શું ભારત મુઈઝુને હટાવીને માલદીવમાં તખ્તાપલટ કરવા માગતું હતું? પૂર્વ રાષ્ટ્રપતિએ USની બોલતી કરી દીધી બંધ

માલદીવના ભૂતપૂર્વ રાષ્ટ્રપતિ મોહમ્મદ નશીદે વોશિંગ્ટન પોસ્ટના એક અહેવાલને ફગાવી દીધો છે જેમાં દાવો કરવામાં આવ્યો હતો કે માલદીવના વિપક્ષી નેતાઓએ માલદીવના વર્તમાન રાષ્ટ્રપતિ મોહમ્મદ મુઈઝુ પર મહાભિયોગ ચલાવવા માટે ભારત પાસેથી $6 મિલિયનની માંગ કરી હતી. નશીદે જોરદાર રીતે આ દાવાને નકારી કાઢ્યો અને કહ્યું કે તેઓ આવા કોઈ "ગંભીર કાવતરા" વિશે જાણતા નથી અને ભારત આવા ષડયંત્રને ક્યારેય સમર્થન આપશે નહીં.

નશીદે સોશિયલ મીડિયા પ્લેટફોર્મ પર લખ્યું છે કે તે કોઈપણ ષડયંત્રને સમર્થન આપશે નહીં કારણ કે તે હંમેશા માલદીવની લોકશાહીનું સમર્થન કરે છે, ભારતે ક્યારેય તેની શરતો આપણા પર લાદી નથી.

વોશિંગ્ટન પોસ્ટ અહેવાલ આપે છે કે માલદીવના વિપક્ષી નેતાઓએ રાષ્ટ્રપતિ મુઈઝુને હટાવવા માટે 40 સાંસદોને લાંચ આપવાનો પ્રસ્તાવ મૂક્યો હતો. મુઇઝ્ઝુની પોતાની પાર્ટીના સાંસદો પણ આમાં સામેલ હતા. અહેવાલ મુજબ, વિપક્ષી નેતાઓએ 10 વરિષ્ઠ સૈન્ય અને પોલીસ અધિકારીઓ અને ત્રણ પ્રભાવશાળી અપરાધી ગેંગને ષડયંત્રમાં સામેલ કરવાનો પ્રસ્તાવ પણ મૂક્યો હતો. સમગ્ર ઓપરેશન માટે 87 મિલિયન માલદીવિયન રુફિયા (લગભગ $6 મિલિયન)ની જરૂર હતી, જે ભારત પાસેથી માંગવામાં આવી હતી. રિપોર્ટમાં એવો પણ આક્ષેપ કરવામાં આવ્યો હતો કે ભારતની ગુપ્તચર એજન્સી RAWના એક વરિષ્ઠ અધિકારીએ મુઇઝુએ પદ સંભાળ્યા બાદ જાન્યુઆરીમાં રાષ્ટ્રપતિને હટાવવાનો પ્લાન બનાવ્યો હતો.

ભારત સરકાર અને નશીદનો પક્ષ

ભારતીય વિદેશ મંત્રાલય (MEA)એ માલદીવમાં આ કહેવાતા બળવાના કાવતરામાં તેની સંડોવણી અંગે કોઈ સત્તાવાર પ્રતિક્રિયા આપી નથી. જોકે, સરકારી સૂત્રોએ આ આરોપોને સંપૂર્ણપણે ફગાવી દીધા હતા. તેમણે કહ્યું કે ભારત અને માલદીવ વચ્ચેના સંબંધો તાજેતરના સમયમાં મજબૂત થયા છે. વડા પ્રધાન નરેન્દ્ર મોદીએ રાષ્ટ્રપતિ મુઈઝુને તેમના શપથ ગ્રહણ સમારોહમાં આમંત્રણ આપ્યું હતું અને ત્યારબાદ મુઈઝુએ ભારતની રાજ્ય મુલાકાત પણ લીધી હતી. મુઈઝુએ ભારતની મુલાકાત દરમિયાન આપેલા ઈન્ટરવ્યુમાં કહ્યું હતું કે તેઓ ભારતના સુરક્ષા હિતોને ક્યારેય નુકસાન નહીં પહોંચાડે.

ષડયંત્રમાં ભારતીય નામ સામેલ હોવાનો આરોપ

અહેવાલ મુજબ, કાવતરામાં સામેલ બે ભારતીય મધ્યસ્થીઓએ માલદીવમાં રાજકીય અને વ્યવસાયિક સંપર્કો સાથે રાષ્ટ્રપતિ મુઈઝૂને હટાવવાની યોજના બનાવી હતી. આ મધ્યસ્થીઓમાંના એક શિરીષ થોરેટ હતા, ભૂતપૂર્વ પોલીસ અધિકારી અને માલદીવના ભૂતપૂર્વ રાષ્ટ્રપતિ મોહમ્મદ નશીદના સલાહકાર. બીજા આર્બિટ્રેટર સેવિયો રોડ્રિગ્સ હતા, જે ગોવા સ્થિત પ્રકાશક અને ભાજપના ભૂતપૂર્વ પ્રવક્તા હતા. મોહમ્મદ નશીદે આ આરોપોને સખત રીતે નકારી કાઢ્યા અને કહ્યું કે ભારતે હંમેશા માલદીવના લોકતંત્રને સમર્થન આપ્યું છે અને આવા ષડયંત્રની કલ્પના પણ કરી શકાતી નથી. ભારત અને માલદીવ વચ્ચેના સંબંધોને નબળા બનાવવાના પ્રયાસો નિષ્ફળ જશે.

આ પણ વાંચો-2000ના મૂલ્યની 6,691 કરોડની નોટો હજુ પણ છે લોકો પાસે, RBIએ કહ્યું કેટલી પાછી આવી