Donald Trump Tariff: ટ્રમ્પના ટેરિફનું ટેન્શન આજથી થશે શરૂ... વ્હાઇટ હાઉસનું નિવેદન, ભારત સહિત અનેક દેશો સામેલ

Donald Trump Tariff: અમેરિકા આજથી (2 એપ્રિલ 2025) વિશ્વભર માટે પોતાના જવાબી ટેરિફ લાગુ કરવાની તૈયારીમાં છે. આની અસર ભારત સહિત વિશ્વના અનેક દેશો પર પડશે. આજથી આ ટેરિફ અમલમાં આવી જશે. વ્હાઇટ હાઉસના પ્રેસ સેક્રેટરી કેરોલિન લીવિટે જણાવ્યું કે, "મને લાગે છે કે ટેરિફની જાહેરાત આજે (2 એપ્રિલ 2025) થશે. રાષ્ટ્રપતિ ડોનાલ્ડ ટ્રમ્પ આ મુદ્દે લાંબા સમયથી ચર્ચા કરી રહ્યા હતા." તેમણે ઉમેર્યું કે રાષ્ટ્રપતિ ટ્રમ્પ 2 એપ્રિલને 'લિબરેશન ડે' તરીકે ઉજવવા માગે છે.

આ માટે તેઓ પોતાના વેપારી સલાહકારો સાથે મળીને ટેરિફ યોજનાને અંતિમ સ્વરૂપ આપી રહ્યા છે. ટ્રમ્પ આજે સાંજે 4 વાગે (લોકલ ટાઇમ) વ્હાઇટ હાઉસના રોઝ ગાર્ડનમાં ઔપચારિક જાહેરાત કરશે. આ જાહેરાતમાં ટેરિફની સંપૂર્ણ માહિતી આપવામાં આવશે. ટ્રમ્પના આ નિર્ણયથી મોટી અર્થવ્યવસ્થા ધરાવતા દેશોની ચિંતા વધી ગઈ છે. આનાથી વૈશ્વિક વેપાર યુદ્ધ શરૂ થવાની શક્યતા વ્યક્ત કરવામાં આવી રહી છે.

ચર્ચા માટે રસ્તા ખુલ્લા છે - વ્હાઇટ હાઉસ

પ્રેસ સેક્રેટરી કેરોલિન લીવિટે જણાવ્યું કે રાષ્ટ્રપતિ ડોનાલ્ડ ટ્રમ્પ હંમેશા ચર્ચા માટે તૈયાર છે. જો કોઈ વિદેશી નેતા કે ઉદ્યોગપતિ રાહત મેળવવા માગે છે, તો તેઓ તેમની સાથે વાતચીત કરવા તૈયાર છે. લીવિટે કહ્યું કે ટ્રમ્પનું ધ્યાન અમેરિકી કામદારોને યોગ્ય તકો પૂરી પાડવા પર કેન્દ્રિત છે. તેમણે ઉમેર્યું કે અનેક દેશોએ રાષ્ટ્રપતિની યોજનાઓ અંગે વહીવટીતંત્રનો સંપર્ક કર્યો છે. "રાષ્ટ્રપતિ હંમેશા ફોન પર ઉપલબ્ધ હોય છે," તેમણે કહ્યું. અમેરિકાના રાષ્ટ્રપતિ ડોનાલ્ડ ટ્રમ્પે જણાવ્યું હતું કે તેઓ 2 એપ્રિલથી નવા ટેરિફ લાગુ કરશે. તેમના આ નિર્ણયની કેનેડા, મેક્સિકો અને ભારત પર મોટી અસર પડી શકે છે.

ટેરિફ એક પ્રકારનો કર (ટેક્સ) છે, જે સરકારો આયાત (ઇમ્પોર્ટ) અથવા નિકાસ (એક્સપોર્ટ) થતી વસ્તુઓ અને સર્વિસ પર લગાવે છે. તેનો હેતુ દેશની અર્થવ્યવસ્થાને નિયંત્રિત કરવી, સ્થાનિક ઉદ્યોગોને સુરક્ષા આપવી, આવક મેળવવી અને વેપારમાં સંતુલન જાળવવાનો છે. સરળ શબ્દોમાં, જો કોઈ દેશ અમેરિકી ઉત્પાદનો પર 10 ટકા આયાત શુલ્ક લગાવે છે, તો અમેરિકા પણ તે દેશમાંથી આવતા માલ પર 10 ટકાનો ટેરિફ લગાવી શકે છે.

આ પણ વાંચો- UPI માટે માર્ચ મહિનો રહ્યો ઐતિહાસિક, પરંતુ સરકારનો આ ટાર્ગેટ ના થયો પૂર્ણ