Share Market Crash: US-Iran યુદ્ધની દહેશતથી શેરબજારમાં કડાકો, સેન્સેક્સ 494 પોઈન્ટ ગગડ્યો, નિફ્ટી 23800ની નીચે, જાણો 5 મોટા કારણો

Share Market Crash: અમેરિકા અને ઈરાન વચ્ચે વધી રહેલા ભૌગોલિક તણાવની સીધી અસર આજે ભારતીય શેરબજાર પર જોવા મળી છે. અઠવાડિયાના પહેલા કારોબારી દિવસે એટલે કે આજે 7 સપ્ટેમ્બરના રોજ માર્કેટમાં વેચવાલીનું એવું ભારે દબાણ આવ્યું કે સેન્સેક્સ 494 પોઈન્ટ્સ તૂટી ગયો અને નિફ્ટી પણ 23800ના લેવલની નીચે સરકી ગયો. અમેરિકા અને ઈરાન વચ્ચે યુદ્ધ જેવી સ્થિતિ અને અન્ય 5 મોટા કારણોએ આજે માર્કેટનું સેન્ટિમેન્ટ બગાડી નાખ્યું છે.

બજારની તાજેતરની સ્થિતિ

બ્રોડર લેવલ પર બજારમાં મિશ્ર વલણ જોવા મળ્યું છે. સ્મોલકેપ શેરોમાં થોડી ખરીદી છે, પરંતુ નિફ્ટી મિડકેપ 100 માં ઘટાડો નોંધાયો છે. બપોરે 12.39 વાગ્યાના લેટેસ્ટ ડેટા મુજબ:

સેન્સેક્સ: 458.22 પોઈન્ટ્સ (0.60%) ના ઘટાડા સાથે 76,057.21 પર ટ્રેડ કરી રહ્યો હતો. ઈન્ટ્રા-ડે માં તે 493.87 પોઈન્ટ્સ તૂટીને 76,021.56 ના નીચલા સ્તરે ગયો હતો.

શેરબજારમાં કડાકા પાછળના 5 મુખ્ય કારણો

બજારમાં આવેલા આજના આ ઘટાડા પાછળ મુખ્યત્વે 5 કારણો જવાબદાર છે, જે નીચે મુજબ છે:

1. ક્રૂડ ઓઈલના ભાવમાં ભડકો

અમેરિકા અને ઈરાન વચ્ચે વધેલા તણાવને કારણે ક્રૂડ ઓઈલ (કાચું તેલ) ફરી ઉકળી ગયું છે. ગ્લોબલ ઓઈલ બેન્ચમાર્ક બ્રેન્ટ ક્રૂડ ફ્યુચર્સ ઉછળીને પ્રતિ બેરલ $97 ની નજીક પહોંચી ગયું છે, જેણે બજાર પર મોટું દબાણ બનાવ્યું. રિપોર્ટ્સ મુજબ, ઈરાને અમેરિકી નૌકાદળના 2 જહાજો પર બેલિસ્ટિક મિસાઈલો છોડી છે, જેના જવાબમાં અમેરિકાએ પણ શનિવારે ઈરાનના 3 ટેન્કરો પર હુમલો કર્યો હતો.

2. વિદેશી રોકાણકારોની સતત વેચવાલી

વિદેશી રોકાણકારો સતત ભારતીય બજારમાંથી પૈસા ખેંચી રહ્યા છે. શુક્રવારે 4 સપ્ટેમ્બરે FIIs એ સળંગ બીજા કારોબારી દિવસે નેટ વેચવાલી કરી હતી. આંકડાઓ પર નજર કરીએ તો, શુક્રવારે ₹3111.94 કરોડ અને ગુરુવારે ₹2345.87 કરોડના શેરો વેચવામાં આવ્યા હતા.

3. India VIX માં મોટો ઉછાળો

માર્કેટમાં રોકાણકારોનો ડર અને ગભરાટ માપતા ‘ઈન્ડિયા વિક્સ'માં મોટો ઉછાળો આવ્યો છે. હાલમાં તે 5.22%ના વધારા સાથે 11.24 પર પહોંચી ગયો છે. વિક્સ વધવાનો સીધો અર્થ એ છે કે શોર્ટ ટર્મમાં બજારમાં વોલેટિલિટી વધવાની આશંકા છે.

4. IT, મેટલ અને PSU બેન્ક શેરોમાં ધોવાણ

આજે માર્કેટમાં IT અને મેટલ કંપનીઓની સાથે સરકારી બેંકોના શેરોએ માર્કેટને નીચે ખેંચવામાં મોટો ભાગ ભજવ્યો. નિફ્ટી IT લગભગ 2% તૂટ્યો છે, જ્યારે નિફ્ટી મેટલ અને નિફ્ટી PSU બેન્ક ઈન્ડેક્સમાં પણ 1% થી વધુનો ઘટાડો નોંધાયો છે.

5. ટેકનિકલ આઉટલુક

જીઓજીત ઈન્વેસ્ટમેન્ટ્સના ચીફ માર્કેટ સ્ટ્રેટેજિસ્ટ આનંદ જેમ્સના જણાવ્યા અનુસાર, નિફ્ટી 23800 ની ઉપર ફરીથી રિકવર થવાનો પ્રયાસ કરી શકે છે. પરંતુ ઉપરની તરફ 24,150 થી 24,215 નો ઝોન એક મોટી અડચણ છે. જો નિફ્ટી નીચેની તરફ 23800નું લેવલ તોડશે, તો તેમાં વધુ ઘટાડો જોવા મળી શકે છે અને તેનો પહેલો ટાર્ગેટ 23570 બની શકે છે. ગ્લોબલ માર્કેટના ખરાબ સંકેતો અને ખાસ કરીને અમેરિકા-ઈરાન યુદ્ધના ભણકારા વચ્ચે રોકાણકારોએ અત્યારે સાવચેતીપૂર્વક કામ લેવાની જરૂર છે.

આ પણ વાંચો- EPFO Update: શું તમારું પણ PF ટ્રાન્સફર અટકી ગયું છે? UAN પોર્ટલ પર માત્ર 5 મિનિટમાં જાતે જ અપડેટ કરો ‘Date of Exit’

(ડિસ્ક્લેમર: મનીકંટ્રોલ પર આપવામાં આવેલી સલાહ કે વિચારો એક્સપર્ટ્સ અથવા બ્રોકરેજ ફર્મના પોતાના અંગત વિચારો છે. આ માટે વેબસાઈટ કે મેનેજમેન્ટ જવાબદાર નથી. કોઈપણ રોકાણ કરતા પહેલા હંમેશા સર્ટિફાઈડ એક્સપર્ટની સલાહ લેવી હિતાવહ છે.)