Hindu population: આ આફ્રિકન દેશમાં હિન્દુઓની વસ્તીમાં જબરદસ્ત વધારો થયો, માત્ર 12 વર્ષમાં તે થઈ ડબલ

Seychelles Hindu population: આફ્રિકાના નાનકડા દ્વીપ દેશ સેશેલ્સમાં હિંદુ વસ્તીમાં ઝડપથી વધારો થયો છે, જે દરેકને આશ્ચર્યમાં મૂકી દે છે. 2010માં જ્યાં હિંદુઓની વસ્તી કુલ આબાદીના 2.4% હતી, તે 2022માં વધીને 5.4% થઈ ગઈ. માત્ર 12 વર્ષમાં હિંદુ વસ્તી બમણીથી પણ વધી ગઈ! આ પાછળ સેશેલ્સ હિંદુ કોવિલ સંગમ અને નવશક્તિ વિનાયગર મંદિરની મહત્વની ભૂમિકા રહી છે.

હિંદુ વસ્તીનો વધતો ગ્રાફ

સેશેલ્સ તેના નયનરમ્ય બીચ અને બહુસાંસ્કૃતિક સમાજ માટે જાણીતું છે. અહીં હિંદુ ધર્મ બીજો સૌથી મોટો ધર્મ બની ગયો છે. 1901માં અહીં માત્ર 332 હિંદુ પરિવારો હતા, જેમાં તમિલ ભાષી લોકોની સંખ્યા આશરે 3,500 હતી. સમય જતાં આ આંકડો બદલાતો ગયો. 1987માં હિંદુઓની સંખ્યા 506 હતી, જે 1994માં વધીને 953 થઈ. 2002માં 1,700 અને 2010માં 2,174 હિંદુઓ હતા. પરંતુ 2010થી 2022 દરમિયાન સૌથી મોટો ઉછાળો જોવા મળ્યો, જ્યારે હિંદુઓની સંખ્યા 5,508 થઈ, એટલે કે કુલ વસ્તીના 5.4%!

1984માં સ્થપાયેલા સેશેલ્સ હિંદુ કોવિલ સંગમે હિંદુ સંસ્કૃતિને જાળવી રાખવામાં અને તેને વધારવામાં મોટું યોગદાન આપ્યું છે. 1992માં નવશક્તિ વિનાયગર મંદિરની સ્થાપનાએ હિંદુ ધર્મને નવી દિશા આપી. આ મંદિરમાં ભગવાન ગણેશ મુખ્ય દેવતા છે, અને 1999થી તેઓ અહીંના પ્રમુખ આરાધ્ય બન્યા છે. મંદિરમાં મુરુગન, નટરાજ, દુર્ગા, શ્રીનિવાસ પેરુમલ, ભૈરવા અને ચંડીકેશ્વર જેવા દેવી-દેવતાઓની મૂર્તિઓ પણ સ્થાપિત છે, જેમની વિશેષ પૂજા થાય છે.

તાઇપ્પૂસમ કાવડી: રાષ્ટ્રીય રજા

સેશેલ્સમાં તાઇપ્પૂસમ કાવડી ઉત્સવ ખૂબ ધામધૂમથી ઉજવાય છે. 1993માં મંદિરના આંગણમાં શરૂ થયેલો આ ઉત્સવ હવે બહારના વિસ્તારમાં ભવ્ય રીતે ઉજવાય છે. રથ કાવડી સાથે નીકળતી શોભાયાત્રા દેશનું ધ્યાન ખેંચે છે. આ ઉત્સવની લોકપ્રિયતાને જોતાં 1998થી સેશેલ્સ સરકારે તેને હિંદુઓ માટે સત્તાવાર રજા જાહેર કરી. રાષ્ટ્રીય રેડિયો અને ટેલિવિઝન પર તેનું તમિલ અને અંગ્રેજીમાં ખાસ કવરેજ થાય છે.

હિંદુ સંસ્કૃતિનો નવો યુગ

સેશેલ્સ હિંદુ કોવિલ સંગમે માત્ર 17 વર્ષમાં હિંદુ સંસ્કૃતિને મજબૂત પાયો આપ્યો છે. કાવડી ઉપરાંત, ગણેશ ચતુર્થી, દિવાળી અને અન્ય હિંદુ તહેવારો ઉત્સાહથી ઉજવાય છે. આ આયોજનો હિંદુ સમુદાયને જોડે છે અને સેશેલ્સની બહુસાંસ્કૃતિક ઓળખને ઉજાગર કરે છે. આશરે એક લાખની વસ્તી ધરાવતા આ નાનકડા દેશમાં હિંદુ ધર્મ અને ભારતીય સંસ્કૃતિનો આટલો ઝડપી વિસ્તાર એક અનોખું ઉદાહરણ છે.

 આ પણ વાંચો-Upcoming IPOs: 6 દિગ્ગજ કંપનીઓ લાવશે IPO, SEBIએ આપી મંજૂરી: Hero Motors, Canara Robeco સહિતનું ચેક કરો લિસ્ટ