Skyroot 18 નવેમ્બરે લોન્ચ કરશે ભારતનું પહેલું પ્રાઈવેટ રોકેટ, જાણો બનાવનાર IIT એન્જિનિયર્સની કહાની

પવન કુમાર ચાંદના અને નાગા ભરત ડાકાએ પોતાનું સ્ટાર્ટઅપ શરૂ કરવા માટે Indian Space Research Organisation (ISRO)માં તેમની નોકરી છોડવાનો નિર્ણય કર્યો, ત્યારે તેમનું ભવિષ્ય અંધકારમય હતું. IITના પૂર્વ વિદ્યાર્થી ચાંદના અને ડાકાએ 2018માં સ્પેસ સ્ટાર્ટઅપ Skyroot Aerospaceની શરૂઆત કરી હતી. તે સમયે ભારતમાં અવકાશ ક્ષેત્રે ભાગ્યે જ કોઈ ખાનગી કંપની હતી.

શરૂઆતના ચાર વર્ષ પછી,આ સ્ટાર્ટઅપ 18 નવેમ્બરે તેનું પ્રથમ ખાનગી રોકેટ લોન્ચ કરવા માટે તૈયાર છે. તેને વિક્રમ-એસ નામ આપવામાં આવ્યું છે. તેને આંધ્રપ્રદેશના શ્રીહરિકોટા સ્થિત સતીશ ધવન સ્પેસ સેન્ટરથી લોન્ચ કરવામાં આવશે. અવકાશ ક્ષેત્રે ભારતની આ એક મોટી ઉપલબ્ધિ હશે.

તેને મિશન પ્રારંભ નામ આપવામાં આવ્યું છે. આ એલોન મસ્કના સ્પેસએક્સના પ્રથમ ખાનગી રોકેટના લોન્ચિંગ જેવું જ છે. ભારતનો અવકાશ કાર્યક્રમ વિશ્વમાં ખૂબ જ અદ્યતન માનવામાં આવે છે. પરંતુ, આ ક્ષેત્રમાં ખાનગી કંપનીઓની હાજરી નહિવત રહી છે.

32 વર્ષીય ચંદનાએ કહ્યું કે, રોકેટરી પ્રત્યેનો તેમનો પ્રેમ IIT-ખડગપુરમાં અભ્યાસ દરમિયાન શરૂ થયો હતો. અમે હંમેશા ISRO લોન્ચ જોતા હતા. એક મિકેનિકલ એન્જિનિયરિંગના વિદ્યાર્થી તરીકે, મને તે ખૂબ જ આકર્ષક લાગ્યું, તેમણે કહ્યું કે, તેમના માસ્ટર્સ અભ્યાસ દરમિયાન, તેમણે ISROના એક પ્રોજેક્ટ પર કામ કર્યું. તેઓ IITના ક્રાયોજેનિક એન્જિનિયરિંગ સેન્ટરમાં ISRO સાથે પણ નજીકથી સંકળાયેલા હતા.

સ્કાયરૂટ શરૂ કર્યા પછી ભંડોળ ઊભું કરવું એક સમસ્યા હતી. તેણે કહ્યું કે, તમે રોકેટ કંપની બનાવવા માટે તમારી બધી મૂડીનો ઉપયોગ કરી શકતા નથી. ત્યારબાદ તેઓ Myntraના સ્થાપક મુકેશ બંસલને મળ્યા. તેઓ Cult.fitના CEO છે. તેણે રોકાણમાં રસ દાખવ્યો અને બાદમાં, સ્કાયરૂટે અન્ય રોકાણકારો પાસેથી પણ મૂડી એકત્ર કરી.

હવે ચાંદના અને ડાકા પ્રક્ષેપણને સફળ બનાવવા પર નજર રાખી રહ્યા છે. ચંદનાએ કહ્યું, અમે ક્યારેય વિચાર્યું ન હતું કે આટલી મોટી ઘટના બની જશે. તેઓ 18મી નવેમ્બરને લઈને ખૂબ જ ઉત્સાહિત છે. તેઓ પ્રથમ પ્રક્ષેપણના ભાવિથી વાકેફ છે. તેમણે કહ્યું કે, રોકેટનો નાશ કરવાના ઘણા ઉદાહરણો છે. નાસા અને ઈસરોના પ્રારંભિક પ્રક્ષેપણ પણ નિષ્ફળ ગયા હતા. મસ્કનું સ્પેસએક્સ પણ ત્રણ નિષ્ફળતા બાદ જ ફાલ્કન 1ને અવકાશમાં મોકલવામાં સફળ રહ્યું હતું.