India Growth Forecast: IMF એ ભારતને કર્યું 'પ્રમોટ', દમદાર પ્રદર્શન જોઈ ભવિષ્યવાણી બદલી, જાણો ચીન માટે શું કહ્યું

India Growth Forecast: ભારતીય અર્થવ્યવસ્થાની ગતિ જોઈને દુનિયાની મોટી મોટી સંસ્થાઓ પણ દંગ રહી ગઈ છે. હવે આંતરરાષ્ટ્રીય મુદ્રા કોષ એટલે કે IMF (International Monetary Fund) એ પણ ભારતના શાનદાર પ્રદર્શનને સલામ કરી છે. IMF એ ભારતની અર્થવ્યવસ્થાના દમદાર દેખાવને ધ્યાનમાં રાખીને પોતાની જૂની ભવિષ્યવાણી બદલી નાખી છે અને નવા આંકડા જાહેર કર્યા છે.

IMF એ ભારતનો ગ્રોથ રેટ વધાર્યો

IMF એ પોતાના 'વર્લ્ડ ઈકોનોમિક આઉટલુક' રિપોર્ટમાં જણાવ્યું છે કે નાણાકીય વર્ષ 2025-26 માટે ભારતનો વિકાસ દર (Growth Rate) હવે 7.3% રહેવાની શક્યતા છે. આ પહેલા ઓક્ટોબર મહિનામાં જે અનુમાન લગાવવામાં આવ્યું હતું તેના કરતા આ આંકડો 0.7% વધારે છે. એટલે કે, IMF ને હવે ભારત પર પહેલા કરતા વધુ ભરોસો બેઠો છે.

માત્ર એટલું જ નહીં, નાણાકીય વર્ષ 2026-27 માટે પણ IMF એ ખુશખબર આપી છે. આ વર્ષ માટે જીડીપી ગ્રોથનું અનુમાન વધારીને 6.4% કરી દેવામાં આવ્યું છે, જે પહેલા 6.2% હતું.

વોશિંગ્ટન સ્થિત આ સંસ્થાએ જણાવ્યું કે ભારતનો ગ્રોથ રેટ વધારવા પાછળનું મુખ્ય કારણ અર્થવ્યવસ્થાનું મજબૂત પ્રદર્શન છે. ખાસ કરીને ત્રીજા ક્વાર્ટરના પરિણામો ધારણા કરતા વધુ સારા રહ્યા છે અને ચોથા ક્વાર્ટરમાં પણ અર્થતંત્રની રફતાર તેજ રહી છે. આ જ કારણસર 2025 (નાણાકીય વર્ષ 2025-26)ના અનુમાનમાં મોટો વધારો કરવામાં આવ્યો છે.

જોકે, IMF એ એક ચેતવણી પણ આપી છે કે આવનારા સમયમાં ગ્રોથમાં થોડી નરમી જોવા મળી શકે છે. નાણાકીય વર્ષ 2026-27 અને 2027-28 માં ગ્રોથ રેટ 6.4% રહેવાનું અનુમાન છે, કારણ કે કેટલાક કામચલાઉ અને સાયકલિક પરિબળોની અસર ધીમે ધીમે ઓછી થશે.

સરકારી આંકડા શું કહે છે?

ભારત સરકારના આંકડા પણ અર્થવ્યવસ્થાની મજબૂતી દર્શાવે છે, નાણાકીય વર્ષ 2025-26ના પહેલા 6 મહિનામાં (એપ્રિલ થી સપ્ટેમ્બર) ભારતનો જીડીપી ગ્રોથ રેટ 8% રહ્યો હતો. જુલાઈ-સપ્ટેમ્બર ક્વાર્ટરમાં આ દર 8.2% નોંધાયો હતો.

સાંખ્યિકી મંત્રાલયના અંદાજ મુજબ, ચાલુ નાણાકીય વર્ષમાં ભારત 7.4%ની ઝડપે આગળ વધશે.

મોંઘવારી ઘટશે: સામાન્ય માણસને રાહત

મોંઘવારીના મોરચે પણ IMF એ રાહતના સમાચાર આપ્યા છે. રિપોર્ટ મુજબ, 2025 માં ખાણીપીણીની વસ્તુઓના ભાવમાં ઘટાડો થયો છે, જેના કારણે મોંઘવારી કાબૂમાં આવી રહી છે. ભવિષ્યમાં મોંઘવારીનો દર રિઝર્વ બેંક ઓફ ઈન્ડિયાના 4% ના ટાર્ગેટની નજીક પહોંચવાની પૂરી શક્યતા છે.

ચીન અને દુનિયા માટે શું કહ્યું?

ભારતની સાથે સાથે IMF એ ચીન માટે પણ પોતાની ભવિષ્યવાણીમાં સુધારો કર્યો છે.

ચીન: IMF એ ચીનનો 2025 નો ગ્રોથ રેટ 0.2% વધારીને 5.0% કર્યો છે. જોકે, ભારતની સરખામણીમાં ચીનની રફતાર ધીમી રહેવાનું અનુમાન છે.

વૈશ્વિક અર્થવ્યવસ્થા: દુનિયાભરની વાત કરીએ તો, 2026 માં ગ્લોબલ ગ્રોથ 3.3% અને 2027 માં 3.2% રહેવાની ધારણા છે.

વિકસિત દેશોની સરખામણીએ ભારત જેવા વિકાસશીલ દેશો (Emerging Markets) નું પ્રદર્શન આવનારા વર્ષોમાં પણ શાનદાર રહેવાની શક્યતા છે. અમેરિકા, જર્મની અને જાપાન જેવા દેશો કરતા ભારતનો ગ્રોથ રેટ ઘણો ઊંચો રહેવાનું અનુમાન છે.

આ પણ વાંચો-Nitin Nabin BJP President: ભાજપમાં 'નવીન' યુગ! બિહારના 45 વર્ષીય નીતિન નબીન બન્યા સૌથી યુવા રાષ્ટ્રીય અધ્યક્ષ, જાણો કોનો રેકોર્ડ તોડ્યો