Market Outlook: સપાટ બંધ થયા સેન્સેક્સ-નિફ્ટી, જાણો 17 જુલાઈએ કેવી રહેશે બજારની ચાલ

Market Outlook: 16 જુલાઈએ ભારતીય શેરબજારમાં ભારે ઉતાર-ચઢાવ વાળો માહોલ જોવા મળ્યો હતો. ટ્રેડિંગ સેશનના અંતે બેન્ચમાર્ક ઇન્ડેક્સ કોઈ મોટા ફેરફાર વગર એકદમ સપાટ બંધ રહ્યા હતા. IT અને કન્ઝ્યુમર શેરોમાં આવેલી તેજી પર બેન્કિંગ અને રિયલ્ટી સેક્ટરની નબળાઈએ પાણી ફેરવી દીધું હતું.

કારોબારીના અંતે સેન્સેક્સ 1.44 પોઈન્ટના મામૂલી વધારા સાથે 77,186.87 પર અને નિફ્ટી 5.75 પોઈન્ટ (0.02%) ના સામાન્ય ઘટાડા સાથે 24,072.75 ના સ્તરે બંધ થયો હતો. માર્કેટમાં 1947 શેરોમાં તેજી અને 2119 શેરોમાં ઘટાડો જોવા મળ્યો હતો, જ્યારે 194 શેરમાં કોઈ જ બદલાવ નહોતો થયો.

કયા શેરોમાં રહી તેજી અને કયા શેરો ગગડ્યા?

ઈન્ટરગ્લોબ એવિએશન (1.8%), વિપ્રો (1.7%), બજાજ ફાઈનાન્સ (1.6%), HCL ટેકનોલોજીસ (1.6%) અને મારુતિ સુઝુકી (1.4%) માં સૌથી વધુ તેજી જોવા મળી. જ્યારે એટરનલ (2.8%), SBI લાઈફ ઈન્શ્યોરન્સ (2.3%), ભારત ઈલેક્ટ્રોનિક્સ (0.9%), HDFC બેંક (0.8%) અને શ્રીરામ ફાઈનાન્સ (0.8%) માં મોટો ઘટાડો નોંધાયો.

સેક્ટરલ ઇન્ડેક્સની વાત કરીએ તો, નિફ્ટી કન્ઝ્યુમર ડ્યુરેબલ્સ 1.5% ના ઉછાળા સાથે સૌથી શ્રેષ્ઠ પ્રદર્શન કરનાર સેક્ટર બન્યું. આ ઉપરાંત મીડિયા (1%), IT (0.7%) અને ઓટો (0.4%) માં પણ વધારો થયો. નિફ્ટી FMCG 0.25% પ્લસમાં બંધ રહ્યો. બીજી તરફ, રિયલ્ટી સેક્ટરમાં 1% નો સૌથી વધુ ઘટાડો નોંધાયો હતો. PSU બેંક, મેટલ, પ્રાઈવેટ બેંક અને બેંક નિફ્ટીમાં 0.3% થી 0.5% સુધીનો ઘટાડો જોવા મળ્યો. બ્રોડર માર્કેટમાં નિફ્ટી મિડકેપ 100 માં 0.4% નો ઘટાડો થયો, જ્યારે સ્મોલકેપ 100 સપાટ રહ્યો હતો.

શા માટે માર્કેટમાં સુસ્તી રહી?

જિયોજિત ઈન્વેસ્ટમેન્ટ્સના હેડ ઓફ રિસર્ચ વિનોદ નાયરના જણાવ્યા મુજબ, ગ્લોબલ ટેન્શન, ક્રૂડ ઓઈલના ભાવમાં થતો ફેરફાર અને એશિયન માર્કેટની નબળાઈના કારણે રોકાણકારોએ સાવચેતીનું વલણ અપનાવ્યું છે. મોંઘવારીની ચિંતાએ ફાઈનાન્સ અને રિયલ્ટી સેક્ટર પર દબાણ બનાવ્યું. જોકે, અમેરિકામાં મોંઘવારી દર આશા કરતા ઓછો આવતા બજારને થોડી રાહત મળી છે. હવે બજારની નજર આગામી કંપનીઓના પરિણામો અને ચોમાસાની સ્થિતિ પર રહેશે.

17 જુલાઈએ નિફ્ટી અને બેંક નિફ્ટીની ચાલ કેવી રહેશે?

LKP સિક્યોરિટીઝના ટેકનિકલ એનાલિસ્ટ વત્સલ ભુવા અને SBI સિક્યોરિટીઝના રિસર્ચ હેડ સુદીપ શાહના મતે માર્કેટ હાલ કોન્સોલિડેશન (એક જ રેન્જમાં) માં છે. ટેકનિકલ રીતે નિફ્ટી માટે 23,950 થી 24,000નો ઝોન મજબૂત સપોર્ટ (ટેકો) છે. જો ઇન્ડેક્સ 23,930 ની નીચે જાય છે તો પ્રોફિટ બુકિંગ વધી શકે છે અને નિફ્ટી 23,780 સુધી ગગડી શકે છે. ઉપરની તરફ, 24,160 થી 24,300 નો ઝોન મોટો અવરોધ છે. આ લેવલ પાર કર્યા પછી જ બજારમાં નવી તેજી જોવા મળશે.

બેંક નિફ્ટીની સ્થિતિ

બેંક નિફ્ટી ડેઈલી ચાર્ટ પર અનિશ્ચિતતા દર્શાવી રહ્યો છે. તેના માટે 56,800 થી 57,000 નો ઝોન સપોર્ટ છે, જ્યારે 58,200 નું લેવલ રેઝિસ્ટન્સનું કામ કરશે.

આ પણ વાંચો-Wipro Q1 Results: વિપ્રોને 3352 કરોડનો બમ્પર નફો, રેવેન્યુ 10% વધ્યું, જાણો ડિવિડન્ડ અને બાયબેકની સંપૂર્ણ માહિતી

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.