલ્લા 1 વર્ષમાં આ સ્ટોકે તેના રોકાણકારોને 22.37% જેટલું વળતર આપ્યું છે. હાલમાં કંપનીનું માર્કેટ કેપ 5.58 લાખ કરોડ છે.
ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.
MoneyControl News
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.
