ભારત માટે ખુલશે યુરોપનું દ્વાર: EU-India FTA 2025 સુધીમાં થશે ફાઇનલ

EU-India FTA: યુરોપિયન યુનિયન (EU) ભારત સાથેના દ્વિપક્ષીય સંબંધોને નવી દિશા આપવા માટે એક મહત્વપૂર્ણ રણનીતિ લઈને આવ્યું છે. યુરોપિયન કમિશનના પ્રેસિડન્ટ ઉર્સુલા વોન ડેર લેયેને જણાવ્યું કે, "યુરોપ હાલમાં ભારતનું સૌથી મોટું ટ્રેડિંગ પાર્ટનર છે, અને અમે 2025ના અંત સુધીમાં મુક્ત વેપાર કરાર (FTA)ને અંતિમ સ્વરૂપ આપવા માટે પ્રતિબદ્ધ છીએ." તેમણે ઉમેર્યું કે યુરોપ વેપાર માટે ખુલ્લું છે અને ભારત સાથે સહિયારા ભવિષ્યમાં રોકાણ કરવા તૈયાર છે.

ઉર્સુલા વોન ડેર લેયેનનું નિવેદન

ઉર્સુલા વોન ડેર લેયેને ભારપૂર્વક જણાવ્યું કે હવે સમય આવી ગયો છે કે વિશ્વસનીય પાર્ટનર્સ પર ધ્યાન કેન્દ્રિત કરવામાં આવે અને સમાન મૂલ્યો તથા હિતો પર આધારિત સહયોગને વધુ મજબૂત કરવામાં આવે. તેમણે કહ્યું, "નવી EU-India રણનીતિ સાથે, અમે અમારા સંબંધોને આગલા સ્તરે લઈ જઈ રહ્યા છીએ." આ રણનીતિનો હેતુ 2024-2029 દરમિયાન દ્વિપક્ષીય સહયોગને વધુ ગાઢ, વ્યાપક અને સમન્વયિત બનાવવાનો છે, જેથી બંને પક્ષોની સમૃદ્ધિ અને સુરક્ષામાં વધારો થાય.

મુખ્ય એજન્ડાઓ

સમૃદ્ધિ અને સ્થિરતા: વેપાર અને રોકાણને પ્રોત્સાહન આપવું, 2025 સુધીમાં FTAને અંતિમ સ્વરૂપ આપવું.

ટેકનોલોજી અને નવીનતા: AI, સેમિકન્ડક્ટર, હાઈ-પરફોર્મન્સ કમ્પ્યુટિંગ અને સ્પેસ ટેકનોલોજી જેવા ક્ષેત્રોમાં સહયોગ.

સુરક્ષા: રક્ષા ઉદ્યોગમાં સહયોગ વધારવો અને સુરક્ષિત સપ્લાય ચેઈન તેમજ નવીનતાને પ્રોત્સાહન આપવું.

કનેક્ટિવિટી: યુએન રિફોર્મ, WTOનું આધુનિકીકરણ, ક્લાઈમેટ એક્શન અને હ્યુમન રાઈટ્સ જેવા વૈશ્વિક મુદ્દાઓ પર સહયોગ.

સહયોગની સુવિધા: શૈક્ષણિક આદાન-પ્રદાન, સાંસ્કૃતિક કૂટનીતિ અને ડિજિટલ ક્ષેત્રમાં કૌશલ્ય વિકાસ દ્વારા પરસ્પર સમજણ વધારવી.

ભારત માટે શું છે ફાયદો?

આ FTA ભારતના વેપાર અને રોકાણને નવો બૂસ્ટ આપશે, જેનાથી ભારતીય ઉદ્યોગોને યુરોપના બજારોમાં વધુ સરળતાથી પ્રવેશ મળશે. રક્ષા અને ટેકનોલોજી ક્ષેત્રે સહયોગથી ભારતની ઉત્પાદન ક્ષમતા અને નવીનતા પણ વધશે. આ ઉપરાંત, શૈક્ષણિક અને સાંસ્કૃતિક આદાન-પ્રદાનથી બંને પક્ષો વચ્ચેના સંબંધો વધુ મજબૂત થશે.

યુરોપ અને ભારત વચ્ચેનો આ નવો રણનીતિક સહયોગ બંને પક્ષો માટે સમૃદ્ધિ, સુરક્ષા અને વૈશ્વિક સ્થિરતાનો માર્ગ ખોલશે. 2025ના અંત સુધીમાં FTAના અમલથી ભારત-યુરોપ સંબંધો નવી ઉંચાઈઓ સર કરશે.

આ પણ વાંચો-GST સુધારણાથી ભારતીય અર્થતંત્રમાં 2 લાખ કરોડનો ઉમેરો, લોકોના હાથમાં આવશે વધુ નાણાં: નાણામંત્રી