Share Market: સેન્સેક્સમાં 1384 પોઈન્ટનો તોતિંગ ઉછાળો, માત્ર 5 સેકન્ડમાં રોકાણકારોના 7 લાખ કરોડ વધ્યા- જાણો તેજી પાછળના 3 મોટા કારણો

Share Market: ભારતીય શેરબજાર માટે આજનો દિવસ ઐતિહાસિક સાબિત થઈ રહ્યો છે. બુધવારે બજાર ખુલતાની સાથે જ સેન્સેક્સ અને નિફ્ટીમાં રોકેટ ગતિએ તેજી જોવા મળી છે. માર્કેટમાં આવેલી આ સુનામી જેવી તેજીને કારણે રોકાણકારો માલામાલ થઈ ગયા છે. શરૂઆતી કારોબારમાં જ રોકાણકારોની સંપત્તિમાં 7 લાખ કરોડથી વધુનો જંગી વધારો નોંધાયો છે. ખાસ વાત એ છે કે આજે બજારમાં મીડકેપ અને સ્મોલકેપ સહિત તમામ સેક્ટરના શેર ગ્રીન ઝોનમાં ટ્રેડ થઈ રહ્યા છે.

આંકડામાં સમજો બજારની સ્થિતિ

હાલના ટ્રેન્ડ મુજબ, બીએસઈ સેન્સેક્સ (BSE Sensex) 1384.40 પોઈન્ટ અથવા 1.80% ના વધારા સાથે 78,231.97 પર પહોંચ્યો છે. જ્યારે નિફ્ટી 50 (Nifty 50) 410.55 પોઈન્ટ અથવા 1.72% ના ઉછાળા સાથે 24,253.20 ના સ્તર પર કારોબાર કરી રહ્યો છે.

શા માટે માર્કેટમાં આવી તેજી? (3 મુખ્ય કારણો)

US-ઈરાન શાંતિ મંત્રણા: અમેરિકા અને ઈરાન વચ્ચે ફરીથી શાંતિ વાર્તા શરૂ થવાની આશાએ વિશ્વભરના બજારોમાં ઉત્સાહ ભરી દીધો છે. આ સમાચારથી રોકાણકારોમાં પોઝિટિવ સેન્ટિમેન્ટ બન્યું છે.

ક્રૂડ ઓઈલના ભાવમાં ઘટાડો: શાંતિ મંત્રણાના સંકેતો વચ્ચે આંતરરાષ્ટ્રીય બજારમાં કાચા તેલ (Crude Oil) ના ભાવ સતત બીજા દિવસે ઘટ્યા છે. તેલ સસ્તું થવાથી ભારત જેવા દેશોની અર્થવ્યવસ્થાને મોટો ફાયદો થાય છે.

સપ્લાય ચાલુ રહેવાની આશા: મિડલ ઈસ્ટના મુખ્ય તેલ ઉત્પાદક દેશોમાંથી સપ્લાયમાં કોઈ અવરોધ નહીં આવે તેવી આશાએ બજારમાં જોશ વધાર્યું છે.

રોકાણકારોની સંપત્તિમાં 7.53 લાખ કરોડનો ઉછાળો

બજારની આ તેજીમાં રોકાણકારોની સંપત્તિમાં પણ જંગી વધારો થયો છે. 13 એપ્રિલ 2026 ના રોજ બીએસઈ પર લિસ્ટેડ તમામ કંપનીઓનું માર્કેટ કેપ 4,49,13,555.17 કરોડ હતું, જે આજે એટલે કે 15 એપ્રિલ 2026 ના રોજ વધીને 4,56,66,776.16 કરોડ પર પહોંચી ગયું છે. એટલે કે માત્ર ગણતરીની મિનિટોમાં રોકાણકારોની સંપત્તિમાં 7,53,220.99 કરોડનો વધારો થયો છે.

સેન્સેક્સના તમામ 30 શેર ગ્રીન ઝોનમાં

આજની તેજી એટલી મજબૂત છે કે સેન્સેક્સના તમામ 30 બ્લુચિપ શેર લીલા નિશાનમાં ટ્રેડ થઈ રહ્યા છે. બજારમાં કુલ 2949 શેરોમાં ટ્રેડિંગ થઈ રહ્યું છે, જેમાંથી 2388 શેર મજબૂતી સાથે વધી રહ્યા છે, જ્યારે માત્ર 403 શેરમાં ઘટાડો જોવા મળ્યો છે. 69 શેર એક વર્ષની સૌથી ઉંચી સપાટી (52-week High) પર પહોંચ્યા છે. 103 શેરમાં અપર સર્કિટ લાગી છે. માત્ર 15 શેર એવા છે જે એક વર્ષના નીચલા સ્તરે છે.

ડિસ્ક્લેમર: અહીં આપેલી માહિતી સ્ટોક પર્ફોમન્સ પર આધારિત છે. એ નોંધવું અગત્યનું છે કે બજારમાં રોકાણ બજારના જોખમોને આધીન છે. રોકાણકાર તરીકે, પૈસાનું રોકાણ કરતા પહેલા હંમેશા નિષ્ણાતની સલાહ લો. મનીકંટ્રોલ ક્યારેય કોઈને અહીં પૈસા રોકવાની સલાહ આપતું નથી.

આ પણ વાંચો-Market Today: ગિફ્ટ નિફ્ટીમાં 340 પોઈન્ટનો જંગી ઉછાળો, શું આજે શેરબજારમાં આવશે મોટી તેજી? કોઈ પણ ટ્રેડ લેતા પહેલા વાંચો આ લેટેસ્ટ અપડેટ્સ