PM Modi Mauritius visit: મોરેશિયસમાં પીએમ મોદીનું ઉષ્માભર્યું સ્વાગત, રાષ્ટ્રીય દિવસની ઉજવણીમાં લઈ રહ્યાં છે ભાગ

PM Modi Mauritius visit: પ્રધાનમંત્રી નરેન્દ્ર મોદી બે દિવસની મોરેશિયસની મુલાકાતે ગયા છે. મોરેશિયસ પહોંચતા પીએમ મોદીનું ઉષ્માભર્યું સ્વાગત કરવામાં આવ્યું. આ મુલાકાતનો મુખ્ય ઉદ્દેશ્ય ભારત અને મોરેશિયસ વચ્ચેના સંબંધોને વધુ મજબૂત બનાવવાનો અને બંને દેશો વચ્ચે સહયોગને પ્રોત્સાહન આપવાનો છે. પીએમ મોદીની આ મુલાકાત મોરેશિયસના પ્રધાનમંત્રી નવીનચંદ્ર રામગુલામના આમંત્રણ પર થઈ રહી છે. આ મુલાકાત દરમિયાન તેઓ મોરેશિયસના રાષ્ટ્રીય દિવસની ઉજવણીમાં પણ હાજરી આપશે. મોરેશિયસ 12 માર્ચે તેનો રાષ્ટ્રીય દિવસ ઉજવે છે.

પ્રધાનમંત્રીની મુલાકાતનો હેતુ

"આ મુલાકાત ભારત અને મોરેશિયસ વચ્ચેના સંબંધોમાં એક નવો અને તેજસ્વી અધ્યાય ઉમેરશે," મોરેશિયસ જતા પહેલા વડા પ્રધાન મોદીએ એક નિવેદનમાં જણાવ્યું હતું. તેમણે એમ પણ કહ્યું કે તેમની મુલાકાત "SAGAR વિઝન"નો એક ભાગ છે, જેનો ઉદ્દેશ્ય હિંદ મહાસાગર ક્ષેત્રમાં સુરક્ષા, વિકાસ અને સહયોગને પ્રોત્સાહન આપવાનો છે. 'SAGAR'નો અર્થ "પ્રદેશમાં બધા માટે સુરક્ષા અને વિકાસ" થાય છે. પીએમ મોદીએ કહ્યું, "અમારા પ્રયાસોનું કેન્દ્ર હંમેશા આપણા લોકોની પ્રગતિ અને સમૃદ્ધિ તેમજ પ્રાદેશિક સુરક્ષા અને વિકાસ રહેશે."

પ્રધાનમંત્રીએ મોરેશિયસને નજીકના દરિયાઈ પાડોશી, હિંદ મહાસાગરમાં મુખ્ય ભાગીદાર અને આફ્રિકન ખંડના પ્રવેશદ્વાર તરીકે વર્ણવ્યું. તેમણે કહ્યું, "આપણે ઇતિહાસ, ભૂગોળ અને સંસ્કૃતિ દ્વારા એકબીજા સાથે ઊંડાણપૂર્વક જોડાયેલા છીએ. બંને દેશો વચ્ચેનો ઊંડો પરસ્પર વિશ્વાસ, લોકશાહીના મૂલ્યોમાં સહિયારી માન્યતા અને વિવિધતામાં ગર્વ એ આપણી શક્તિ છે." પીએમ મોદીએ એમ પણ કહ્યું કે ભારત અને મોરેશિયસ વચ્ચેના ગાઢ અને ઐતિહાસિક સંબંધો સહિયારા ગર્વનો સ્ત્રોત છે.

બંને દેશો વચ્ચે ગાઢ ભાગીદારી

પ્રધાનમંત્રી મોદીએ નોંધ્યું હતું કે છેલ્લા 10 વર્ષોમાં, અનેક લોકોલક્ષી પહેલો દ્વારા બંને દેશો વચ્ચેના સંબંધોમાં નોંધપાત્ર પ્રગતિ થઈ છે. તેમણે કહ્યું કે ભારત મોરેશિયસના સૌથી મોટા વેપારી ભાગીદારોમાંનો એક છે. બંને દેશો વચ્ચે વેપાર અને આર્થિક સહયોગ વધુ મજબૂત બની રહ્યો છે. સિંગાપોર પછી મોરેશિયસ 2023-24 માટે ભારતમાં વિદેશી સીધા રોકાણ (FDI)ના બીજા સૌથી મોટા સ્ત્રોત તરીકે ઉભરી આવ્યું છે.

ભારતીય લશ્કરી દળોની ભાગીદારી

પ્રધાનમંત્રી મોદીની મુલાકાત દરમિયાન, ભારતીય સશસ્ત્ર દળો, ભારતીય નૌકાદળનું યુદ્ધ જહાજ અને ભારતીય વાયુસેનાની આકાશ ગંગા 'સ્કાયડાઇવિંગ ટીમ' પણ મોરેશિયસના રાષ્ટ્રીય દિવસની ઉજવણીમાં ભાગ લેશે.

આ પણ વાંચો- Telegramનું નવું અપડેટ, પ્રાઇવસી ટૂલની મદદથી બંધ થશે સ્પામ મેસેજ, જાણો કેવી રીતે કરશે કામ?