BMC Election: મુંબઈમાં મોટો 'ખેલ' થશે? બહુમતી હોવા છતાં ભાજપનું ટેન્શન વધ્યું, જાણો મેયર પદ માટેનું અસલી ગણિત

BMC Election 2026: દેશની સૌથી મોટી અને શ્રીમંત ગણાતી મુંબઈ મહાનગરપાલિકા (BMC)ના રાજકારણમાં અત્યારે જબરદસ્ત ગરમાવો જોવા મળી રહ્યો છે. ચૂંટણી પરિણામોમાં ભારતીય જનતા પાર્ટી સૌથી મોટા પક્ષ તરીકે ઉભરી આવી છે અને મહાયુતિ ગઠબંધન પાસે સ્પષ્ટ બહુમતી પણ દેખાઈ રહી છે. છતાં, મુંબઈના મેયર કોણ બનશે તેને લઈને સસ્પેન્સ ખતમ થવાનું નામ નથી લઈ રહ્યું. ઉદ્ધવ ઠાકરે જૂથની શિવસેના (UBT)એ એક એવો દાવો કર્યો છે જેનાથી ભાજપ અને એકનાથ શિંદેની શિવસેનાનું ટેન્શન વધી ગયું છે.

સંજય રાઉતનો મોટો ધડાકો: શું બાજી પલટાઈ જશે?

શિવસેના (UBT)ના દિગ્ગજ નેતા અને સાંસદ સંજય રાઉતે દાવો કર્યો છે કે મેયરની ખુરશી માટે વિપક્ષ બહુમતીથી માત્ર થોડાક ડગલાં જ દૂર છે. રાઉતના કહેવા મુજબ, મુંબઈના રાજકારણમાં ગમે ત્યારે મોટો 'ખેલ' થઈ શકે છે. સંજય રાઉતે મીડિયા સાથે વાત કરતા જણાવ્યું હતું કે, "અમારી પાસે અત્યારે 108 બેઠકોનું સમર્થન છે. મેયર બનાવવા માટે જાદુઈ આંકડો 114 છે. એટલે કે અમે માત્ર 6 કોર્પોરેટરોથી જ પાછળ છીએ. મુંબઈના પોલિટિક્સમાં ક્યારે શું થાય તે કહી શકાય નહીં." આ નિવેદન બાદ રાજકીય વર્તુળોમાં ચર્ચા શરૂ થઈ ગઈ છે કે શું ભાજપ પાસેથી સત્તા છીનવાઈ જશે?

જાણો BMCમાં સત્તાનું ગણિત શું છે?

મહાયુતિ ગઠબંધન: ભાજપ પાસે 89 બેઠકો અને મુખ્યમંત્રી એકનાથ શિંદેની શિવસેના પાસે 29 બેઠકો છે. આ બંને મળીને કુલ 118 બેઠકો થાય છે, જે બહુમતીના આંકડા (114) કરતાં 4 વધારે છે. કાગળ પર મહાયુતિ સુરક્ષિત દેખાય છે.

વિપક્ષ પાસે 108નો આંકડો ક્યાંથી આવ્યો?

સંજય રાઉત જે 108 બેઠકોનો દાવો કરી રહ્યા છે, તેનું ગણિત સમજવા જેવું છે. વિપક્ષી પાર્ટીઓની સ્થિતિ નીચે મુજબ છે:

* શિવસેના (ઉદ્ધવ જૂથ): 65 બેઠકો

* કોંગ્રેસ: 24 બેઠકો

* MNS (રાજ ઠાકરે): 6 બેઠકો

* AIMIM: 8 બેઠકો

* સમાજવાદી પાર્ટી: 2 બેઠકો

* NCP (શરદ પવાર જૂથ): 1 બેઠક

જો આ તમામ પક્ષોના આંકડાનો સરવાળો કરીએ તો કુલ 104 બેઠકો થાય છે. હજુ પણ સંજય રાઉતના 108 ના દાવામાં 4 બેઠકો ખૂટે છે. જોકે, રાઉતનો ઈશારો એવો છે કે અન્ય નાના પક્ષો કે અપક્ષોના ટેકાથી તેઓ 108 સુધી પહોંચી રહ્યા છે. અત્રે ઉલ્લેખનીય છે કે અજિત પવારની NCP એ 3 બેઠકો જીતી છે, પરંતુ તેઓ સત્તાવાર રીતે મહાયુતિ સરકારનો હિસ્સો છે.

શું 'હોર્સ ટ્રેડિંગ' થશે?

ભલે આંકડાઓમાં મહાયુતિ (ભાજપ-શિંદે) આગળ હોય અને તેમની પાસે સ્પષ્ટ બહુમતી દેખાતી હોય, પરંતુ સંજય રાઉતના આત્મવિશ્વાસ ભર્યા નિવેદને અનેક તર્ક-વિતર્કો ઊભા કર્યા છે. આ નિવેદનથી સ્પષ્ટ થાય છે કે મેયરની ચૂંટણી પહેલા કોર્પોરેટરોને તોડવા કે પોતાની તરફ ખેંચવા (હોર્સ ટ્રેડિંગ)ના પ્રયાસો થઈ શકે છે. હવે જોવાનું એ રહે છે કે ભાજપ પોતાની બહુમતી સાચવી શકે છે કે પછી ઉદ્ધવ જૂથ ખરેખર કોઈ ચમત્કાર કરી બતાવશે.

આ પણ વાંચો- Saina Nehwal Retirement: ભારતીય બેડમિન્ટનનો એક સુવર્ણ યુગ પૂરો, સાઈના નેહવાલે લીધી નિવૃત્તિ, કહ્યું 'હવે શરીર સાથ નથી આપતું'