RBI MPC Meeting: સામાન્ય માણસને રાહત, સતત ત્રીજી વખત રેપો રેટ 5.25% પર યથાવત, જાણો GDP અંગેના નવા આંકડા

RBI MPC Meeting: ભારતીય રિઝર્વ બેંકની મોનેટરી પોલિસી કમિટીની જૂન મહિનાની મહત્વની મીટિંગના પરિણામો જાહેર થઈ ગયા છે. આજે, 5 જૂનના રોજ મીટિંગ પૂર્ણ થયા બાદ બેંક લોન અને અર્થતંત્ર અંગે મોટા સમાચાર સામે આવ્યા છે. મોંઘવારી અને વૈશ્વિક બજારની સ્થિતિને ધ્યાનમાં રાખીને RBI એ મહત્વનો નિર્ણય લીધો છે.

સતત ત્રીજી વખત રેપો રેટમાં કોઈ ફેરફાર નહીં

RBI ગવર્નર સંજય મલ્હોત્રાએ પ્રેસ કોન્ફરન્સમાં સત્તાવાર જાહેરાત કરી છે કે, રિઝર્વ બેંકે રેપો રેટમાં કોઈપણ પ્રકારનો ફેરફાર કર્યો નથી. રેપો રેટને સતત ત્રીજી વખત 5.25% પર જ યથાવત રાખવામાં આવ્યો છે.

આ ઉપરાંત, કેન્દ્રીય બેંકે પોતાનું વલણ ન્યુટ્રલ રાખ્યું છે. નિષ્ણાતો પહેલેથી જ એવો અંદાજ લગાવી રહ્યા હતા કે પશ્ચિમ એશિયામાં ચાલી રહેલા યુદ્ધ અને તણાવને કારણે મોંઘવારી અને આર્થિક વિકાસ સામે જે પડકારો ઊભા થયા છે, તેને જોતા RBI વ્યાજ દરોમાં કોઈ વધારો કે ઘટાડો નહીં કરે.

સાદી ભાષામાં કહીએ તો, રેપો રેટ એવો વ્યાજ દર છે જેના પર સામાન્ય કોમર્શિયલ બેંકો રિઝર્વ બેંક પાસેથી લોન લે છે. આ લોન મેળવવા માટે બેંકો પોતાની સરકારી સિક્યોરિટીઝ RBI પાસે ગિરવે મૂકે છે. આ એક એવું મોનેટરી પોલિસી ટૂલ છે, જેની મદદથી RBI બજારમાં નાણાંની પ્રવાહિતા, મોંઘવારી અને દેશના આર્થિક વિકાસને કંટ્રોલ કરે છે.

FY26-27માટે GDP ગ્રોથના અંદાજમાં ઘટાડો

એપ્રિલ મહિનામાં યોજાયેલી મીટિંગમાં MPC એ નાણાકીય વર્ષ 2026 (FY26-27) માટે ભારતના આર્થિક વિકાસ દરનો અંદાજ ઘટાડ્યો હતો.પહેલા આ અંદાજ 6.9% હતો, જેને ઘટાડીને 6.6% કરવામાં આવ્યો છે. આ ઘટાડા પાછળનું મુખ્ય કારણ ગ્લોબલ સપ્લાય ચેનમાં આવેલી અડચણો અને આંતરરાષ્ટ્રીય બજારમાં કાચા તેલના ઊંચા ભાવ છે.

નાણાકીય વર્ષના અલગ-અલગ ક્વાર્ટર માટે GDP ગ્રોથનો અંદાજ નીચે મુજબ આપવામાં આવ્યો છે.

Q1 (પહેલું ક્વાર્ટર): 6.8%

Q2 (બીજું ક્વાર્ટર): 6.7%

Q3 (ત્રીજું ક્વાર્ટર): 7%

Q4 (ચોથું ક્વાર્ટર): 7.2%

આ પણ વાંચો-Share Market : સેન્સેક્સ 250 પોઈન્ટ ઉછળ્યો- નિફ્ટી 23,450ને પાર, RBIની પોલિસી પર બજારની નજર