NSE Q2 Results: નેશનલ સ્ટોક એક્સચેન્જને થયો 2,578 કરોડનો જંગી નફો, ઓપરેટિંગ EBITDAમાં 107%નો તોફાની ઉછાળો

NSE Q2 Results: દેશના સૌથી મોટા સ્ટોક એક્સચેન્જ 'નેશનલ સ્ટોક એક્સચેન્જ'એ મંગળવાર, 3 નવેમ્બરના રોજ નાણાકીય વર્ષ 2026-27 ના બીજા ક્વાર્ટરના શાનદાર પરિણામો જાહેર કર્યા છે. વાર્ષિક ધોરણે કંપનીનો કોન્સોલિડેટેડ નેટ પ્રોફિટ 23% વધીને 2,578 કરોડ પર પહોંચી ગયો છે. ગયા વર્ષે આ જ ત્રિમાસિક ગાળામાં NSE એ 2,098 કરોડનો નફો કમાયો હતો.

આ ક્વાર્ટર દરમિયાન કંપનીની કુલ આવક પણ વાર્ષિક ધોરણે 9% વધીને 4,554 કરોડ થઈ ગઈ છે, જે એક વર્ષ પહેલા 4,160 કરોડ હતી. સૌથી ખાસ વાત એ છે કે કંપનીનો ઓપરેટિંગ EBITDA 107% ના તોફાની ઉછાળા સાથે 3,079 કરોડ નોંધાયો છે અને EBITDA માર્જિન 76% રહ્યું છે. આ ઉપરાંત પ્રતિ શેર કમાણી પણ 8.48 થી વધીને 10.41 થઈ ગઈ છે.

ત્રિમાસિક ધોરણે પરિણામોમાં જોવા મળી નરમાઈ

વાર્ષિક ધોરણે NSE ના પરિણામો ખૂબ જ મજબૂત રહ્યા છે, પરંતુ પાછલા ક્વાર્ટર (જૂન ક્વાર્ટર) ની સરખામણીએ પ્રદર્શનમાં ઘટાડો જોવા મળ્યો છે. Q2 FY27 માં કંપનીનો નેટ પ્રોફિટ ત્રિમાસિક ધોરણે 17.4% ઘટીને 2,575.9 કરોડ રહ્યો છે, જે જૂન ક્વાર્ટરમાં 3,120.1 કરોડ હતો. આ જ રીતે રેવન્યુ પણ 10.8% ઘટીને 4,066.8 કરોડ રહી છે. જ્યારે EBITDA 13.3% ઘટીને 3,079 કરોડ અને EBITDA માર્જિન 77.86% થી ઘટીને 75.7% પર આવી ગયું છે.

શેરબજારના કેશ માર્કેટ અને ઇક્વિટી ઓપ્શન્સમાં વધેલા ટ્રેડિંગ વોલ્યુમનો સીધો ફાયદો NSE ને મળ્યો છે, જેની મુખ્ય વિગતો નીચે મુજબ છે.

ટ્રાન્ઝેક્શન ચાર્જ: ટ્રાન્ઝેક્શન ચાર્જમાંથી થતી આવક વાર્ષિક ધોરણે 9% વધીને 3,035 કરોડ થઈ ગઈ છે.

ટ્રેડિંગ વોલ્યુમ: કેશ માર્કેટમાં સરેરાશ દૈનિક ટ્રેડિંગ વોલ્યુમ 24% વધીને 1,18,377 કરોડ રહ્યું છે. જ્યારે ઇક્વિટી ઓપ્શન્સમાં પ્રીમિયમ વેલ્યુના આધારે વોલ્યુમ 3% વધીને 47,977 કરોડ પર પહોંચ્યું છે.

અન્ય સેવાઓમાંથી આવક: ડેટા ફીડ અને ટર્મિનલ સર્વિસીસમાંથી થતી આવક 43% વધીને 165 કરોડ રહી છે. જ્યારે નવા IPO અને લિસ્ટિંગ સર્વિસીસમાંથી થતી કમાણી 70% ના મોટા ઉછાળા સાથે 150 કરોડ થઈ ગઈ છે.

ખર્ચમાં 51% નો મોટો ઘટાડો, પ્રથમ છ માસમાં નફો 13% વધ્યો

વાર્ષિક ધોરણે NSE નો કુલ ખર્ચ 51% ઘટીને 1,161 કરોડ રહી ગયો છે. ઉલ્લેખનીય છે કે ગયા વર્ષે આ જ ક્વાર્ટરમાં કંપનીએ કો-લોકેશન અને ડાર્ક ફાઇબર કેસમાં SEBI સેટલમેન્ટ ફી પેટે 1,297 કરોડની જોગવાઈ કરી હતી, જેના કારણે ગયા વર્ષનો ખર્ચ ઘણો વધારે દેખાયો હતો.

નાણાકીય વર્ષ 2026-27 ના પ્રથમ છ મહિનાના આંકડા પર નજર કરીએ તો, NSE ની કુલ આવક 9% વધીને 9,807 કરોડ થઈ છે. ઓપરેટિંગ EBITDA 45% વધીને 6,674 કરોડ રહ્યો છે અને ચોખ્ખો નફો 13% વધીને 5,698 કરોડ પર પહોંચ્યો છે.

સરકારી તિજોરીમાં જમા કરાવ્યા 41,234 કરોડ!

NSE એ ચાલુ નાણાકીય વર્ષના પ્રથમ છ મહિનામાં સરકારી તિજોરીમાં 41,234 કરોડનું જંગી યોગદાન આપ્યું છે. જેમાં નીચે મુજબના ટેક્સ અને ફી સામેલ છે.

STT અને CTT: 34,788 કરોડ

ઇન્કમ ટેક્સ: 2,885 કરોડ

સ્ટેમ્પ ડ્યુટી: 1,926 કરોડ

GST: 1,171 કરોડ

SEBI ફી: 464 કરોડ

આ ઉપરાંત, NSE ના બોર્ડે પોતાની સબસિડિયરી કંપની નેશનલ કોલ એક્સચેન્જ ઓફ ઈન્ડિયા લિમિટેડમાંથી 40% સુધીનો હિસ્સો વેચવાની પણ મંજૂરી આપી દીધી છે. આ વેચાણ એક અથવા અલગ-અલગ તબક્કામાં પૂર્ણ કરવામાં આવશે. અત્રે નોંધનીય છે કે BSE પર NSE ના શેર 24.10 એટલે કે 1.35% ના ઘટાડા સાથે 1,803.80 પર બંધ થયા હતા.

ડિસ્ક્લેમર: આ માહિતી માત્ર જાણકારીના હેતુથી આપવામાં આવી છે. અહીં જણાવવું જરૂરી છે કે શેરબજારમાં રોકાણ એ બજારના જોખમોને આધીન છે. રોકાણકારોએ કોઈપણ જગ્યાએ નાણાં રોકતા પહેલા હંમેશા નિષ્ણાતની સલાહ લેવી જોઈએ. મનીકંટ્રોલ દ્વારા ક્યારેય પણ કોઈને રોકાણ કરવાની સલાહ આપવામાં આવતી નથી.