સૈફે સારવાર માટે કર્યો 36 લાખનો વીમા ક્લેમ... 25 લાખની શરૂઆતની રકમ મંજૂર, ડોક્યુમેન્ટ્સ લીક!

બાંદ્રામાં 12મા માળના ફ્લેટમાં ઘૂસેલા એક ચોરે બોલિવૂડ અભિનેતા સૈફ અલી ખાન (54) પર છરી વડે અનેક વાર હુમલો કર્યો જેમાં તે ગંભીર રીતે ઘાયલ થયો. સૈફને ગરદન, પીઠ અને હાથ સહિત શરીરના અનેક ભાગોમાં ઈજાઓ થઈ હતી. મુંબઈની લીલાવતી હોસ્પિટલમાં અભિનેતાની ઇમરજન્સી સર્જરી કરવામાં આવી.

હોસ્પિટલના ચીફ ઓપરેટિંગ ઓફિસર (COO) ડૉ. નીરજ ઉત્તમાણીએ જણાવ્યું હતું કે અભિનેતા સ્વસ્થ છે અને ઝડપથી સ્વસ્થ થઈ રહ્યા છે, તેમને ટૂંક સમયમાં હોસ્પિટલમાંથી રજા આપવામાં આવશે. હાલમાં, તે બેડ રેસ્ટ પર છે. આ દરમિયાન, સમાચાર આવી રહ્યા છે કે અભિનેતાએ પોતાની સારવાર માટે વીમાનો ક્લેમ કર્યો છે.

હેલ્થ ઇન્સ્યોરન્સના દાવામાં 25 લાખ રૂપિયા મળ્યા

સૈફ અલી ખાનનો સ્વાસ્થ્ય વીમા દાવા ફોર્મ માઇક્રોબ્લોગિંગ પ્લેટફોર્મ X પર સામે આવ્યો છે. સૈફ અલી ખાન પાસે નિવા બુપાની પોલીસી છે. લીક થયેલા ડોક્યુમેન્ટ્સોમાં ખુલાસો થયો છે કે સૈફ અલી ખાને પોતાની સારવાર માટે 35.95 લાખ રૂપિયાનો ક્લેમ કર્યો હતો, જેમાંથી 25 લાખ રૂપિયા વીમા કંપની દ્વારા મંજૂર કરવામાં આવ્યા છે. જોકે, 25 લાખ રૂપિયા ફક્ત શરૂઆતની રકમ છે જે કેશલેસ સારવાર માટે મંજૂર કરવામાં આવી છે.

સૈફ અલી ખાન સ્યુટ રૂમમાં દાખલ

ડોક્યુમેન્ટ્સમાં આપવામાં આવેલી માહિતીના આધારે, 54 વર્ષીય અભિનેતા હાલમાં બાંદ્રા સ્થિત લીલાવતી હોસ્પિટલ અને રિસર્ચ સેન્ટરના એક સ્યુટ રૂમમાં છે, જ્યાં 16 જાન્યુઆરી, 2025ના રોજ દાખલ થયા પછી તેઓ 'શારીરિક ઇજાઓ' માટે સારવાર લઈ રહ્યા છે. પરિવારે શરૂઆતમાં 3,598,700 રૂપિયાની માંગણી કરી હતી. કંપનીએ સારવાર માટે રુપિયા 2,500,000ની પ્રારંભિક રકમ મંજૂર કરી છે.

કંપનીએ ક્લેમ પર શું કહ્યું?

નિવા બુપા હેલ્થ ઇન્શ્યોરન્સ કંપનીએ દાવાની પુષ્ટિ કરી અને કહ્યું, 'સૈફ અલી ખાન અમારા પોલિસી ધારકોમાંથી એક છે. તેમના હોસ્પિટલમાં દાખલ થયા પછી, અમને કેશલેસ પ્રી-ઓથોરાઇઝેશન વિનંતી મોકલવામાં આવી હતી અને અમે તેમની સારવાર માટે પ્રારંભિક રકમ મંજૂર કરી દીધી છે. કંપનીએ કહ્યું કે સારવાર પૂર્ણ થયા પછી, જ્યારે અમને અંતિમ બિલ મળશે, ત્યારે પોલિસીના નિયમો અને શરતો અનુસાર તેનું સેટલમેન્ટ કરવામાં આવશે.

અંડરવર્લ્ડ ગેંગે હુમલો કર્યો ન હતો

મહારાષ્ટ્રના ગૃહ રાજ્યમંત્રી યોગેશ કદમે પુષ્ટિ આપી છે કે સૈફ અલી ખાન પર કોઈ અંડરવર્લ્ડ ગેંગ દ્વારા હુમલો કરવામાં આવ્યો નથી. તેમણે કહ્યું, 'કસ્ટડીમાં લેવાયેલો શંકાસ્પદ કોઈ ગેંગ સાથે સંકળાયેલો નથી.' આ હુમલો કોઈ ગુનાહિત નેટવર્ક દ્વારા કરવામાં આવ્યો ન હતો.

આ પણ વાંચો - ડોનાલ્ડ ટ્રમ્પના મીમ કોઈને મચાવી ધૂમ, લોન્ચ થતાં જ 8000% ઉછળ્યો, લોકોને લાગ્યું મજાક