ટ્રમ્પ ફેડ પર ભડક્યા, ભારતના 7% ગ્રોથનો ઉલ્લેખ કરી અમેરિકી GDP 20% સુધી પહોંચવાનો દાવો
ડોનાલ્ડ ટ્રમ્પે અમેરિકાના ફેડરલ રિઝર્વના ઊંચા વ્યાજદરની ટીકા કરતાં ભારતના 7% GDP ગ્રોથનો ઉલ્લેખ કર્યો છે. તેમના મતે, ફેડ વ્યાજદર ઘટાડે તો અમેરિકાની GDP વૃદ્ધિ 15–20% સુધી પહોંચી શકે છે. જોકે અમેરિકામાં મોંઘવારી હજુ ફેડના 2% લક્ષ્યથી ઉપર છે. બીજી તરફ, ગોલ્ડમેન સૅક્સે 2027માં ભારતનો GDP ગ્રોથ 7.2% અને મોંઘવારી 5.7% રહેવાનો અંદાજ વ્યક્ત કર્યો છે. મોંઘવારીના દબાણને કારણે RBI રેપો રેટ વધારીને 6.25% કરી શકે છે.
ભારતના 7% GDP ગ્રોથનો દાખલો આપીને ટ્રમ્પે અમેરિકી ફેડને વ્યાજદર ઘટાડવાની સલાહ આપી. તેમનો દાવો છે કે દર ઘટાડવાથી અમેરિકાની GDP વૃદ્ધિ 20% સુધી પહોંચી શકે છે. બીજી તરફ, ગોલ્ડમેન સૅક્સે 2027માં ભારતના ગ્રોથ અને મોંઘવારી અંગે અનુમાન વ્યક્ત કર્યું છે.
Donald Trump Slams US Fed: અમેરિકાના રાષ્ટ્રપતિ ડોનાલ્ડ ટ્રમ્પે ભારતના મજબૂત આર્થિક વિકાસ અને પ્રમાણમાં ઓછા વ્યાજદરનો ઉલ્લેખ કરીને અમેરિકાના ફેડરલ રિઝર્વ પર નિશાન સાધ્યું છે. ટ્રમ્પનું કહેવું છે કે જો ફેડ વ્યાજદર ઘટાડે તો અમેરિકાની અર્થવ્યવસ્થા વાર્ષિક 14-15% અથવા તો 20% સુધીનો ગ્રોથ હાંસલ કરી શકે છે. તેમણે ફેડ પર આર્થિક વિકાસને અવરોધવાનો આરોપ લગાવ્યો છે.
શુક્રવારે વ્હાઇટ હાઉસમાં પત્રકારો સાથેની વાતચીત દરમિયાન ટ્રમ્પે ભારતના 7% GDP ગ્રોથનો ઉલ્લેખ કર્યો હતો. તેમણે કહ્યું કે ભારતમાં વ્યાજદર ઓછા હોવા છતાં આર્થિક વૃદ્ધિ મજબૂત છે. ટ્રમ્પના મતે, અમેરિકામાં પણ વ્યાજદર ઘટાડવામાં આવે તો આર્થિક વિકાસને વધુ વેગ મળી શકે છે.
ટ્રમ્પે કહ્યું કે જ્યારે અર્થતંત્રના સારા આંકડા સામે આવે ત્યારે ફેડએ વ્યાજદર વધારવાને બદલે ઘટાડવા જોઈએ. તેમણે એવો દાવો પણ કર્યો કે વ્યાજદર ઓછા હશે તો અમેરિકાની GDP 4% નહીં, પરંતુ 15% કે 20% સુધી વધી શકે છે અને દેશ પોતાનું દેવું પણ ઝડપથી ચૂકવી શકશે.
ફેડ પર રાજકીય વલણ અપનાવવાનો આરોપ
ટ્રમ્પે ફેડની નીતિઓ પર સવાલ ઉઠાવતા કહ્યું કે અમેરિકાની આર્થિક તાકાત અને અન્ય દેશોને મદદ કરવાની ભૂમિકાને ધ્યાનમાં રાખીને દેશમાં સૌથી ઓછા વ્યાજદર હોવા જોઈએ. તેમણે ફેડ પર રાજકીય વલણ અપનાવવાનો આરોપ લગાવ્યો અને કહ્યું કે સારા આર્થિક આંકડા આવે ત્યારે વ્યાજદર વધારવામાં આવે છે, જેની જગ્યાએ દર ઘટાડવા જોઈએ.
ફેડની નીતિ સામે ટ્રમ્પની માંગ
ટ્રમ્પની આ ટિપ્પણીઓ ફેડની વ્યાજદર નીતિ અંગે તેમની સાથે ચાલી રહેલા મતભેદોને ફરી ઉજાગર કરે છે. જોકે અમેરિકામાં મોંઘવારી હજુ પણ ફેડના 2%ના લાંબા ગાળાના લક્ષ્યથી ઉપર છે. સપ્ટેમ્બરમાં PCE મોંઘવારી દર 3.6% અને કોર PCE મોંઘવારી દર 3.1% રહ્યો હતો. ફેડ મોંઘવારીને નિયંત્રિત કરવા માટે વ્યાજદરનો ઉપયોગ કરે છે અને તે અમેરિકી સરકારથી સ્વતંત્ર રીતે કામ કરે છે.
ભારતની GDP ગ્રોથ અંગે ગોલ્ડમેન સૅક્સનો અંદાજ
બીજી તરફ, ગોલ્ડમેન સૅક્સના અંદાજ મુજબ ભારતની GDP ગ્રોથ 2026માં 7.9% રહેવાની ધારણા બાદ 2027માં 7.2% થઈ શકે છે. જ્યારે મોંઘવારી દર 2026ના 4.6%થી વધીને 2027માં 5.7% થઈ શકે છે. મોંઘવારીના દબાણને કારણે RBI નાણાકીય નીતિ થોડી કડક કરી શકે છે.
અલ નીનોની અસરથી હવામાનમાં ફેરફાર અને ઇનપુટ ખર્ચમાં વધારો મોંઘવારીનું જોખમ વધારી શકે છે. ગોલ્ડમેન સૅક્સના મતે, 2027ના અંત સુધી RBIનો રેપો રેટ 5.75%થી વધીને 6.25% થઈ શકે છે.
ભારતમાં ખાનગી રોકાણ આર્થિક વધારાને ટેકો આપતું રહેશે. 2026માં NSE 500 કંપનીઓનો કેપિટલ એક્સપેન્ડિચર વાર્ષિક ધોરણે 17% વધ્યો છે, જે છેલ્લા એક દાયકામાં બીજો સૌથી મોટો ગ્રોથ છે. ગોલ્ડમેન સૅક્સે આગામી 12 મહિનામાં ભારતીય રૂપિયો અમેરિકી ડોલર સામે 96ની આસપાસ રહેવાનો અંદાજ પણ વ્યક્ત કર્યો છે.