8th Pay Commission: 3.61 થી 4.00 સુધી ફિટમેન્ટ ફેક્ટરની માંગ, જાણો કેટલી વધશે સરકારી કર્મચારીઓની બેઝિક સેલરી અને પેન્શન?

8th Pay Commission: 8માં કેન્દ્રીય પગાર પંચને લઈને કેન્દ્રીય કર્મચારીઓ અને પેન્શનરોમાં હવે ચર્ચાઓ તેજ બની ગઈ છે. 7માં પગાર પંચમાં સરકારે ફિટમેન્ટ ફેક્ટર 2.57 નક્કી કર્યું હતું, જેના કારણે કર્મચારીઓની લઘુત્તમ બેઝિક સેલરી 7,000 થી વધીને 18,000 થઈ હતી. હવે 8માં પગાર પંચ માટે કર્મચારી યુનિયનોએ ફિટમેન્ટ ફેક્ટર 3.61 થી લઈને 4.00 સુધી રાખવાની જોરદાર માંગ ઉઠાવી છે.

કાગળ પર ફિટમેન્ટ ફેક્ટરના આ આંકડા ભલે નાના લાગતા હોય, પરંતુ હકીકતમાં તેનાથી કર્મચારીઓના દર મહિનાના પગારમાં હજારો રૂપિયાનો સીધો વધારો થશે.

ફિટમેન્ટ ફેક્ટર શું છે અને તે કેમ આટલું મહત્વનું છે?

ફિટમેન્ટ ફેક્ટર એક એવો મલ્ટિપ્લાયર છે, જેની સાથે કર્મચારીની હાલની બેઝિક સેલરીનો ગુણાકાર કરીને નવા પગાર પંચ મુજબ નવો પગાર નક્કી કરવામાં આવે છે. આ ફેક્ટર માત્ર મોંઘવારી ભથ્થા (DA) ની અસરને જ કવર નથી કરતું, પરંતુ કર્મચારીઓની વાસ્તવિક આવકમાં વધારો પણ સુનિશ્ચિત કરે છે. નિવૃત્ત કર્મચારીઓનું બેઝિક પેન્શન નક્કી કરવામાં પણ આ જ ફેક્ટરનો ઉપયોગ થાય છે.

અલગ-અલગ કર્મચારી અને પેન્શનર સંગઠનોએ 8માં પગાર પંચ સમક્ષ પોતાની ગણતરી અને માંગણીઓ રજૂ કરી છે: ભારતીય પ્રતિરક્ષા મજદૂર સંઘએ સૌથી વધુ 4.00 ફિટમેન્ટ ફેક્ટરની માંગ કરી છે. આ અંતર્ગત બેઝિક સેલરી 72,000 નક્કી કરવાનો પ્રસ્તાવ છે. BPMS નું કહેવું છે કે આમાં 1.58 હિસ્સો માત્ર મોંઘવારી ભથ્થાની અસરને પહોંચી વળવા માટે છે, જ્યારે બાકીનો હિસ્સો રાષ્ટ્રીય માથાદીઠ આવકમાં થયેલા વધારા પર આધારિત છે.

નેશનલ કાઉન્સિલ JCM અને ભારત પેન્શનર્સ સમાજએ 3.833 ફિટમેન્ટ ફેક્ટરનો પ્રસ્તાવ મૂક્યો છે. આ મુજબ લઘુત્તમ પગાર 69,000 થશે. NCJCM એ 5 સભ્યોના પરિવાર માટે ખાવા-પીવા, કપડાં, મકાન, શિક્ષણ, લગ્ન અને ટેકનોલોજી જેવા 15માં ILC ના માપદંડોને આધારે આ ગણતરી કરી છે. મિનિસ્ટ્રીયલ સ્ટાફ એસોસિએશનએ 3.61 ફિટમેન્ટ ફેક્ટરની માંગ કરી છે, જેનાથી લેવલ-1 ના કર્મચારીઓની લઘુત્તમ સેલરી 65,000 થઈ જશે.

સેલરી મેટ્રિક્સ: કયા લેવલના કર્મચારીઓને કેટલો ફાયદો થશે?

ફિટમેન્ટ ફેક્ટરની અલગ-અલગ માંગ મુજબ પે-મેટ્રિક્સમાં મોટો તફાવત જોવા મળશે.

લેવલ 1: MSA (3.61)ની માંગ મુજબ 64,980, NCJCM (3.833) મુજબ 69,000 અને BPMS (4.00)ની માંગ મુજબ પગાર 72,000 થશે.

લેવલ 6: NCJCM ના પ્રસ્તાવ મુજબ બેઝિક પે વધીને સીધો 1,35,700 થઈ જશે.

લેવલ 9 અને 10: NCJCMની માંગ મુજબ આ લેવલનો પગાર 2,15,100 સુધી પહોંચી જશે.

શું સરકાર પગાર વધારાનો આર્થિક બોજ ઉઠાવી શકશે?

સરકારની આર્થિક સ્થિતિ અંગે NCJCM એ સ્પષ્ટ તર્ક આપ્યો છે કે વર્ષ 2014-15 પછી દેશના GDPમાં 165.23% અને કુલ ટેક્સ રેવન્યુમાં 205.41% નો જંગી વધારો થયો છે. આથી સરકાર પાસે પગાર વધારાના આર્થિક બોજને સરળતાથી સંભાળવાની પૂરી ક્ષમતા છે. રેલવે સિનિયર સિટીઝન વેલફેર સોસાયટીએ પણ ભારપૂર્વક જણાવ્યું છે કે જો બેઝિક પેન્શનમાં પૂરતો વધારો નહીં થાય તો નિવૃત્ત કર્મચારીઓની સામાજિક સુરક્ષા જોખમાશે.

આ પણ વાંચો-EPFOએ પોર્ટલ કર્યું અપડેટ, હવે ઘરે બેઠા જ પતાવી લો PF ઉપાડવા અને UANના આ 7 મોટા કામ