પાકિસ્તાની સેનાનો 'જિહાદી ચહેરો' પડ્યો ખુલ્લો, સરાજાહેર જિહાદને પ્રોત્સાહન આપતું આપ્યું નિવેદન

પાકિસ્તાની સેનાએ ખુલ્લેઆમ ઇસ્લામિક જિહાદને પ્રોત્સાહન આપતું નિવેદન કર્યું છે, જેનાથી પાકિસ્તાનની સેના એક નિયમિત સૈન્ય દળ છે કે પછી ગણવેશની આડમાં 'જિહાદ ફી સબીલિલ્લાહ' (અલ્લાહના માર્ગે સંઘર્ષ) કરતું જિહાદી સંગઠન છે તેવા સવાલો ઉભા થયા છે. પાકિસ્તાનના ઇન્ટર-સર્વિસ પબ્લિક રિલેશન્સ (DG-ISPR)ના ડિરેક્ટર જનરલ લેફ્ટનન્ટ જનરલ અહમદ શરીફે રવિવારે એક પ્રેસ કોન્ફરન્સમાં જાહેર કર્યું કે ઇસ્લામ માત્ર દરેક સૈનિકની વ્યક્તિગત આસ્થાનો ભાગ નથી, પરંતુ તે સેનાની તાલીમ અને કામગીરીનો પણ આધારસ્તંભ છે.

"ઇસ્લામ અમારા વિચારો અને કાર્યોની પ્રેરણા"

જનરલ શરીફને પાકિસ્તાની સેનાના 'બુનયાન-એ-મર્સૂસ' ઓપરેશન અને ભારતીય નાગરિકો પરના હુમલાઓ અંગે સવાલો પૂછવામાં આવ્યા હતા. જ્યારે તેમને પૂછવામાં આવ્યું કે શું આ ઓપરેશનો અલ્લાહના બતાવેલા માર્ગ પર થઈ રહ્યા છે, તો તેમણે સ્પષ્ટ જણાવ્યું, "ઇસ્લામ અમારા વિચારો અને કાર્યોની પ્રેરણા છે. તે માત્ર અમારી વ્યક્તિગત આસ્થા નથી, પરંતુ અમારી તાલીમ અને ઓપરેશનનો આધાર પણ છે. આ જ અમારી શક્તિ છે અને આ જ અમને માર્ગદર્શન આપે છે."

તેમણે પાકિસ્તાની સેનાના નારા 'ઈમાન, તકવા, જિહાદ ફી સબીલિલ્લાહ' (આસ્થા, પવિત્રતા, અલ્લાહના માર્ગે સંઘર્ષ)નો ઉલ્લેખ કરતાં કહ્યું કે, "અમારા સેનાપ્રમુખ પણ આ આસ્થામાં ઊંડો વિશ્વાસ રાખે છે, અને આ આસ્થા અમારા ઓપરેશનોમાં પ્રતિબિંબિત થાય છે."

‘બુનયાન-એ-મર્સૂસ' નામના સૈન્ય ઓપરેશનની ચર્ચા કરતાં જનરલ શરીફે કુરાનની એક આયતનો ઉલ્લેખ કર્યો, જેમાં જણાવાયું છે કે, "જેઓ અલ્લાહ માટે લડે છે, તેઓ એક સ્ટીલની દિવાલની જેમ હોય છે." આ નિવેદનથી પાકિસ્તાની સેના અને જિહાદી તત્વો તેમજ લશ્કર-એ-તૈયબા અને જૈશ-એ-મોહમ્મદ જેવા આતંકવાદી સંગઠનો વચ્ચેની રેખા વધુ અસ્પષ્ટ થઈ ગઈ છે. આ સંગઠનો દાયકાઓથી કાશ્મીર અને ભારતના અન્ય ભાગોમાં આતંક ફેલાવી રહ્યા છે.

જનરલ શરીફની વિવાદાસ્પદ પૃષ્ઠભૂમિ

જનરલ અહમદ શરીફ આ દિવસોમાં માત્ર તેમની સૈન્ય ભૂમિકા માટે જ નહીં, પરંતુ તેમની વ્યક્તિગત પૃષ્ઠભૂમિને કારણે પણ ચર્ચામાં છે. સોશિયલ મીડિયા પર ફેલાયેલી માહિતી અનુસાર, તેમના પિતા મહમૂદ સુલ્તાન બશીરુદ્દીન પાકિસ્તાન એટોમિક એનર્જી કમિશનમાં વૈજ્ઞાનિક હતા. તેઓ કટ્ટરપંથી સંગઠનો સાથે સંકળાયેલા હતા અને કથિત રીતે અલ-કાયદાના નેતા ઓસામા બિન લાદેનના નજીકના સાથીદાર હતા.

પહેલગામ હુમલો અને વધતો તનાવ

આ નિવેદન એવા સમયે આવ્યું છે જ્યારે ભારત અને પાકિસ્તાન વચ્ચે જમ્મુ-કાશ્મીરના પહેલગામમાં થયેલા આતંકવાદી હુમલા બાદ તનાવ ચરમસીમાએ છે. 22 એપ્રિલે થયેલા આ હુમલામાં 26 લોકો માર્યા ગયા હતા, જેમાં એક નેપાળી પ્રવાસીનો પણ સમાવેશ થાય છે. ભારતે આ હુમલા માટે પાકિસ્તાન-સમર્થિત આતંકવાદી જૂથોને જવાબદાર ઠેરવ્યા છે. જવાબમાં, ભારતે 'ઓપરેશન સિંદૂર' શરૂ કર્યું, જેમાં પાકિસ્તાન અને પાકિસ્તાન અધિકૃત કાશ્મીર (PoK)માં નવ આતંકવાદી ઠેકાણાઓ પર ચોક્કસ હુમલા કરવામાં આવ્યા.

પાકિસ્તાની સેનાપ્રમુખનું વિવાદાસ્પદ નિવેદન

પહેલગામ હુમલાના થોડા દિવસો પહેલાં, પાકિસ્તાનના સેનાપ્રમુખ જનરલ અસીમ મુનીરે એક ભાષણમાં જણાવ્યું હતું, "મુસલમાનો હિન્દુઓથી દરેક રીતે અલગ છે... બે-રાષ્ટ્ર સિદ્ધાંત અમારી ઓળખનો આધાર છે." તેમણે કાશ્મીરને પાકિસ્તાનની "જુગુલર વેઈન" (જીવનરેખા) ગણાવ્યું હતું, જેના પર ભારતે સખત વાંધો ઉઠાવ્યો હતો.

ભારતની ચેતવણી

નવી દિલ્હીમાં ભારતીય વાયુસેનાના એર માર્શલ એ.કે. ભારતીએ પાકિસ્તાનને સ્પષ્ટ ચેતવણી આપી છે. તેમણે કહ્યું, "જો યુદ્ધવિરામના કરારનું ઉલ્લંઘન થશે, તો દુશ્મનને યોગ્ય જવાબ આપવામાં આવશે." એર માર્શલ ભારતીએ એમ પણ ઉમેર્યું કે ભારતીય સશસ્ત્ર દળો કોઈપણ પ્રકારના જોખમનો સામનો કરવા માટે સંપૂર્ણ રીતે તૈયાર છે.

આ પણ વાંચો - PM Modi Address to Nation: પાકિસ્તાન સાથે ફક્ત PoK મુદ્દે જ વાતચીત થશે, PM મોદીએ દુશ્મન દેશને આપ્યો સ્પષ્ટ સંદેશ