8th Pay Commission: બેંગલુરુમાં યોજાશે મોટી બેઠક, બેઝિક પગાર 69000 અને પેન્શન અંગે થશે 5 મોટા નિર્ણયો?

8th Pay Commission: કેન્દ્રીય કર્મચારીઓ અને પેન્શનરો માટે મોટા સમાચાર આવી રહ્યા છે. 8મા પગાર પંચની બેઠકોનો સિલસિલો હવે બેંગલુરુ પહોંચ્યો છે. આગામી 7 અને 8 ઓક્ટોબરના રોજ બેંગલુરુમાં એક ખૂબ જ મહત્વની બેઠક યોજાવા જઈ રહી છે. આ બે દિવસીય પ્રવાસ દરમિયાન કર્મચારી યુનિયન અને પેન્શનરોના પ્રતિનિધિઓ સાથે સીધી અને વિસ્તૃત ચર્ચા કરવામાં આવશે.

આ બેઠકમાં ભાગ લેવા અને પોતાની માંગણીઓ રજૂ કરવા માટે કર્મચારી સંઘો અને પેન્શનર સંગઠનોને 18 સપ્ટેમ્બર સુધી સત્તાવાર પોર્ટલ પર અરજી કરવાનો સમય આપવામાં આવ્યો હતો. હવે આયોગ આ તમામ પ્રતિનિધિઓ અને હિતધારકો સાથે સામસામે બેસીને ચર્ચા કરશે.

કયા મુખ્ય મુદ્દાઓ પર થશે ચર્ચા?

બેંગલુરુની આ બેઠકમાં કેન્દ્ર સરકારના કર્મચારીઓ, પેન્શનરો, રેલવે, સંરક્ષણ વિભાગ, આવકવેરા અને અન્ય કેન્દ્રીય વિભાગોના પ્રતિનિધિઓ સામેલ થશે. ચર્ચાનું મુખ્ય ફોકસ આ 5 બાબતો પર રહેશે:

પેન્શન અને રિટાયરમેન્ટના ફાયદા: પેન્શનરોના પેન્શનમાં સુધારો કરવો, કમ્યુટેશનનો સમયગાળો ઘટાડવો અને ફેમિલી પેન્શનના નિયમો વધુ સરળ બનાવવા.

ભથ્થાં: બેંગલુરુ જેવા ઝડપથી વિકસતા અને મોંઘા શહેરો માટે હાઉસ રેન્ટ એલાઉન્સ (HRA), ટ્રાન્સપોર્ટ અને મેડિકલ સુવિધાઓમાં વધારો કરવા પર ચર્ચા.

વાર્ષિક ઇન્ક્રીમેન્ટ: હાલમાં દર વર્ષે 3% પગાર વધારો મળે છે, આ દરની સમીક્ષા કરી તેને વધારવાની માંગ પર વિચાર.

પ્રમોશન અને કામકાજની સ્થિતિ: સમયસર પ્રમોશન અને કેડર પુનર્ગઠન સાથે જોડાયેલા સ્થાનિક મુદ્દાઓનું નિરાકરણ.

કર્મચારી યુનિયનોની 5 સૌથી મોટી માંગણીઓ

નેશનલ કાઉન્સિલ-JCM અને અન્ય કર્મચારી યુનિયનો 8મા પગાર પંચ સમક્ષ આ 5 મુખ્ય માંગણીઓ મક્કમતાથી રાખશે:

ન્યૂનતમ બેઝિક પગાર 69,000 રૂપિયા કરવો: હાલમાં સૌથી ઓછો બેઝિક પગાર 18,000 રૂપિયા છે. કર્મચારી યુનિયનોની માંગ છે કે મોંઘવારીને ધ્યાનમાં રાખીને તેને વધારીને સીધો 69,000 રૂપિયા પ્રતિ માસ કરવામાં આવે.

ફિટમેન્ટ ફેક્ટર 3.833 થાય: પગારમાં વધારો ગણવા માટે 3.833 ફિટમેન્ટ ફેક્ટર લાગુ કરવાનો પ્રસ્તાવ છે.

5-યુનિટ ફેમિલી ફોર્મ્યુલા: લઘુત્તમ પગાર નક્કી કરતી વખતે માત્ર કર્મચારી જ નહીં, પરંતુ પત્ની, બાળકો અને આશ્રિત માતા-પિતાને પણ ગણતરીમાં લઈને '5-યુનિટ ફોર્મ્યુલા' લાગુ કરવામાં આવે.

વાર્ષિક ઇન્ક્રીમેન્ટ 6% થાય: હાલનું 3% વાર્ષિક ઇન્ક્રીમેન્ટ પૂરતું નથી, તેને વધારીને 6% કરવામાં આવે તેવી જોરદાર માંગ છે.

કમ્યુટેડ પેન્શન બહાલી: કમ્યુટેડ પેન્શન ફરીથી રાબેતા મુજબ થવાનો સમયગાળો જે હાલ 15 વર્ષ છે, તે ઘટાડીને 11 વર્ષ કરવાનો પ્રસ્તાવ મુકાયો છે.

હાલમાં આ તમામ આંકડાઓ અને શરતો માત્ર કર્મચારી યુનિયનો દ્વારા રાખવામાં આવેલી માંગણીઓ છે. 8મા પગાર પંચની સમીક્ષા, તેમની ભલામણો અને ત્યારબાદ કેન્દ્ર સરકારની અંતિમ મંજૂરી મળ્યા પછી જ નવી સેલેરી અને પેન્શનના દરો સત્તાવાર રીતે લાગુ થશે. હાલ સૌની નજર બેંગલુરુમાં યોજાનારી આ મહત્વની બેઠક પર છે.

આ પણ વાંચો- "દુનિયા કરતા વધુ મજબૂત છે ભારતની ઈકોનોમી!" વૈશ્વિક મંદી વચ્ચે પૂર્વ ECB ચીફનો મોટો દાવો, જાણો શું છે ભારતની સૌથી મોટી તાકાત?