Share Market: શેરબજારમાં ફરી તેજીનો માહોલ, સેન્સેક્સમાં 600 પોઈન્ટનો ઉછાળો, જાણો માર્કેટનું મૂડ બદલાવા પાછળના 4 મોટા કારણો

Stock Market Rally: એક દિવસના ભારે કડાકા બાદ ભારતીય શેરબજારમાં 10 માર્ચે શાનદાર રિકવરી જોવા મળી છે. રોકાણકારોનો ભરોસો પાછો ફરતા બજારમાં ફરીથી ખરીદીનો માહોલ જોવા મળ્યો હતો. શરૂઆતના કારોબારમાં જ સેન્સેક્સ 809 પોઈન્ટના મોટા ઉછાળા સાથે 78,375.73 ના સ્તર પર પહોંચી ગયો હતો. તો બીજી તરફ નિફ્ટી પણ 252 પોઈન્ટની છલાંગ લગાવીને 24,280.80 પર ટ્રેડ કરી રહ્યો હતો. જોકે, દિવસ વધવાની સાથે ઉપલા સ્તરેથી માર્કેટમાં થોડો ઘટાડો નોંધાયો હતો.

સવારે 10:44 વાગ્યાની આસપાસ સેન્સેક્સ 623.88 પોઈન્ટ (0.8 ટકા) ના વધારા સાથે 78,190.03 પર અને નિફ્ટી 196.21 પોઈન્ટ (0.82 ટકા) ના ઉછાળા સાથે 24,224.40 ના સ્તર પર કારોબાર કરી રહ્યો હતો. આજના ટ્રેડિંગ સેશનમાં આઈટી (IT) અને ઓઈલ એન્ડ ગેસ સેક્ટરને બાદ કરતા તમામ સેક્ટર ગ્રીન ઝોનમાં જોવા મળ્યા હતા. નિફ્ટી મિડકેપ 100 અને સ્મોલકેપ 100 ઈન્ડેક્સમાં પણ 1.5 ટકા જેટલો વધારો જોવા મળ્યો હતો.

માર્કેટ એક્સપર્ટ્સના મતે, શેરબજારમાં આજે પાછી ફરેલી આ તેજી પાછળ મુખ્ય 4 કારણો જવાબદાર છે:

1. ક્રૂડ ઓઈલના ભાવમાં મોટો ઘટાડો

ટ્રમ્પે સંકેત આપ્યો હતો કે ઈરાન સાથેનું યુદ્ધ ટૂંક સમયમાં સમાપ્ત થઈ શકે છે. સાથે જ રશિયાના રાષ્ટ્રપતિ વ્લાદિમીર પુતિને પણ ટ્રમ્પ સાથે ફોન પર વાત કરીને યુદ્ધ રોકવા માટે કેટલાક પ્રસ્તાવ મૂક્યા હતા. આ સમાચારોથી તેલના સપ્લાયની ચિંતા દૂર થઈ છે. જોકે, હોર્મુઝ સ્ટ્રેટ (જ્યાંથી ભારત 40% તેલની આયાત કરે છે) જો બ્લોક થાય તો ફરીથી જોખમ વધી શકે છે.

2. ગ્લોબલ માર્કેટમાંથી મળ્યા મજબૂત સંકેતો

અમેરિકન અને એશિયન બજારોમાંથી મળેલા પોઝિટિવ સંકેતોએ પણ ભારતીય રોકાણકારોનો ઉત્સાહ વધાર્યો છે. ટ્રમ્પના નિવેદન પછી અમેરિકાનું નેસ્ડેક ઈન્ડેક્સ 308 પોઈન્ટ (1.4%) ઉછળીને 22,695 પર બંધ થયું. આ ઉપરાંત S&P 500 અને ડાઉ જોન્સમાં પણ સારો વધારો નોંધાયો હતો. એશિયન બજારોની વાત કરીએ તો, સાઉથ કોરિયાનો કોસ્પી ઈન્ડેક્સ 5 ટકા ઉછળ્યો અને જાપાનનો નિક્કેઈ 2.5 ટકાના વધારા સાથે જોવા મળ્યો હતો. ચીન અને હોંગકોંગના બજારો પણ ગ્રીન ઝોનમાં હતા.

3. ભારતીય રૂપિયામાં મજબૂતી

ક્રૂડ ઓઈલ સસ્તું થવાથી ભારતીય રૂપિયાને મોટો સપોર્ટ મળ્યો છે. સોમવારે રૂપિયો 92.35 પ્રતિ ડોલરના ઐતિહાસિક તળિયે પહોંચી ગયો હતો. પરંતુ 10 માર્ચે મંગળવારે તેમાં 40 પૈસાનો સુધારો જોવા મળ્યો અને તે 91.93 પ્રતિ ડોલર પર ટ્રેડ થવા લાગ્યો. રૂપિયાની આ રિકવરીથી રોકાણકારોની ચિંતા હળવી થઈ છે.

4. માર્કેટની અસ્થિરતા (VIX)માં ઘટાડો

માર્કેટમાં ડરનો માહોલ દર્શાવતો ઈન્ડિયા VIX (ફિયર ઈન્ડેક્સ) મંગળવારે 13 ટકા ઘટીને 20.34 ના સ્તર પર આવી ગયો. આ ઈન્ડેક્સનું ઘટવું એ વાતનો સંકેત છે કે બજારમાં હવે અસ્થિરતા ઓછી થઈ રહી છે અને રોકાણકારો ફરીથી જોખમ લેવા માટે તૈયાર થઈ રહ્યા છે.

ટેકનિકલ ચાર્ટ શું કહે છે?

જિયોજિત ઈન્વેસ્ટમેન્ટ્સના ચીફ માર્કેટ સ્ટ્રેટેજિસ્ટ આનંદ જેમ્સના જણાવ્યા અનુસાર, નિફ્ટીનું 24,000ની ઉપર ટકવું એ તેજીનો સારો સંકેત છે. જોકે, હાલમાં માર્કેટ 24,300થી 24,370ની વચ્ચે થોડું અટકી શકે છે. જો નિફ્ટી આ લેવલને મજબૂતીથી પાર કરી લેશે, તો બજાર માટે આગામી ટાર્ગેટ 25,000નો બની શકે છે.

આ પણ વાંચો- અમેરિકા-ઈરાન યુદ્ધ અંતિમ ચરણમાં: ડોનાલ્ડ ટ્રમ્પે સ્ટ્રેટ ઓફ હોર્મુઝ પર કબજો કરવાનો આપ્યો સંકેત, ઈરાનની 80% મિસાઈલ સિસ્ટમ નષ્ટ

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.