Vande Bharat train alert: વંદે ભારત ટ્રેનમાં જોખમ! રેલવે સુરક્ષા આયોગનો રિપોર્ટ આપે છે ચેતવણી

Vande Bharat train alert: ભારતીય રેલવેની અત્યાધુનિક અને સેમી-હાઈ સ્પીડ વંદે ભારત એક્સપ્રેસ ટ્રેનો ફરી ચર્ચામાં છે, પરંતુ આ વખતે તેની ઝડપને બદલે સુરક્ષાને લઈને ગંભીર ચિંતા વ્યક્ત કરવામાં આવી છે. રેલવે સુરક્ષા આયોગના તાજેતરના અહેવાલમાં ચેતવણી આપવામાં આવી છે કે વંદે ભારત ટ્રેનોની હાઈ સ્પીડને કારણે, જો ટ્રેક પર પશુ કે અન્ય કોઈ અવરોધ આવે તો મોટો અકસ્માત થઈ શકે છે. આ રિપોર્ટે ટ્રેનની સુરક્ષા અંગે નવી ચર્ચા જન્માવી છે.

હલકી ફ્રન્ટ બોગીથી જોખમ

અહેવાલમાં જણાવાયું છે કે વંદે ભારત ટ્રેનની આગળની બોગી સામાન્ય ટ્રેનોના એન્જિનની તુલનામાં હલકી છે. આ કારણે, જો ટ્રેક પર કોઈ પશુ કે અન્ય અવરોધ આવે અને ટ્રેન 160 કિલોમીટર પ્રતિ કલાકની ઝડપે તેની સાથે અથડાય, તો ગંભીર અકસ્માતનું જોખમ રહે છે. આવી ઘટનાઓથી ટ્રેનની આગળની બોગીને નુકસાન થવાની સાથે મુસાફરોના જીવને પણ જોખમ ઊભું થઈ શકે છે.

રેલવે મંત્રાલયને સૂચનો

-160 કિલોમીટર પ્રતિ કલાકની ઝડપવાળા તમામ રૂટ પર લેવલ ક્રોસિંગ ગેટ હટાવી દેવા.

-રેલવે ટ્રેકની બંને બાજુ મજબૂત વાડ લગાવવી, જેથી મનુષ્યો અને પશુઓનો પ્રવેશ અટકાવી શકાય.

-રેલવે સુરક્ષા દળ (RPF) દ્વારા નિયમિત પેટ્રોલિંગ અને સંવેદનશીલ વિસ્તારોમાં સતત દેખરેખ રાખવી.

-ખેડૂતો અને તેમના પશુઓ માટે ટ્રેકની નીચે અંડરપાસ અથવા સબવે બનાવવા, જેથી ટ્રેક પાર કરવું સુરક્ષિત બને.

વંદે ભારત ટ્રેનોનું વિસ્તરણ

વંદે ભારત ટ્રેનોનું ઉત્પાદન ચેન્નઈના ઈન્ટિગ્રલ કોચ ફેક્ટરી (ICF), કપૂરથલાના રેલ કોચ ફેક્ટરી (RCF) અને રાયબરેલીના મોર્ડન કોચ ફેક્ટરી (MCF)માં થઈ રહ્યું છે. હાલમાં દેશભરમાં 136 વંદે ભારત ટ્રેનો ચાલે છે, અને એકલા 2024માં 62 નવી ટ્રેનો શરૂ કરવામાં આવી છે. જોકે, આ ટ્રેનો સાથે પશુઓની અથડામણની ઘટનાઓ વારંવાર સામે આવી છે, જેના કારણે આગળની બોગીને નુકસાન થયું છે.

ટ્રેન નિર્માતાઓનો જવાબ

વંદે ભારત ટ્રેનોના નિર્માણ સાથે સંકળાયેલા ઈન્ટિગ્રલ કોચ ફેક્ટરીના પૂર્વ મુખ્ય મેકેનિકલ એન્જિનિયરએ આ ચિંતાઓનો જવાબ આપતા જણાવ્યું કે, “ટ્રેનનું ફ્રન્ટ નોઝ એવી રીતે ડિઝાઈન કરવામાં આવ્યું છે કે તે અથડામણ દરમિયાન થોડો ઝટકો સહન કરી શકે. ઉપરાંત, આગળના ભાગમાં લગાવેલો કૅટલ ગાર્ડ અવરોધોને દૂર કરવામાં મદદ કરે છે.” તેમણે વધુમાં કહ્યું કે, “આ ટ્રેનોની ફ્રન્ટ બોગી હલકી હોવા છતાં, તેની ડિઝાઈન EMU અને MEMU ટ્રેનો જેવી છે, જે આંતરિક પાવર વિતરણ પર કામ કરે છે. આ ડિઝાઈનથી ટ્રેનની સુરક્ષા પર કોઈ અસર થતી નથી.”

આ પણ વાંચો - ભારતમાં બની રહ્યું છે વિશ્વનું પ્રથમ નવીનીકરણીય ઉર્જા સંચાલિત શહેર, આ રાજ્યની હશે રાજધાની