Modi Govt 3.0: નરેન્દ્ર મોદી 9 જૂને વડાપ્રધાન તરીકે લેશે શપથ, બાંગ્લાદેશના પીએમ અને શ્રીલંકાના રાષ્ટ્રપતિ આપશે હાજરી

Modi Govt 3.0: PM નરેન્દ્ર મોદી રવિવારે (9 જૂન) ત્રીજી વખત ભારતના વડા પ્રધાન તરીકે શપથ લઈ શકે છે. અગાઉ એવા સમાચાર હતા કે તેમનો શપથગ્રહણ એક દિવસ પહેલા 8મી જૂને થશે. સૂત્રોએ સમાચાર એજન્સી ANIને જણાવ્યું કે, વડાપ્રધાન નરેન્દ્ર મોદીનો શપથ ગ્રહણ સમારોહ 9 જૂને સાંજે 6 વાગ્યે યોજાઈ શકે છે. મોદીએ બુધવારે તેમના પદ પરથી રાજીનામું આપ્યું અને શપથ ગ્રહણ સમારોહ પહેલા રાષ્ટ્રપતિ દ્રૌપદી મુર્મુને પોતાનો પત્ર સોંપ્યો. રાષ્ટ્રપતિએ વડાપ્રધાન અને મંત્રી પરિષદ તરીકે તેમનું રાજીનામું સ્વીકાર્યું અને નવી સરકાર સત્તા સંભાળે ત્યાં સુધી તેમના પદ પર ચાલુ રહેવા વિનંતી કરી.

દરમિયાન, શુક્રવારે સવારે 11:00 વાગ્યે સંસદના સેન્ટ્રલ હોલમાં NDA સાંસદોની મહત્વપૂર્ણ બેઠક યોજાશે. આ બેઠકમાં તમામ ઘટક પક્ષોના રાષ્ટ્રીય અધ્યક્ષો ઉપરાંત એનડીએ શાસિત રાજ્યોના મુખ્યમંત્રીઓ અને ઉપમુખ્યમંત્રીઓ પણ હાજર રહેશે. આ ઉપરાંત શુક્રવારે 7 જૂને બીજેપી સંસદીય દળની બેઠક પણ મળશે જેમાં નરેન્દ્ર મોદીને નેતા તરીકે પસંદ કરવાની પ્રક્રિયા પૂર્ણ કરવામાં આવશે.

ભારતીય જનતા પાર્ટી (BJP)ના નેતૃત્વ હેઠળના નેશનલ ડેમોક્રેટિક એલાયન્સ (NDA)એ લોકસભા ચૂંટણીમાં 293 બેઠકો જીત્યા બાદ મોદી સતત ત્રીજી વખત વડાપ્રધાન તરીકે કાર્યભાર સંભાળશે. જો કે, ભાજપ લોકસભા ચૂંટણીમાં એકલા હાથે બહુમતી મેળવી શકી ન હતી.

બાંગ્લાદેશના પીએમ અને શ્રીલંકાના રાષ્ટ્રપતિ રહેશે હાજર

બાંગ્લાદેશના વડા પ્રધાન શેખ હસીના અને શ્રીલંકાના રાષ્ટ્રપતિ રાનિલ વિક્રમસિંઘે એ વિદેશી નેતાઓમાં સામેલ છે જેઓ સતત ત્રીજી વખત વડા પ્રધાન તરીકે નરેન્દ્ર મોદીના શપથ ગ્રહણ સમારોહમાં ભાગ લેશે. ભારતીય જનતા પાર્ટી (BJP)ના નેતૃત્વ હેઠળના નેશનલ ડેમોક્રેટિક એલાયન્સ (NDA)એ લોકસભા ચૂંટણીમાં 293 બેઠકો જીત્યા બાદ મોદી સતત ત્રીજી વખત વડાપ્રધાન તરીકે કાર્યભાર સંભાળશે.

સૂત્રોએ જણાવ્યું કે પીએમ મોદીના શપથ ગ્રહણ સમારોહમાં આમંત્રિત વિદેશી નેતાઓમાં બાંગ્લાદેશ, શ્રીલંકા, ભૂટાન, નેપાળ અને મોરેશિયસના ટોચના નેતાઓ સામેલ થઈ શકે છે. શ્રીલંકાના રાષ્ટ્રપતિ રાનિલ વિક્રમસિંઘેના કાર્યાલયના મીડિયા વિભાગે કહ્યું કે મોદીએ તેમને શપથ ગ્રહણ સમારોહમાં આમંત્રણ આપ્યું છે. વિક્રમસિંઘે આમંત્રણ સ્વીકાર્યું હતું, અને ફોન પર મોદીને ચૂંટણી જીત બદલ અભિનંદન આપ્યા હતા.

આ પણ વાંચો-Free Aadhaar Update Date Extended: આધારમાં ફ્રી અપડેટ માટે માત્ર 9 દિવસ બાકી, તરત જ કરી લો સુધારો

આ સિવાય પીએમ મોદીએ બાંગ્લાદેશના વડાપ્રધાન શેખ હસીના સાથે પણ ફોન પર વાત કરી હતી. રાજદ્વારી સૂત્રોએ જણાવ્યું કે ફોન પર વાતચીત દરમિયાન પીએમ મોદીએ હસીનાને તેમના શપથ ગ્રહણ સમારોહમાં હાજરી આપવા આમંત્રણ આપ્યું હતું અને તેમણે તેનો સ્વીકાર કર્યો હતો.

2019ની લોકસભા ચૂંટણી પછી, ભારતે PM મોદીના શપથ ગ્રહણ સમારોહમાં હાજરી આપવા BIMSTEC દેશોના નેતાઓને આમંત્રણ આપ્યું હતું. BIMSTEC એક પ્રાદેશિક જૂથ છે જેમાં બાંગ્લાદેશ, ભૂતાન, ભારત, મ્યાનમાર, નેપાળ, શ્રીલંકા અને થાઈલેન્ડનો સમાવેશ થાય છે. 2019 માં, VVIP સહિત 8,000 થી વધુ મહેમાનોએ આ કાર્યક્રમમાં હાજરી આપી હતી.

2014 માં, જ્યારે મોદીએ તેમના પ્રથમ કાર્યકાળ માટે શપથ લીધા, ત્યારે પાકિસ્તાનના તત્કાલિન વડા પ્રધાન નવાઝ શરીફ સહિત તમામ સાર્ક (સાઉથ એશિયન એસોસિએશન ફોર રિજનલ કોઓપરેશન) નેતાઓએ સમારોહમાં હાજરી આપી હતી.

2019માં નરેન્દ્ર મોદી સાથે 24 કેન્દ્રીય મંત્રીઓએ શપથ લીધા હતા. આ વખતે મોદી 3.0 કેબિનેટમાં તેના સાથી પક્ષોનું વધુ પ્રતિનિધિત્વ જોવા મળી શકે છે કારણ કે ભાજપ પોતાના દમ પર બહુમતી મેળવવામાં નિષ્ફળ રહી છે.