Patanjali Foods Share Price: બાબા રામદેવની કંપનીનો શેર 18% ક્રેશ થયો, એક બ્લોક ડીલથી રોકાણકારોને રાતા પાણીએ રોવાનો વારો

Patanjali Foods Share Price: શેરબજારમાં ક્યારે કયો શેર રોકાણકારોને મોટો ઝટકો આપે તે કહેવું મુશ્કેલ છે. યોગ ગુરુ બાબા રામદેવ સાથે જોડાયેલી કંપની પતંજલિ ફૂડ્સના રોકાણકારો માટે 15 જુલાઈનો દિવસ અત્યંત ખરાબ સાબિત થયો. આજે આ કંપનીનો શેર માર્કેટમાં ખરાબ રીતે ક્રેશ થઈ ગયો છે. એક સમયે શેરમાં 18 ટકા જેટલો તોતિંગ કડાકો જોવા મળ્યો હતો. બપોરે 12:50 વાગ્યાની આસપાસ શેર થોડો રિકવર થઈને 14.69 ટકાના ભારે ઘટાડા સાથે 340 રૂપિયા પર ટ્રેડ કરી રહ્યો હતો. આ મોટા ઘટાડા સાથે કંપનીનો શેર તેના 52 સપ્તાહના સૌથી નીચલા સ્તરે આવી ગયો છે.

આટલા મોટા કડાકા પાછળનું મુખ્ય કારણ શું?

બજારના જાણકારો અનુસાર, આ કડાકા પાછળ એક મોટી બ્લોક ડીલ જવાબદાર છે. CNBCના લેટેસ્ટ રિપોર્ટ અનુસાર, પતંજલિ ફૂડ્સમાં 1.45 ટકા શેરોની એક બ્લોક ડીલ થઈ છે. આ ડીલ પ્રતિ શેર 355 રૂપિયાના ભાવે થઈ હોવાનું સામે આવ્યું છે. આ આખી ડીલની કુલ કિંમત 195 કરોડ રૂપિયા આંકવામાં આવી રહી છે. બજારમાં આ મોટા સોદાની ખબર પડતા જ રિટેલ રોકાણકારોમાં ગભરાહટ ફેલાઈ અને વેચવાલીનું ભારે દબાણ જોવા મળ્યું.

ટ્રેડિંગ વોલ્યુમમાં જોવા મળ્યો અસામાન્ય ઉછાળો

જ્યારે છેલ્લા 20 દિવસનું સરેરાશ ટ્રેડિંગ વોલ્યુમ માત્ર 25 લાખ શેરોની આસપાસ જ રહેતું હતું. ડિલિવરી વોલ્યુમમાં આવેલો આ જંગી ઉછાળો એ વાતનો સીધો સંકેત આપે છે કે મોટા સંસ્થાકીય રોકાણકારોની એક્ટિવિટી આ શેરમાં ખૂબ વધી ગઈ છે.

આ વર્ષે રોકાણકારોને 37% નું નુકસાન

આ વર્ષે પતંજલિ ફૂડ્સના રોકાણકારોને ભારે નુકસાન સહન કરવાનો વારો આવ્યો છે. આ વર્ષમાં અત્યાર સુધીમાં શેર 37 ટકા તૂટી ચૂક્યો છે. જ્યારે આ જ સમયગાળામાં મુખ્ય ઇન્ડેક્સ નિફ્ટીમાં 8 ટકાનો ઘટાડો જોવા મળ્યો છે.

બ્લૂમબર્ગના ડેટા મુજબ, છેલ્લા 5 ટ્રેડિંગ સેશનમાં આ શેર 3.5 ટકાથી વધુ અને છેલ્લા 30 દિવસમાં 7.2 ટકા ગગડ્યો છે. આ આંકડાઓ સ્પષ્ટ કરે છે કે છેલ્લા ઘણા અઠવાડિયાથી કંપનીના શેરો પર વેચવાલીનું ભારે દબાણ રહેલું છે.

કંપનીનો પરિચય અને નફાની સ્થિતિ

જણાવી દઈએ કે, પતંજલિ ફૂડ્સ દેશમાં ખાદ્ય તેલ અને FMCG પ્રોડક્ટ્સ બનાવતી સૌથી મોટી કંપનીઓમાંની એક છે. તેની શરૂઆત 1986 માં થઈ હતી. પતંજલિ, રુચિ ગોલ્ડ, ન્યુટ્રિલા, દંત કાંતિ અને મહાકોશ જેવી પ્રખ્યાત બ્રાન્ડ્સ આ કંપનીની જ છે. જો કંપનીના નફાની વાત કરીએ તો, માર્ચ મહિનામાં પૂરા થયેલા ત્રિમાસિક ગાળામાં કંપનીનો કન્સોલિડેટેડ ચોખ્ખો નફો 46 ટકા વધીને 523.97 કરોડ રૂપિયા રહ્યો હતો. આ નફા પાછળ ખાદ્ય તેલ અને ફૂડ પ્રોડક્ટ્સના સારા વેચાણનો મોટો ફાળો હતો.

બ્રોડર માર્કેટની સ્થિતિ

એક તરફ પતંજલિ ફૂડ્સનો શેર ખરાબ રીતે તૂટ્યો, તો બીજી તરફ 15 જુલાઈએ બ્રોડર માર્કેટમાં શરૂઆતી તેજી બાદ બપોરે થોડી સુસ્તી જોવા મળી હતી. બપોરે 1:15 વાગ્યાની આસપાસ નિફ્ટી 14 પોઈન્ટના મામૂલી વધારા સાથે 24,067 પર ટ્રેડ કરી રહ્યો હતો. જ્યારે સેન્સેક્સ 0.12 ટકા (લગભગ 79 પોઈન્ટ) ના વધારા સાથે 77,140 પર હતો. બેંક નિફ્ટીમાં પણ 0.43 ટકાની સાધારણ તેજી જોવા મળી હતી.

આ પણ વાંચો-Ather Energy Share Price: એથર એનર્જીનો શેર બન્યો રોકેટ, 1000 કરોડના રોકાણના સમાચારથી IPO રોકાણકારોના પૈસા 3 ગણા થયા

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.