DA Hike News: સરકારી કર્મચારીઓને મોટો ઝટકો! જાન્યુઆરીમાં માત્ર 2% વધશે DA; 8મા પગાર પંચ પર થશે ગંભીર અસર

DA Hike News: કેન્દ્રીય કર્મચારીઓ અને પેન્શનર્સ માટે નવા વર્ષની શરૂઆત ધાર્યા મુજબની રહી નથી. જો તમે મોંઘવારી ભથ્થા (DA) માં મોટા વધારાની આશા રાખી રહ્યા હતા, તો આ સમાચાર તમને થોડા નિરાશ કરી શકે છે. તાજેતરમાં આવેલા આંકડા પરથી સ્પષ્ટ થઈ ગયું છે કે જાન્યુઆરી 2026 થી મોંઘવારી ભથ્થામાં માત્ર 2% નો જ વધારો થશે.

આ વધારા બાદ કેન્દ્રીય કર્મચારીઓનો કુલ DA અને પેન્શનર્સની મોંઘવારી રાહત (DR) 58% થી વધીને 60% થઈ જશે. જોકે, ચિંતાની વાત માત્ર આ 2% નો નજીવો વધારો નથી, પરંતુ તેની સીધી અસર ભવિષ્યમાં આવનારા 8મા પગાર પંચ હેઠળ નક્કી થનારા તમારા પગાર પર પડવાની છે.

હોળી પહેલા મળી શકે છે મંજૂરી

કેન્દ્ર સરકાર દ્વારા આ નવા વધારાને માર્ચ 2026 ના પહેલા કે બીજા અઠવાડિયામાં કેબિનેટ મંજૂરી મળી શકે છે. એવી શક્યતા છે કે સરકાર હોળીની આસપાસ તેની સત્તાવાર જાહેરાત કરશે. આ વધારો એટલા માટે પણ મહત્વનો છે કારણ કે 31 ડિસેમ્બર, 2025 ના રોજ 7મા પગાર પંચની મુદત પૂરી થઈ ચૂકી છે અને ત્યારબાદનો આ પહેલો DA હાઈક હશે.

લેબર બ્યુરોએ ડિસેમ્બર 2025 માટે CPI-IW (ઔદ્યોગિક કામદારો માટે ગ્રાહક ભાવ સૂચકાંક) ના ડેટા જાહેર કર્યા છે. ડિસેમ્બર મહિનામાં આ ઇન્ડેક્સ 148.2 પોઈન્ટ પર સ્થિર રહ્યો હતો. આ આંકડાઓના આધારે જ્યારે જુલાઈથી ડિસેમ્બર 2025 ની સરેરાશ કાઢવામાં આવે તો DA ની ગણતરી 60.34% થાય છે.

સરકારની જૂની પરંપરા રહી છે કે તે દશાંશ (પોઈન્ટ) પછીના આંકડાને ગણતી નથી. તેથી, DA ને રાઉન્ડ ફિગરમાં 60% જ રાખવામાં આવશે. આ ગણતરીથી સ્પષ્ટ છે કે વધારો 3% કે 4% નહીં, પરંતુ માત્ર 2% જ રહેશે.

7 વર્ષમાં સૌથી ઓછો વધારો

મોંઘવારી ભથ્થામાં 2% નો વધારો ઘણો ઓછો માનવામાં આવે છે. છેલ્લા 7 વર્ષોમાં ભાગ્યે જ એવું બન્યું છે કે DA વધવાની ગતિ આટલી ધીમી રહી હોય. અગાઉ જુલાઈ 2018 અને જાન્યુઆરી 2025 માં આટલો ઓછો વધારો જોવા મળ્યો હતો. વધતી મોંઘવારી વચ્ચે કર્મચારીઓ માટે આ રાહત અપૂરતી સાબિત થઈ શકે છે.

8મા પગાર પંચ પર શું થશે અસર?

સૌથી મોટો પ્રશ્ન એ છે કે આ નાના વધારાને 8મા પગાર પંચ સાથે શું લેવા-દેવા છે? હકીકતમાં, આની અસર ખૂબ ઊંડી પડવાની છે.

પગારનું ગણિત: જ્યારે પણ નવું પગાર પંચ લાગુ થાય છે, ત્યારે તે સમયે ચાલી રહેલા DA ને કર્મચારીના બેઝિક પગાર (Basic Pay) માં ઉમેરી (Merge) દેવામાં આવે છે.

ફિટમેન્ટ ફેક્ટર: નવો પગાર નક્કી કરવા માટે 'ફિટમેન્ટ ફેક્ટર' નો ઉપયોગ થાય છે. આ ફેક્ટર ઘણે અંશે એ વાત પર નિર્ભર કરે છે કે બેઝિક પગારમાં મર્જ થનારું DA કેટલું છે.

નુકસાન: જો DA જાન્યુઆરી 2026 માં 60% થી શરૂ થઈને આગળ પણ ધીમે ધીમે વધશે, તો પગાર પંચ લાગુ થાય ત્યાં સુધીમાં કુલ DA ધારણા કરતા ઓછું રહેશે.

એક્સપર્ટ્સનું માનવું છે કે, DA ની આ સુસ્ત ચાલને કારણે ભવિષ્યમાં ફિટમેન્ટ ફેક્ટર લગભગ 1.60 ની આસપાસ સીમિત રહી શકે છે. સરળ ભાષામાં કહીએ તો, જ્યારે નવી સેલરી બનશે ત્યારે તેમાં મોટો ઉછાળો જોવા નહીં મળે જેની કર્મચારીઓ આશા રાખી રહ્યા છે.

ક્યારે લાગુ થશે 8મું પગાર પંચ?

જોકે 8મા પગાર પંચની રચના થઈ ચૂકી છે, પરંતુ તેને લાગુ થવામાં હજુ વાર લાગશે. પંચ પાસે રિપોર્ટ સોંપવા માટે 18 મહિનાનો સમય છે. જૂના રેકોર્ડ બતાવે છે કે રિપોર્ટ આવ્યા પછી પણ સરકારને તેને લાગુ કરવામાં 1 થી 2 વર્ષનો સમય લાગી જાય છે. એટલે કે, તમને નવા પગારનો ફાયદો 2027 ના અંતમાં અથવા 2028 ની શરૂઆતમાં મળી શકે છે.

ટૂંકમાં, આગામી 2 વર્ષમાં થનારા 4 DA વધારાએ નક્કી કરશે કે 8મા પગાર પંચમાં તમારો બેઝિક પગાર કેટલો વધશે. હાલમાં જાન્યુઆરી 2026 નો આ 2% વધારો એ સંકેત આપી રહ્યો છે કે ભવિષ્યમાં પગાર અને પેન્શનમાં થનારો વધારો મર્યાદિત રહી શકે છે.

આ પણ વાંચો-Moody's On India GDP: ભારતની રફ્તાર રોકવી મુશ્કેલ! દુનિયામાં વાગ્યો ડંકો, આ વર્ષે પણ રહેશે નંબર-1