મુસાફરો માટે ખુશખબર! દક્ષિણ ભારતને મળશે નવી વંદે ભારત એક્સપ્રેસની ભેટ, જાણો સ્ટોપેજ અને ટાઇમિંગ

Bengaluru-Goa Vande Bharat: ભારતીય રેલવે ટૂંક સમયમાં દક્ષિણ ભારતના મુસાફરોને નવી વંદે ભારત એક્સપ્રેસની ભેટ આપવા જઈ રહી છે. રેલવે બોર્ડે બેંગલુરુના યશવંતપુરથી ગોવાના મડગાંવ વચ્ચે નવી વંદે ભારત એક્સપ્રેસ શરૂ કરવાની મંજૂરી આપી છે. આ સેમી-હાઇ સ્પીડ ટ્રેન પશ્ચિમ ઘાટની સુંદર પહાડીઓ, સકલેશપુર-સુબ્રમણ્ય રોડના મનમોહક ઘાટ વિસ્તાર અને કર્ણાટકના દરિયાકાંઠાના વિસ્તારોમાંથી પસાર થશે. લગભગ 13 કલાકની આ મુસાફરી મુસાફરો માટે આરામદાયક અને સુંદર નજારાઓથી ભરપૂર રહેવાની છે.

રેલવે બોર્ડે 30 ઓક્ટોબરે 26655/26656 યશવંતપુર-મડગાંવ-યશવંતપુર વંદે ભારત એક્સપ્રેસ શરૂ કરવાની મંજૂરી આપી છે. આ ચેર કાર સર્વિસ મેંગલુરુ જંક્શન થઈને દોડશે.

રેલવે મંત્રાલયના જણાવ્યા અનુસાર, આ ટ્રેન અઠવાડિયામાં 6 દિવસ દોડશે. યશવંતપુરથી બુધવારે અને મડગાંવથી ગુરુવારે ટ્રેનની સેવા ઉપલબ્ધ રહેશે નહીં. બાકીના દિવસોમાં નિયમિત રીતે ટ્રેનનું સંચાલન કરવામાં આવશે.

ટ્રેનનું સમયપત્રક નીચે મુજબ છે:

- યશવંતપુરથી મડગાંવ (26655): ટ્રેન બેંગલુરુના યશવંતપુરથી સવારે 7:35 વાગ્યે ઉપડશે અને તે જ દિવસે રાત્રે 8:55 વાગ્યે ગોવાના મડગાંવ પહોંચશે.

- મડગાંવથી યશવંતપુર (26656): પરત ફરતી વખતે ટ્રેન મડગાંવથી સવારે 8:20 વાગ્યે ઉપડશે અને રાત્રે 9:15 વાગ્યે યશવંતપુર પહોંચશે.

ટ્રેનના રેક અને મેન્ટેનન્સની વ્યવસ્થા

આ નવી સર્વિસ માટે વંદે ભારતના બે રેક તહેનાત કરવામાં આવશે. આ બંને રેકનું મેન્ટેનન્સ યશવંતપુર અને મડગાંવ ખાતે કરવામાં આવશે. જ્યારે ટ્રેનમાં પાણી ભરવાની વ્યવસ્થા મેંગલુરુ જંક્શન પર રાખવામાં આવશે.

યશવંતપુર-મડગાંવ વંદે ભારતનો રૂટ અને સ્ટોપેજ

નવી વંદે ભારત એક્સપ્રેસ કર્ણાટકના આંતરિક વિસ્તારો અને દરિયાકાંઠાના વિસ્તારોને જોડશે. આ ટ્રેન અનેક મહત્વપૂર્ણ ધાર્મિક અને પર્યટન સ્થળો પરથી પસાર થશે. તેના મુખ્ય સ્ટોપેજ નીચે મુજબ છે:

- શ્રવણબેલગોળા (Shravanabelagola)

- હાસન (Hassan)

- સકલેશપુર (Sakleshpur)

- સુબ્રમણ્ય રોડ (Subrahmanya Road)

- કબકા પુત્તુર (Kabaka Puttur)

- મેંગલુરુ જંક્શન (Mangaluru Junction)

- ઉડુપી (Udupi)

- કુંદાપુરા (Kundapura)

- મૂકાંબિકા રોડ બાયંદૂર (Mookambika Road Byndoor)

- મુરુદેશ્વર (Murdeshwar)

- ગોકર્ણ રોડ (Gokarna Road)

- કારવાર (Karwar)

આ રૂટ પશ્ચિમ ઘાટના સુંદર કુદરતી નજારા અને કર્ણાટકના દરિયાકાંઠાના વિસ્તારોમાંથી પસાર થતો હોવાથી મુસાફરોને મુસાફરી દરમિયાન સુંદર દૃશ્યોનો આનંદ માણવા મળશે.

એક જૂની વંદે ભારત ટ્રેન બંધ કરવાનો નિર્ણય

નવી યશવંતપુર-મડગાંવ વંદે ભારત સર્વિસ શરૂ કરવાની મંજૂરીની સાથે જ રેલવે બોર્ડે એક જૂની વંદે ભારત ટ્રેન બંધ કરવાનો નિર્ણય લીધો છે.

ઓછા મુસાફરો મળતા હોવાના કારણસર હાલની 20645/20646 મેંગલુરુ સેન્ટ્રલ-મડગાંવ વંદે ભારત એક્સપ્રેસ સેવા બંધ કરવામાં આવશે.

જોકે, નવી યશવંતપુર-મડગાંવ વંદે ભારત એક્સપ્રેસના સત્તાવાર ઉદ્ઘાટનની તારીખ અને ટિકિટ ભાડાની જાહેરાત હજુ કરવામાં આવી નથી. રેલવે દ્વારા ટૂંક સમયમાં તેના સંચાલનની તારીખ જાહેર કરવામાં આવે તેવી અપેક્ષા છે.