Market Outlook : લાલ નિશાનમાં બંધ થયું બજાર, જાણો 11 મેના રોજ કેવી રહેશે બજારની ચાલ?

Market Outlook : ભારતીય શેરબજારમાં 8 મેના રોજ નબળાઈ જોવા મળી અને બજાર લાલ નિશાનમાં બંધ થયું હતું. ટ્રેડિંગ સેશનના અંતે સેન્સેક્સ 516.33 પોઈન્ટ એટલે કે 0.66 ટકાના ઘટાડા સાથે 77,328.19 પર બંધ થયો હતો. જ્યારે નિફ્ટી 150.50 પોઈન્ટ (0.62%) ઘટીને 24,176.15 ના સ્તરે આવી ગયો છે.

બજારમાં લગભગ 1988 શેરોમાં તેજી જોવા મળી હતી, જ્યારે 2048 શેરોમાં ઘટાડો નોંધાયો હતો અને 170 શેરોમાં કોઈ ફેરફાર જોવા મળ્યો ન હતો.

કયા શેરમાં રહ્યો ઉતાર-ચઢાવ?

સૌથી વધુ ઘટતા શેરો : SBI, કોલ ઈન્ડિયા, HDFC બેંક, બજાજ ફાઈનાન્સ અને એક્સિસ બેંક જેવા મોટા શેરોમાં ભારે વેચવાલી જોવા મળી.

સેક્ટરલ ઇન્ડેક્સની સ્થિતિ

મિડકેપ અને સ્મોલકેપની વાત કરીએ તો, નિફ્ટી મિડકેપ ઈન્ડેક્સ 0.15% ઘટ્યો હતો, જ્યારે સ્મોલકેપ ઈન્ડેક્સમાં 0.22% નો ઉછાળો જોવા મળ્યો હતો. IT, હેલ્થકેર, કન્ઝ્યુમર ડ્યુરેબલ્સ અને FMCG સેક્ટરને બાદ કરતા મોટાભાગના ઇન્ડેક્સ લાલ નિશાનમાં જ બંધ થયા છે. જેમાં PSU બેંક ઈન્ડેક્સમાં સૌથી વધુ 3% નો કડાકો જોવા મળ્યો છે. આ ઉપરાંત ઓઇલ એન્ડ ગેસ 1% અને પ્રાઇવેટ બેંક, મેટલ, એનર્જી, પાવર તથા રિયલ્ટી ઈન્ડેક્સમાં પણ 0.5% નો ઘટાડો નોંધાયો છે.

શા માટે બજારમાં ઘટાડો આવ્યો?

જિયોજિત ઈન્વેસ્ટમેન્ટ્સના રિસર્ચ હેડ વિનોદ નાયરના જણાવ્યા અનુસાર, હોર્મુઝ સ્ટ્રેટ પાસે અમેરિકા અને ઈરાન વચ્ચેની નવી લશ્કરી ગતિવિધિઓને કારણે બજારમાં 'રિસ્ક-ઓફ' માહોલ જોવા મળ્યો છે. આ તણાવને લીધે સીઝફાયર (શાંતિ) ની આશાઓ ઘટી અને રોકાણકારોએ પ્રોફિટ બુકિંગ શરૂ કરી દીધું.

જોકે, રાહતની વાત એ છે કે ક્રૂડ ઓઈલની કિંમત 100 ડોલર પ્રતિ બેરલની આસપાસ જળવાઈ રહી છે. અમેરિકાના 10-વર્ષના બોન્ડ યીલ્ડમાં નરમાશ આવતા બજાર અને રૂપિયાને થોડો ટેકો મળ્યો છે. આ અનિશ્ચિત માહોલ વચ્ચે પણ રોકાણકારો સારા રિઝલ્ટવાળી કંપનીઓ અને આકર્ષક વેલ્યુએશન ધરાવતા મિડકેપ-સ્મોલકેપ શેરો પર ફોકસ કરી રહ્યા છે.

નિફ્ટી માટે કેવો છે એક્સપર્ટનો વ્યુ?

SBI સિક્યોરિટીઝના સુદીપ શાહના મતે, નિફ્ટી માટે હવે 24,000 થી 23,950 નો ઝોન મહત્વનો સપોર્ટ છે. જો નિફ્ટી આ લેવલ નીચે જશે, તો નબળાઈ 23,800 અને શોર્ટ ટર્મમાં 23,650 સુધી વધી શકે છે. જ્યારે ઉપરની તરફ 24,330 થી 24,350 નો ઝોન રેઝિસ્ટન્સ (અવરોધ) તરીકે કામ કરશે.

LKP સિક્યોરિટીઝના રૂપક ડે ઉમેરે છે કે, નિફ્ટી ડેઇલી અને ઇન્ટ્રાડે ચાર્ટ પર 50 EMA ની નીચે આવી ગયો છે, જે સેન્ટિમેન્ટમાં નબળાઈનો સંકેત છે. 24,200 ની સ્ટ્રાઈક પર ભારે કોલ રાઈટિંગ થયું છે. જો સોમવારે બજાર 24,200 ની નીચે રહેશે તો 24,000 સુધીનો ઘટાડો આવી શકે છે, પરંતુ જો 24,200 પાર કરશે તો 24,400 સુધીની શોર્ટ-ટર્મ રિકવરી જોવા મળી શકે છે.

બેંક નિફ્ટી કઈ દિશામાં જશે?

બોનાન્ઝાના રિસર્ચ એનાલિસ્ટ અભિનવ તિવારીનું કહેવું છે કે બેંકિંગ શેરોએ બજારનો આખો મૂડ બગાડ્યો હતો. SBI એ ચોથા ક્વાર્ટરમાં 19,683.7 કરોડ રૂપિયાનો નેટ પ્રોફિટ નોંધાવ્યો છે (ગત વર્ષ કરતા 5.6% વધુ), છતાં માર્જિન અને ટ્રેઝરી આવક પર દબાણને કારણે બજારનું રિએક્શન મિશ્ર રહ્યું હતું.

ટેકનિકલ રીતે જોઈએ તો, બેંક નિફ્ટી ઇન્ટ્રાડે ચાર્ટ પર 'ડિસેન્ડિંગ ટ્રાયએંગલ' તોડીને નબળો પડ્યો છે અને 1.31% ના ઘટાડા સાથે 55,311 પર બંધ થયો છે. બેંક નિફ્ટી માટે હવે 54,900 - 54,800 નો મજબૂત સપોર્ટ છે. જો આ લેવલ તૂટશે તો તે 54,500 થી 54,100 સુધી ગગડી શકે છે. ઉપરની તરફ 55,800 - 55,900 રેઝિસ્ટન્સ રહેશે.

આગળ જતા બજાર એક ચોક્કસ દાયરામાં (Range-bound) અને સ્ટોક-સ્પેસિફિક રહેવાની પૂરી શક્યતા છે. હવે કંપનીઓના ક્વાર્ટરલી રિઝલ્ટ, આંતરરાષ્ટ્રીય બજારમાં ક્રૂડ ઓઈલના ભાવ અને વિદેશી રોકાણકારો (FII) નું વલણ જ બજારની આગામી દિશા નક્કી કરશે. રોકાણકારોએ સમજી-વિચારીને સારા ફંડામેન્ટલ ધરાવતા શેરોમાં જ રોકાણ કરવું હિતાવહ છે.

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.

આ પણ વાંચો-Goldline Pharma IPO: પૈસા તૈયાર રાખો! 12 મેથી ખુલી રહ્યો છે ગોલ્ડલાઈન ફાર્માનો IPO, જાણો રોકાણ માટેની તમામ વિગતો