Monsoon Deficit Alert: ચોમાસાની વિદાય શરૂ,દેશના 14 રાજ્યોમાં દુકાળ જેવી સ્થિતિ, આ વર્ષે 10% ઓછો વરસાદ નોંધાશે

Monsoon Deficit Alert: દેશમાંથી દક્ષિણ-પશ્ચિમ ચોમાસું હવે ધીમે ધીમે વિદાય લઈ રહ્યું છે. પરંતુ જતાં-જતાં તે ખેડૂતો માટે ચિંતાનો વિષય બની ગયું છે. રિપોર્ટ મુજબ, આ વર્ષે ચોમાસાની સિઝન સામાન્ય કરતા 10% ઓછા વરસાદ સાથે પૂરી થવાની પૂરેપૂરી સંભાવના છે. 19 સપ્ટેમ્બર સુધીના આંકડા દર્શાવે છે કે દેશમાં વરસાદની ભારે અછત છે, જેની સીધી અસર ખેતી પર પડશે.

પશ્ચિમ રાજસ્થાનથી ચોમાસાની વિદાય શરૂ

ભારતીય હવામાન વિભાગના જણાવ્યા અનુસાર, 19 સપ્ટેમ્બરથી પશ્ચિમ રાજસ્થાનના વિસ્તારોમાંથી ચોમાસાએ પરત ફરવાનું શરૂ કરી દીધું છે. સામાન્ય રીતે ચોમાસાની વિદાય 17 સપ્ટેમ્બરથી શરૂ થતી હોય છે, એટલે કે આ વર્ષે ચોમાસું 2 દિવસ મોડું વિદાય લઈ રહ્યું છે. આગામી 3 થી 4 દિવસમાં રાજસ્થાનના અન્ય વિસ્તારો, પંજાબ અને ગુજરાતના સૌરાષ્ટ્ર-કચ્છમાંથી પણ ચોમાસું પાછું ખેંચાઈ શકે છે. જોકે, 20 અને 21 સપ્ટેમ્બરે રાજસ્થાનના કોટા અને ઉદયપુરમાં છૂटोછવાયો વરસાદ પડી શકે છે.

14 રાજ્યોમાં 20% થી વધુ વરસાદની ઘટ

આ રાજ્યોમાં બિહાર, પંજાબ, હરિયાણાનો સમાવેશ થાય છે. દક્ષિણ ભારતના તમામ પાંચ રાજ્યોમાં પણ ઓછો વરસાદ પડ્યો છે.આ ઉપરાંત ઉત્તર-પશ્ચિમ અને પૂર્વોત્તરના કેટલાક રાજ્યોમાં પણ દુકાળ જેવો માહોલ જોવા મળી રહ્યો છે.

ખેડૂતોની ચિંતા વધી: ખરીફ અને રવી પાક પર મોટી અસર

વરસાદ ખેંચાવાને કારણે ખેડૂતો મુશ્કેલીમાં મુકાયા છે. જોકે ખરીફ પાકના કુલ વાવેતર વિસ્તારમાં ગયા વર્ષની સરખામણીએ માત્ર 1% નો જ ઘટાડો થયો છે, પરંતુ સૌથી વધુ પાણી માંગતા ડાંગરના વાવેતરમાં 4% નો મોટો ઘટાડો નોંધાયો છે.

કૃષિ નિષ્ણાતોના મતે, ભલે સરેરાશ વરસાદ સારો દેખાતો હોય, પરંતુ ક્યાંક વધુ તો ક્યાંક સાવ ઓછો વરસાદ પડવાથી પાકને નુકસાન થાય છે. ચોમાસું નબળું રહેવાથી જમીનમાં ભેજ ઘટશે અને ડેમોમાં પાણી નહીં રહે, જેની સીધી અસર આગામી શિયાળુ પાકની સિંચાઈ પર પડશે.

વિલન બન્યું 'અલ નીનો', પણ બંગાળની ખાડીથી આશા

આ વર્ષે નબળા ચોમાસા પાછળ અલ નીનો ની અસરને પણ જવાબદાર માનવામાં આવી રહી છે, જેના કારણે ગરમી વધી અને વરસાદ ઘટ્યો. જોકે, થોડી રાહતના સમાચાર એ છે કે બંગાળની ખાડીમાં એક લો-પ્રેશર (ડીપ ડિપ્રેશન) સિસ્ટમ બની રહી છે. આ સિસ્ટમને કારણે આવતા અઠવાડિયે પૂર્વ ભારત અને ખાસ કરીને ઓડિશાના દરિયાકાંઠાના વિસ્તારોમાં સારો વરસાદ પડી શકે છે.

એક નજરમાં ચોમાસા 2026 ના આંકડા

દેશમાં કુલ વરસાદની ઘટ (19 સપ્ટેમ્બર સુધી): 15%

20% થી વધુ ઘટવાળા રાજ્યો: 14

ચોમાસાની વિદાયની શરૂઆત: 19 સપ્ટેમ્બર (રાજસ્થાનથી)

ચોમાસાની વિદાયની સામાન્ય છેલ્લી તારીખ: 15 ઓક્ટોબર

ડાંગરના વાવેતરમાં ઘટાડો: ગયા વર્ષ કરતા 4% ઓછું

સિઝનના અંત સુધીમાં અંદાજિત વરસાદની ઘટ: 10% થી વધુ

આ પણ વાંચો-ડેન્ગ્યુની રસીને લઈને મોટા સમાચાર: જાપાનની તાકેડા ફાર્મા સાથે ડીલ ફાઇનલ, જાણો ભારતમાં ક્યારથી મળશે ‘Qdenga' વેક્સીન