Digvijay Singh: દિગ્વિજય સિંહે લીધો મોટો નિર્ણય, કહ્યું- 'હું મારી સીટ ખાલી કરી રહ્યો છું', જાણો શું છે આગળનો પ્લાન?

Digvijay Singh: મધ્યપ્રદેશના રાજકારણમાં હાલ એક મોટા સમાચાર સામે આવ્યા છે. કોંગ્રેસના દિગ્ગજ નેતા અને રાજ્યસભા સાંસદ દિગ્વિજય સિંહે પોતાની રાજકીય કારકિર્દીને લઈને એક મહત્વનો ખુલાસો કર્યો છે. તેમણે સ્પષ્ટ શબ્દોમાં જાહેર કર્યું છે કે તેઓ પોતાની રાજ્યસભાની સીટ ખાલી કરી રહ્યા છે અને હવે તેઓ ઉપલા ગૃહમાં જવા નથી માંગતા.

શું કહ્યું દિગ્વિજય સિંહે?

ભોપાલમાં પત્રકારો સાથે વાતચીત કરતી વખતે જ્યારે દિગ્વિજય સિંહને ત્રીજી વખત રાજ્યસભામાં જવા અંગે પ્રશ્ન પૂછવામાં આવ્યો, ત્યારે તેમણે કોઈ પણ ગોળ-ગોળ વાત કર્યા વિના સીધો જવાબ આપ્યો હતો. તેમણે કહ્યું કે, "હું મારી સીટ ખાલી કરી રહ્યો છું. આ મારો વ્યક્તિગત નિર્ણય છે અને હવે હું રાજ્યસભાના સાંસદ બનવા નથી માંગતો."

અત્રે ઉલ્લેખનીય છે કે, દિગ્વિજય સિંહનો હાલનો રાજ્યસભાનો કાર્યકાળ આગામી 9 એપ્રિલના રોજ પૂર્ણ થઈ રહ્યો છે. તેમના આ નિવેદન બાદ રાજકીય ગલિયારામાં ચર્ચાઓ તેજ થઈ ગઈ છે.

આ વાતચીત દરમિયાન તેમણે લોકશાહી અને બંધારણીય પ્રક્રિયાઓ વિશે પણ મહત્વની વાત કરી હતી. તેમણે કહ્યું કે, "ઘણા એવા મુદ્દાઓ હોય છે જેના પર પરસ્પર ચર્ચા અને સંમતિ હોવી ખૂબ જરૂરી છે. જો આપણે ઈમાનદારીથી બંધારણને અનુસરીને કામ કરીએ તો કોઈને કોઈ સમસ્યા નડતી નથી." તેમનું કહેવું હતું કે અમુક વિષયો પર સામાન્ય સંમતિ સાધીને જ આગળ વધવું જોઈએ.

મધ્યપ્રદેશના રાજકારણમાં સક્રિય થવાના સંકેત?

દિગ્વિજય સિંહનું આ નિવેદન માત્ર સીટ છોડવા પૂરતું મર્યાદિત નથી, પણ ભવિષ્યની રાજનીતિ તરફ પણ ઈશારો કરે છે. તેમણે કહ્યું કે, "કેટલાક નિર્ણયો આપણા હાથમાં નથી હોતા, પણ એટલું ચોક્કસ કહીશ કે હું રાજ્યસભા સીટ છોડી રહ્યો છું."

રાજકીય પંડિતોનું માનવું છે કે દિગ્વિજય સિંહ હવે દિલ્હીના બદલે ભોપાલ એટલે કે મધ્યપ્રદેશના સ્થાનિક રાજકારણમાં વધારે રસ લઈ રહ્યા છે. આ નિવેદન કોંગ્રેસ હાઈકમાન્ડ માટે પણ એક સંકેત હોઈ શકે છે કે તેઓ રાજ્યમાં પાર્ટી સંગઠનને મજબૂત કરવા માટે જમીની સ્તરે કામ કરવા માંગે છે.

અગાઉ પણ વ્યક્ત કરી હતી ઈચ્છા

દિગ્વિજય સિંહ પહેલા પણ જાહેરમાં કહી ચૂક્યા છે કે તેઓ મધ્યપ્રદેશમાં રહીને પાર્ટી માટે કામ કરવા ઈચ્છે છે. હાલમાં જ મધ્યપ્રદેશ અનુસૂચિત જાતિ (SC) કોંગ્રેસના પ્રદેશ અધ્યક્ષ પ્રદીપ અહિરવારે પણ દિગ્વિજય સિંહને એક પત્ર લખ્યો હતો. જેમાં તેમણે રાજ્યસભામાં અનુસૂચિત જાતિના પ્રતિનિધિને મોકલવાની માંગણી કરી હતી.

હવે જ્યારે 'દિગ્ગી રાજા' એ સીટ ખાલી કરવાની જાહેરાત કરી દીધી છે, ત્યારે જોવું રહ્યું કે કોંગ્રેસ આ સીટ પર કોને તક આપે છે અને દિગ્વિજય સિંહ આગામી સમયમાં સંગઠનમાં કઈ નવી જવાબદારી સંભાળે છે. સ્થાનિક સ્તરે તેમની સક્રિયતા પાર્ટી માટે કેટલી ફાયદાકારક સાબિત થાય છે તે તો સમય જ કહેશે.

આ પણ વાંચો- બજેટ પહેલા ભારત માટે ખુશખબર: વર્લ્ડ બેંકે વધાર્યું GDP ગ્રોથનું અનુમાન, FY27માં ઈકોનોમી 6.5%ની ઝડપે દોડશે