Market Outlook: સામાન્ય વધારા સાથે સેન્સેક્સ-નિફ્ટી બંધ, જાણો 31 જુલાઈએ કેવી રહેશે બજારની ચાલ

Market Outlook: ભારતીય શેરબજારમાં 30 જુલાઈના રોજ ભારે ઉતાર-ચઢાવ વાળો માહોલ રહ્યો હતો. જોકે, કારોબારના અંતે મુખ્ય ઇન્ડેક્સ મામૂલી તેજી સાથે લીલા નિશાનમાં બંધ થવામાં સફળ રહ્યા હતા. ખાસ વાત એ છે કે નિફ્ટી 24,300 ના મહત્વના સ્તરની ઉપર ટકી રહ્યો છે.

સેન્સેક્સ 273.55 પોઈન્ટ (0.35%) ના વધારા સાથે 77,928.15 પર બંધ થયો. નિફ્ટી 66.95 પોઈન્ટ (0.28%) ના સુધારા સાથે 24,317.15 ની સપાટીએ બંધ રહ્યો. બજારમાં મુખ્ય ઇન્ડેક્સ વધ્યા હોવા છતાં માર્કેટ બ્રેથ નબળી જોવા મળી હતી. આખા દિવસ દરમિયાન 1620 શેરોમાં તેજી આવી, જ્યારે 2408 શેરોમાં ઘટાડો નોંધાયો અને 188 શેરોના ભાવમાં કોઈ ફેરફાર થયો ન હતો.

આજના ટોપ ગેનર્સ અને લૂઝર્સ

નિફ્ટીમાં સૌથી વધુ તેજી મહિન્દ્રા એન્ડ મહિન્દ્રા, આઈશર મોટર્સ, મારુતિ સુઝુકી, કોલ ઇન્ડિયા અને ટેક મહિન્દ્રાના શેરમાં જોવા મળી હતી. બીજી તરફ અદાણી પોર્ટ્સ, શ્રીરામ ફાઇનાન્સ, HDFC લાઈફ, અલ્ટ્રાટેક સિમેન્ટ અને જિયો ફાઇનાન્સિયલના શેરોમાં ભારે વેચવાલી રહી હતી.

સેક્ટરની વાત કરીએ તો આજે ઓટો શેરોમાં ધૂમ મચી હતી. નિફ્ટી ઓટો ઇન્ડેક્સ સૌથી વધુ 1.6% ઉછળ્યો હતો. જ્યારે રિયલ્ટી સેક્ટરમાં 2% નો મોટો ઘટાડો નોંધાયો હતો. બ્રોડર માર્કેટમાં પણ દબાણ જોવા મળ્યું છે. નિફ્ટી મિડકેપ ઇન્ડેક્સ 0.4% અને સ્મોલકેપ ઇન્ડેક્સ 0.6% તૂટીને બંધ થયા છે.

ગ્લોબલ અને સ્થાનિક પરિબળોની અસર

જિયોજિત ઇન્વેસ્ટમેન્ટ્સના હેડ ઓફ રિસર્ચ, વિનોદ નાયરના જણાવ્યા મુજબ, યુએસ ફેડરલ રિઝર્વે વ્યાજદરમાં કોઈ ફેરફાર કર્યો નથી, પરંતુ મોંઘવારી અંગે તેમનું વલણ હજુ પણ કડક છે. યુએસ બોન્ડ યીલ્ડ વધવાને કારણે અને મિડલ ઈસ્ટમાં તણાવ વચ્ચે ક્રૂડ ઓઈલમાં થતા ઉતાર-ચઢાવને લીધે વૈશ્વિક રોકાણકારો સાવચેત છે. આમ છતાં, ભારતીય બજારમાં FIIની ખરીદી, મજબૂત રૂપિયો અને કંપનીઓના સારા Q1 પરિણામોને કારણે રોકાણકારોએ ઘટાડા પર સારા શેરોમાં ખરીદી કરી છે.

31 જુલાઈ માટે નિફ્ટી આઉટલુક

કોટક સિક્યોરિટીઝના હેડ ઇક્વિટી રિસર્ચ શ્રીકાંત ચૌહાણનું કહેવું છે કે, ટેકનિકલ નજરે જોઈએ તો સુસ્ત શરૂઆત છતાં બજાર આખો દિવસ 20-ડે SMA (સિમ્પલ મૂવિંગ એવરેજ) ની ઉપર રહ્યું છે, જે એક સારો સંકેત છે. ડેઇલી ચાર્ટ પર બુલિશ કેન્ડલ બની છે. ટ્રેન્ડ ફોલો કરનારા ટ્રેડર્સ માટે હવે નિફ્ટીમાં 24,200 નું લેવલ એક મજબૂત સપોર્ટ તરીકે કામ કરશે. જો નિફ્ટી આની ઉપર ટકી રહેશે, તો તેજી 24,450 થી 24,500 સુધી જઈ શકે છે. જો નિફ્ટી 24,200 ની નીચે જાય, તો ટ્રેડર્સે પોતાની લોંગ પોઝિશન કાપી લેવી જોઈએ.

31 જુલાઈ માટે બેંક નિફ્ટી આઉટલુક

LKP સિક્યોરિટીઝના ટેકનિકલ એનાલિસ્ટ વત્સલ ભુવાના મતે, બેંક નિફ્ટી હાલમાં એક 'કન્જેશન ઝોન' માં ફસાયેલો છે. બેંક નિફ્ટીને નીચેની તરફ 56,500ના લેવલ પર મજબૂત સપોર્ટ છે (જે 50-DMA પાસે છે). જ્યારે ઉપરની તરફ 57,500 ની પાસે (200-DMA) મોટો અવરોધ છે. જ્યાં સુધી કોઈ સ્પષ્ટ બ્રેકઆઉટ ન મળે ત્યાં સુધી આ ઇન્ડેક્સમાં લેવલ-બેઝ્ડ ટ્રેડિંગ કરવું હિતાવહ છે. રોકાણકારો સપોર્ટ ઝોન પાસે ખરીદી અને રેઝિસ્ટન્સ ઝોન પાસે નફો બુક કરવાની રણનીતિ અપનાવી શકે છે.

આ પણ વાંચો-Bajaj Finance Q1 Results: બજાજ ફાઇનાન્સનો નફો 27% ઉછળીને 5986 કરોડને પાર, AUMમાં પણ જબરદસ્ત વધારો

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.