SEBI PMS Rules: સેબી કસશે શિકંજો! PMS નિયમોમાં થશે મોટા ફેરફાર, જૂન 2026 સુધીમાં આવશે નવું માળખું

SEBI, PMS Regulations: ભારતીય શેરબજારના નિયમનકાર એટલે કે સેબી (SEBI) હવે પોર્ટફોલિયો મેનેજમેન્ટ સર્વિસ (PMS) ઈન્ડસ્ટ્રી પર પોતાની પકડ મજબૂત કરવા જઈ રહ્યું છે. જો તમે પણ PMS માં રોકાણ કરો છો અથવા કરવાનું વિચારી રહ્યા છો, તો આ સમાચાર તમારા કામના છે. સેબીના ચેરમેન તુહિન કાંત પાંડેએ સોમવારે સ્પષ્ટ સંકેત આપ્યા છે કે PMS રેગ્યુલેશન્સની વ્યાપક સમીક્ષા કરવામાં આવશે. આનો સીધો અર્થ છે કે આગામી સમયમાં આ સેક્ટર માટેના નિયમો અને શરતો વધુ કડક બની શકે છે.

નિયમોમાં ફેરફાર શા માટે?

એક PMS કોન્ક્લેવમાં વાત કરતા સેબી ચેરમેને જણાવ્યું હતું કે, સેબી 'પોર્ટફોલિયો મેનેજર રેગ્યુલેશન્સ 2020' ની ફરીથી સમીક્ષા કરશે. માર્કેટની સ્થિતિ સતત બદલાતી રહે છે, તેથી નિયમો પણ તે મુજબ અસરકારક અને ફ્લેક્સિબલ હોવા જરૂરી છે.

તુહિન કાંત પાંડેએ કહ્યું હતું કે, "અમે PMS નિયમોની સંપૂર્ણ સમીક્ષાનો પ્રસ્તાવ મૂક્યો છે જેથી આ માળખું મજબૂત રહે. જોકે, માત્ર નિયમો બનાવવાથી જ ઈન્ડસ્ટ્રી મજબૂત નથી થતી, પોર્ટફોલિયો મેનેજરોએ પણ સારા ગવર્નન્સ અને નૈતિક આચરણ પર ધ્યાન આપવું પડશે."

સેબી જૂન 2026 માં યોજાનારી બોર્ડ મીટિંગમાં આ સમીક્ષા કરી શકે છે. આ પ્રક્રિયા સેબીના મોટા સુધારાનો જ એક ભાગ હશે. જેમાં માત્ર PMS જ નહીં, પરંતુ સેટલમેન્ટના નિયમો, ટેકઓવરના નિયમો અને લિસ્ટિંગ (LODR) નિયમોને પણ સરળ બનાવવાની યોજના છે.

નિયમો બનાવતા પહેલા સેબી ઈન્ડસ્ટ્રીના લોકો પાસેથી ફીડબેક લેશે કે ક્યાં સુધારાની જરૂર છે. ત્યારબાદ એક 'કન્સલ્ટેશન પેપર' બહાર પાડવામાં આવશે.

મિસ-સેલિંગ પર લાગશે બ્રેક

ઘણીવાર રોકાણકારોને ખોટી સ્કીમ પધરાવી દેવામાં આવે છે, જેને 'મિસ-સેલિંગ' કહેવાય છે. સેબી ચેરમેને PMS ઈન્ડસ્ટ્રીને કડક શબ્દોમાં કહ્યું છે કે તેઓ મિસ-સેલિંગથી બચે. તેમણે કહ્યું કે ક્લાયન્ટની રિસ્ક પ્રોફાઈલ (જોખમ લેવાની ક્ષમતા) તપાસ્યા પછી જ તેમને યોગ્ય પ્રોડક્ટ આપવી જોઈએ. ગ્રાહકો સાથેની વાતચીત એકદમ સ્પષ્ટ અને તથ્યો પર આધારિત હોવી જોઈએ.

PMS ઈન્ડસ્ટ્રીનો વ્યાપ અને આંકડા

જાન્યુઆરી 2026 સુધીના આંકડા જોઈએ તો, PMS ઈન્ડસ્ટ્રી પાસે લગભગ 2.15 લાખ ક્લાયન્ટ હતા. આ ઉપરાંત, મેનેજમેન્ટ હેઠળની એસેટ્સ (EPFO અને PF સિવાય) અંદાજે 10.5 લાખ કરોડ રૂપિયા હતી. આ ઈન્ડસ્ટ્રી વાર્ષિક 17% ના દરે ગ્રોથ કરી રહી છે, જે દર્શાવે છે કે રોકાણકારોનો રસ તેમાં વધી રહ્યો છે.

પ્રી-IPO ટ્રેડિંગ પર સેબીની નજર

આ સિવાય સેબી ગ્રે માર્કેટ એટલે કે પ્રી-IPO ટ્રેડિંગ પર પણ લગામ કસવાની તૈયારીમાં છે. જે કંપનીઓ જલ્દી લિસ્ટ થવાની છે (To-be-listed), તેમના શેર્સ માટે એક્સચેન્જ પર જ કોઈ મિકેનિઝમ લાવવા પર વિચાર ચાલી રહ્યો છે. આનાથી ગ્રે માર્કેટની અનિયમિતતાઓ પર કાબૂ મેળવી શકાશે. આ અંગે પણ ટૂંક સમયમાં કન્સલ્ટેશન પેપર આવી શકે છે.

અંતમાં, તેમણે જણાવ્યું હતું કે કેટલીક એગ્રીકલ્ચર કોમોડિટીઝ (કૃષિ પેદાશો) ના ટ્રેડિંગ પર જે પ્રતિબંધ છે, તેની સમીક્ષા કરવા માટે પણ સેબી સરકારના સંબંધિત મંત્રાલયો સાથે વાતચીત કરી રહ્યું છે.

આ પણ વાંચો-Sectoral and Thematic Funds: રોકાણકારોનો મોહ ભંગ? જાન્યુઆરીમાં રોકાણ 88% ઘટ્યું, જાણો હવે શું કરવું