BMCમાં અજિત પવારનો મોટો દાવ, શિંદે સેના સાથે હાથ મિલાવશે? જાણો મુંબઈના રાજકારણમાં શું રંધાઈ રહ્યું છે

Mumbai Politics Update: મુંબઈના રાજકારણમાં ફરી એકવાર ગરમાવો આવી ગયો છે. બૃહન્મુંબઈ મહાનગરપાલિકા (BMC)માં સત્તા કબજે કરવા માટે અત્યારે અંદરખાને જોરદાર ખેલ ચાલી રહ્યો છે. અત્યાર સુધી જે ચર્ચાઓ માત્ર અટકળો હતી, તે હવે હકીકત બનવા જઈ રહી હોય તેવું લાગે છે. અજિત પવારની NCP હવે BMCમાં પોતાની રણનીતિ બદલી રહી છે અને મહાયુતિમાં નવા સમીકરણો રચાઈ રહ્યા છે.

અજિત પવાર અને શિંદે જૂથ વચ્ચે સાંઝુ જોડાણ?

સૌથી મોટા સમાચાર એ છે કે મુંબઈ મહાનગરપાલિકામાં અજિત પવાર જૂથના જે 3 નગરસેવકો ચૂંટાઈ આવ્યા છે, તેઓ હવે એકલા રહેવાને બદલે શિવસેના (શિંદે જૂથ) સાથે હાથ મિલાવી શકે છે. રાજકીય વર્તુળોમાં ચાલી રહેલી જોરદાર ચર્ચા મુજબ, આ ત્રણેય નગરસેવકો શિંદે સેના સાથે મળીને એક સંયુક્ત જૂથ અથવા જેને આપણે સાંઝુ કહીએ છીએ, તે રજીસ્ટર કરાવવાની તૈયારીમાં છે.

આ નિર્ણય માત્ર એક સામાન્ય ગઠબંધન નથી, પણ મહાયુતિની અંદર સત્તાના તાલમેલ માટે લેવાયેલું એક મોટું પગલું માનવામાં આવે છે.

બીજી તરફ, ભાજપ આ આખી રમતમાં થોડું અલગ વિચારી રહ્યું હોય તેવું લાગે છે. પ્રાપ્ત વિગતો મુજબ, BMCમાં ભાજપ કોઈની સાથે મર્જ થવાને બદલે પોતાનું એક સ્વતંત્ર જૂથ બનાવવાની વિચારણા કરી રહ્યું છે. આનો સીધો અર્થ એ થયો કે મહાયુતિના ત્રણેય મુખ્ય પક્ષો - ભાજપ, શિવસેના (શિંદે જૂથ) અને NCP (અજિત પવાર) - કદાચ કાગળ પર અલગ-અલગ નોંધણી કરાવશે. પરંતુ જ્યારે સત્તા ચલાવવાની વાત આવશે અથવા કોઈ પણ નિર્ણય લેવાનો હશે, ત્યારે તેઓ એકબીજા સાથે ખભેખભા મિલાવીને ચાલશે. એટલે કે, જુદા દેખાઈએ પણ સાથે રહીએ તેવી આ રણનીતિ છે.

આજે થઈ શકે છે મોટી જાહેરાત

આજનો દિવસ મુંબઈના રાજકારણ માટે ખૂબ મહત્વનો છે. આજે BMCમાં પક્ષોની નોંધણી પ્રક્રિયા હાથ ધરાવાની છે. એવી પૂરેપૂરી શક્યતા છે કે અજિત પવારની NCP સત્તાવાર રીતે શિંદે સેના સાથેના પોતાના ગઠબંધનની જાહેરાત કરી શકે છે.

જો ખરેખર આવું થયું, તો BMCના સત્તા માળખામાં એક નવું અને રસપ્રદ ચિત્ર ઉપસી આવશે. આ નવું જોડાણ માત્ર BMC પૂરતું સીમિત રહેશે કે કેમ, અને તેની અસર આવનારી ચૂંટણીઓ પર કેટલી પડશે, તે જોવું હવે ખાસ બની રહેશે.

આ પણ વાંચો- GDP ગ્રોથમાં ભારતે અમેરિકાને પાછળ છોડ્યું: ઈલોન મસ્ક પણ ચોંકી ગયા, કહ્યું - હવે પાવર બદલાઈ રહ્યો છે!