સંસદનું શિયાળુ સત્ર શરૂ: 1થી 19 ડિસેમ્બર સુધી મહત્વના બિલ અને વિવાદાસ્પદ મુદ્દાઓ પર ચર્ચા

Parliament Winter Session: ભારતીય સંસદનું શિયાળુ સત્ર આ વખતે થોડું ટૂંકું જોવા મળશે. કેન્દ્રીય મંત્રી કિરણ રિજિજુએ તાજેતરમાં આ અંગે માહિતી આપી છે. તેમના મુજબ, આ સત્ર 1 ડિસેમ્બરથી શરૂ થઈને 19 ડિસેમ્બર સુધી ચાલશે. રાષ્ટ્રપતિ દ્રૌપદી મુર્મુએ આને મંજૂરી આપી દીધી છે. મંત્રીએ કહ્યું કે આ સત્ર લોકશાહીને વધુ મજબૂત બનાવશે અને લોકોની અપેક્ષાઓને પૂરી કરશે.

આ વખતનું સત્ર અગાઉના કેટલાક સત્રોની તુલનામાં નાનું છે. ઉદાહરણ તરીકે, 2013માં પણ શિયાળુ સત્ર માત્ર 14 દિવસનું હતું, જે 5 ડિસેમ્બરથી 18 ડિસેમ્બર સુધી ચાલ્યું હતું. આ વખતે સત્ર પૂરું થયા બાદ તરત જ બજેટ સત્ર પણ શરૂ થશે, જેના કારણે આને ટૂંકું રાખવામાં આવ્યું છે.

સરકારનું મુખ્ય ધ્યાન કેટલાક મહત્વના કાયદાઓ પસાર કરવા પર રહેશે. આમાં જન વિશ્વાસ બિલ અને ઇન્સોલ્વન્સી એન્ડ બેંકરપ્સી બિલ જેવા મુખ્ય બિલનો સમાવેશ થાય છે. આ ઉપરાંત, બિહાર વિધાનસભા ચૂંટણીનો મુદ્દો પણ આ સત્રમાં ચર્ચાનું કેન્દ્ર બની શકે છે. વધુમાં, 12 રાજ્યો અને કેન્દ્રશાસિત પ્રદેશોમાં એસઆઈઆર પ્રક્રિયા ચાલી રહી છે, જેને લઈને વિપક્ષ વિરોધ કરી શકે છે.

આ પહેલા, ચોમાસુ સત્ર 21 જુલાઈથી 21 ઓગસ્ટ સુધી ચાલ્યું હતું. તેમાં કુલ 21 બેઠકો થઈ હતી. તે સત્રના પહેલા દિવસે રાજ્યસભાના તત્કાલીન સભાપતિ જગદીપ ધનખડે રાજીનામું આપ્યું હતું. છેલ્લા સત્રમાં એસઆઈઆર અને ઓપરેશન સિંદૂર જેવા મુદ્દાઓ પર ઘણો હોબાળો થયો હતો. તેમાં રાજ્યસભામાં 15 અને લોકસભામાં 12 બિલ પસાર થયા હતા.

આ પણ વાંચો- જો અમેરિકા ગૂગલ-ફેસબુક-વિન્ડોઝ બંધ કરી દે તો ભારતનું શું? Zohoના ફાઉન્ડર વેમ્બુનો ધમાકેદાર આઇડિયા: 10 વર્ષનું 'ટેક રેઝિલિયન્સ' મિશન!