ECHSમાં મોટો ફેરફાર: ભૂતપૂર્વ સૈનિકો અને તેમના પરિવારો માટે સારવારના નિયમો બદલાયા, જાણો ખર્ચ પર શું થશે અસર

ECHS new rules: દેશના લાખો ભૂતપૂર્વ સૈનિકો અને તેમના પરિવારો માટે એક મોટા અને રાહતના સમાચાર આવ્યા છે. સરકારે એક્સ-સર્વિસમેન કોન્ટ્રિબ્યુટરી હેલ્થ સ્કીમ (ECHS) હેઠળ મળતી સારવારના નિયમો અને દરોમાં મોટો ફેરફાર કરવાની જાહેરાત કરી છે. આરોગ્ય મંત્રાલય દ્વારા જાહેર કરાયેલ નોટિફિકેશન મુજબ, હવે ECHS ના લાભાર્થીઓને પણ સેન્ટ્રલ ગવર્નમેન્ટ હેલ્થ સ્કીમ (CGHS) ની નવી યાદી મુજબ જ સારવારનો ખર્ચ મળશે.

આ નવા નિયમો 15 ડિસેમ્બર 2025 થી સમગ્ર દેશમાં લાગુ થશે. આ ફેરફારથી OPD સારવાર, હોસ્પિટલમાં દાખલ થવાનો ખર્ચ, દવાઓ અને બિલની પરત ચુકવણી જેવી તમામ બાબતોમાં એકરૂપતા આવશે, જેનો સીધો ફાયદો લાખો ભૂતપૂર્વ સૈનિક પરિવારોને મળશે.

હવે શહેર અને હોસ્પિટલના આધારે નક્કી થશે ખર્ચ

પહેલાની જેમ કેશલેસ સારવારની સુવિધા તો ચાલુ જ રહેશે, પરંતુ હવે સારવારનો ખર્ચ બે મુખ્ય બાબતો પર નક્કી થશે:

હોસ્પિટલ કયા શહેરમાં આવેલી છે.

હોસ્પિટલની ગુણવત્તા મુજબ દરોમાં ફેરફાર

જે હોસ્પિટલો પાસે સારી ગુણવત્તાનું પ્રમાણપત્ર નથી, તેમને સરકાર દ્વારા નક્કી કરેલા દર કરતાં 15% ઓછા પૈસા મળશે. જ્યારે મોટા અને ઉચ્ચ ગુણવત્તાવાળા એડવાન્સ હોસ્પિટલોને 15% વધુ રકમ ચૂકવવામાં આવશે.

શહેરોના આધારે નવી સિસ્ટમ

સરકારે શહેરોને ત્રણ કેટેગરીમાં વહેંચ્યા છે, જેના આધારે સારવારના દર અલગ-અલગ હશે.

ટીયર-1 (મોટા શહેરો): અહીં નક્કી કરેલો પૂરો દર લાગુ થશે.

ટીયર-2 (મધ્યમ શહેરો): અહીં મૂળ દર કરતાં 10% ઓછો ખર્ચ મળશે.

ટીયર-3 (નાના શહેરો): અહીં મૂળ દર કરતાં 20% ઓછો ખર્ચ મળશે.

ખાસ વાત એ છે કે પૂર્વોત્તર રાજ્યો, જમ્મુ-કાશ્મીર અને લદ્દાખ જેવા વિસ્તારોને ટીયર-2 કેટેગરીમાં રાખવામાં આવ્યા છે. આનો અર્થ એ થયો કે હવે દિલ્હી, ગુવાહાટી કે કોઈ નાના શહેરમાં સારવાર કરાવવાનો ખર્ચ અલગ-અલગ હશે.

વોર્ડના આધારે પણ ખર્ચ બદલાશે

નવા નિયમોમાં સેમી-પ્રાઇવેટ વોર્ડના દરને આધાર બનાવવામાં આવ્યો છે.

જનરલ વોર્ડ: મૂળ દર કરતાં 5% ઓછો ખર્ચ.

સેમી-પ્રાઇવેટ વોર્ડ: સામાન્ય (નક્કી કરેલો) દર.

પ્રાઇવેટ વોર્ડ: મૂળ દર કરતાં 5% વધુ ખર્ચ.

હોસ્પિટલ દર્દીના ECHS કાર્ડમાં ઉલ્લેખિત વોર્ડના આધારે જ બિલ બનાવશે. જોકે, OPD, અમુક ખાસ સારવાર, મેડિકલ તપાસ અને ડે-કેર જેવી સેવાઓ માટેના દર બધા માટે સમાન રહેશે. કેન્સરના ઓપરેશન જૂના દરે જ થશે, પરંતુ કીમોથેરાપી અને રેડિયેશન જેવી સારવાર નવા દર મુજબ મળશે.

આ ફેરફાર શા માટે જરૂરી હતો?

ECHS યોજના દેશભરમાં લાખો ભૂતપૂર્વ સૈનિકો અને તેમના પરિવારોને સેનાની હોસ્પિટલો, પોલીક્લિનિક્સ અને ખાનગી હોસ્પિટલોમાં આરોગ્ય સુવિધાઓ પૂરી પાડે છે. આ નવા નિયમોથી સમગ્ર વ્યવસ્થા વધુ પારદર્શક અને સરળ બનશે. હવે દરેક લાભાર્થીને સ્પષ્ટપણે ખબર પડશે કે કયા શહેર અને કઈ હોસ્પિટલમાં સારવાર માટે કેટલો ખર્ચ નક્કી થયેલો છે, જેનાથી બિલિંગમાં થતી ગૂંચવણો ઘટશે.

આ પણ વાંચો-ચીનની ચિંતા વધશે! ભારત સાથે સંરક્ષણ સંબંધો મજબૂત કરવા અમેરિકાનો મોટો પ્લાન, સંસદમાં બિલ રજૂ