Closing Bell : ઉતાર-ચઢાવ વચ્ચે સેન્સેક્સ 238 પોઈન્ટ ઉછળ્યો, નિફ્ટી 23,950ને પાર- રિયલ્ટી શેરોમાં શાનદાર તેજી

Closing Bell : 9 જુલાઈએ ભારતીય શેરબજારમાં દિવસભર ભારે ઉતાર-ચઢાવ જોવા મળ્યો હતો. જોકે, દિવસના અંતે માર્કેટ ગ્રીન ઝોનમાં (પોઝિટિવ) બંધ થવામાં સફળ રહ્યું. આજના ટ્રેડિંગ સેશનમાં ખરીદદારોનો દબદબો રહ્યો, જેના કારણે નિફ્ટીએ શાનદાર રિકવરી બતાવીને 23,950 ની મહત્વની સપાટી વટાવી દીધી છે, જ્યારે સેન્સેક્સમાં પણ સારો એવો ઉછાળો નોંધાયો છે.

માર્કેટના આંકડા પર એક નજર

બજાર બંધ થવાના સમયે મુખ્ય ઈન્ડેક્સની સ્થિતિ આ મુજબ રહી..સેન્સેક્સ 238.22 પોઈન્ટ (લગભગ 0.31%) ના વધારા સાથે 76,741.82 પર બંધ થયો. નિફ્ટી 50, 80.75 પોઈન્ટ (લગભગ 0.34%) ઉછળીને 23,962.80 ના સ્તરે બંધ થયો. માર્કેટ બ્રેડ્થ પણ આજે ખૂબ જ સારી રહી. એકંદરે બજારમાં તેજીનો જ માહોલ હતો. BSE પર કુલ ટ્રેડ થયેલા શેરોમાંથી 2793 શેરોમાં ખરીદી જોવા મળી હતી. જ્યારે તેની સામે માત્ર 1263 શેરો લાલ નિશાનમાં બંધ થયા હતા અને 167 શેરોના ભાવમાં કોઈ જ ફેરફાર નોંધાયો ન હતો.

કયા શેરોએ કરી કમાણી અને કયા શેરો ગગડ્યા?

ટોપ ગેનર્સ શેર્સ

આજે સૌથી વધુ ફાયદો સન ફાર્માના રોકાણકારોને થયો છે, આ શેર સૌથી વધુ 2.6% ઉછળ્યો. ત્યારબાદ ભારતી એરટેલ 2.2%, ઈન્ટરગ્લોબ એવિએશન 2%, કોટક મહિન્દ્રા બેન્ક 1.9% અને ઈટર્નલના શેરમાં 2% નો વધારો જોવા મળ્યો છે.

ટોપ લૂઝર્સ શેર્સ

બીજી તરફ ફાર્મા સેક્ટરની જ અન્ય એક કંપની ડૉ. રેડ્ડીઝ લેબોરેટરીઝનો શેર સૌથી વધુ 5.9% ગગડ્યો હતો. આ ઉપરાંત આઈટી અને ઓટો શેરોમાં વેચવાલી આવતા ઈન્ફોસિસમાં 1.7%, મારુતિ સુઝુકીમાં 1.6%, NTPC માં 1.4% અને ONGC માં 1.3% નો ઘટાડો નોંધાયો છે.

સેક્ટરલ પરફોર્મન્સ: રિયલ્ટી સેક્ટરે ડંકો વગાડ્યો

આજના દિવસે મોટાભાગના સેક્ટરમાં પોઝિટિવ ટ્રેન્ડ રહ્યો. ખાસ કરીને રિયલ્ટી સેક્ટરે બજારની આખી રેલીને લીડ કરી હતી. નિફ્ટી રિયલ્ટી ઈન્ડેક્સ સૌથી વધુ 3.5% ભાગ્યો હતો. આ ઉપરાંત નિફ્ટી મીડિયા 2%, નિફ્ટી PSU બેન્ક 1.6% અને નિફ્ટી કન્ઝ્યુમર ડ્યુરેબલ્સ ઈન્ડેક્સ 1.6% ઉછળ્યા હતા. જોકે, તેની સામે નિફ્ટી આઈટીમાં 0.47% અને નિફ્ટી ઓટો સેક્ટરમાં 0.25% ની મામૂલી નબળાઈ જોવા મળી હતી.

નાના શેરોમાં જામી રોનક

મોટા શેરોની સાથે સાથે નાના શેરોમાં પણ રોકાણકારોએ દિલ ખોલીને પૈસા લગાવ્યા છે. બ્રોડર માર્કેટને સારો સપોર્ટ મળ્યો છે. આ જ કારણ છે કે નિફ્ટી મિડકેપ ઈન્ડેક્સ 1.4% અને સ્મોલકેપ ઈન્ડેક્સ 1.8% ના શાનદાર વધારા સાથે બંધ થયા છે.

આ પણ વાંચો-Trading Strategy : શેરબજારમાં 'બુલ્સ' ની શાનદાર વાપસી, અનુજ સિંઘલ પાસેથી જાણો નિફ્ટી-બેન્ક નિફ્ટીની ટ્રેડિંગ સ્ટ્રેટેજી